Չիկագոյում ընթացող բռնցքամարտի աշխարհի առաջնության վերջին երեք օրերը բավական հաջող էին Հայաստանի պատվիրակների համար: Ռինգ դուրս եկած մեր վեց բռնցքամարտիկներից հինգը հաղթանակով ավարտեցին իրենց մենամարտերը եւ կշարունակեն պայքարը: Անհաջողության մատնվեց միայն Անդրանիկ Հակոբյանը (75 կգ), որն իր երկրորդ մենամարտն էր անցկացնում: Նա միավորների չնչին տարբերությամբ (20-22) զիջեց իռլանդացի Դարեն Սուտհեռլանդին: Իսկ ահա Ազատ Հովհաննիսյանը (57 կգ), Էդուարդ Համբարձումյանը (64 կգ) եւ Հրաչյա Ջավախյանը (60 կգ) իրենց երկրորդ մենամարտերն էլ հաղթանակով ավարտեցին եւ մտան հաջորդ փուլ: Եթե նրանց հաջողվի եւս մեկ մենամարտ շահել, ապա օլիմպիական ուղեգիր կնվաճեն:
Ազատ Հովհաննիսյանը մեծ առավելությամբ (40-20) հաղթեց մոնղոլ բռնցքամարտիկ Զորիգբատուր Էնկնզորիգին: Էդուարդ Համբարձումյանին էլ հաջողվեց մեծ առավելության հասնել մրցակցի` լիտվացի Էգիդիյուս Կավալիաուսկասի նկատմամբ (24-6): Ավելի համառ մրցապայքարում անցավ Հրաչյա Ջավախյանի մենամարտը ԱՄՆ-ն ներկայացնող Սադամ Ալիի հետ: Առաջին ռաունդը հայ բռնցքամարտիկը շահեց 7-5 հաշվով, երկրորդում հասավ մեկ միավորի առավելության (4-3): Երրորդ ռաունդում ուժերը հավասար էին (5-5), իսկ չորրորդում Ջավախյանը մենամարտը շահեց 4-3 հաշվով: Այսպիսով, հայ բռնցքամարտիկը հաղթեց 20-16 հաշվով:
Չիկագոյում իրենց անդրանիկ մենամարտերն անցկացրին Ցոլակ Անանիկյանը (81 կգ) եւ Հովհաննես Դանիելյանը (48 կգ): Անանիկյանի մրցակիցը թուրք բռնցքամարտիկ Բահրամ Մուզաֆերն էր: Մեր բռնցքամարտիկը զգալի առավելության հասավ մրցակցի նկատմամբ եւ մենամարտը շահեց 23-13 հաշվով: Նրա հաջորդ մրցակիցը կլինի լիտվացի Սեմյոտասը:
Հովհաննես Դանիելյանը բացահայտ առավելության հասավ տրինիդադցի Ահարոն Կումբերբատչի նկատմամբ (28-0): 3-րդ ռաունդում մրցավարն ի նշան հայ բռնցքամարտիկի առավելության, դադարեցրեց մենամարտը եւ հաղթանակը շնորհեց Դանիելյանին:
48 կգ քաշային կարգում իր երկրորդ հաղթանակը տոնեց ռուսաստանցի Դավիթ Հայրապետյանը: Նա 27-18 հաշվով պարտության մատնեց 2005-ի աշխարհի փոխչեմպիոն, հունգարացի Միխայ Բեդակին: Հաջորդ հանդիպումը նա կանցկացնի աշխարհի ներկայիս չեմպիոն, չին բռնցքամարտիկ Ցզոու Շիմինի հետ:
ԱՇՈՏ ՀԱՅՐԱՊԵՏՅԱՆ