Ֆուտբոլի Հայաստանի ազգային հավաքականը հաջող անցկացրեց Հոլանդիայի Պերնիս բնակավայրում Ղազախստանի ընտրանու հետ կայացած ընկերական հանդիպումը` հաղթելով 1-0 հաշվով: Դանիացի մասնագետ Յան Պոուլսենը չափազանց հաջող է սկսել մարզչական գործունեությունը Հայաստանի ազգային հավաքականի գլխավոր մարզչի պաշտոնում: Նրա գլխավորությամբ մեր ընտրանին անցկացրած չորս խաղերից երեքում հաղթել է, մեկում պարտվել:
Խաղասկզբում կարող էին աչքի ընկնել ղազախները, սակայն Մաքսիմ Ժալմագամբետովի գլխի հարվածը մի փոքր շեղ ստացվեց: Պատասխան գրոհի ժամանակ արդեն կարող էր աչքի ընկնել Էդգար Մանուչարյանը, որն այդ խաղում իրեն լավ դրսեւորեց: Հովսեփյանի փոխանցումից հետո Էդգարը փորձեց գրավել դարպասը, սակայն ղազախների դարպասապահ Դավիթ Լորիան փրկեց դրությունը: Վերջինս հետ մղեց նաեւ Համլետ Մխիթարյանի հարվածը: Իսկ հետո նպաստավոր դիրքից վրիպեց Մանուչարյանը: Մինչեւ ընդմիջում Գեւորգ Կասպարովը հետ մղեց Սերգեյ Սկորիխի վտանգավոր հարվածը: Հիշարժան էր Էդգար Մանուչարյանի դիպուկ հարվածը, որը գեղեցիկ ցատկով չեզոքացրեց Լորիան:
Ընդմիջումից հետո հայ ֆուտբոլիստները տիրեցին նախաձեռնությանը: Փոխարինման մտած Արարատ Առաքելյանը երկու անգամ անհանգստացրեց ղազախների դարպասապահին: Մի դեպքում նրա հեռահար հարվածը մի փոքր բարձր ստացվեց, իսկ մյուս դեպքում գլխի հարվածից հետո գնդակը դիպավ ձողին: Վերջապես մեր ֆուտբոլիստների գրոհները ցանկալի արդյունք տվեցին: 62-րդ րոպեին ձախ թեւով առաջ շարժվելով, Մանուչարյանը մոտ 25 մետրից հուժկու հարվածով բացեց հաշիվը: Չորս րոպե անց մեր ֆուտբոլիստները հաշիվը կրկնապատկելու գերազանց հնարավորություն ստացան, սակայն Սարգիս Հովսեփյանի 11 մ հարվածը հետ մղեց դարպասապահը: Կարող էր աչքի ընկնել նաեւ Արա Հակոբյանը, սակայն վերջին պահին Ժալմագամբետովը հասցրեց գնդակը հեռացնել դատարկ դարպասից:
Այսպիսով, ՀՀ հավաքականը հաղթեց 1-0 հաշվով եւ ռեւանշի հասավ ղազախների նկատմամբ անցած տարի Երեւանում նույն հաշվով կրած պարտության դիմաց: Յան Պոուլսենի գլխավորությամբ մեր հավաքականի արդյունքները լավատեսորեն են տրամադրում հայ երկրպագուներին: Հուսանք, որ ընտրական մրցաշարում էլ մեր հավաքականը հաջող հանդես կգա:
Այդ խաղում մրցակիցները հանդես են եկել հետեւյալ կազմերով:
Հայաստան-Գեւորգ Կասպարով, Սարգիս Հովսեփյան, Ալեքսանդր Թադեւոսյան, Ռոբերտ Արզումանյան, Աղվան Մկրտչյան, Ռոմիկ Խաչատրյան (Կարեն Ալեքսանյան, 78), Արթուր Ոսկանյան (Արարատ Առաքելյան, 46), Կառլեն Մկրտչյան (Գեւորգ Ղազարյան, 46), Համլետ Մխիթարյան (Հենրիխ Մխիթարյան, 72), Էդգար Մանուչարյան (Արա Հակոբյան, 67):
Ղազախստան-Լորիա, Սմակով, Կուչմա, Ժալմագամբետով, Ազովսկի, Բյակով (Նուրդաուլետով, 89), Բալթիեւ, Սկորիխ, Ասանբաեւ, Ժումասկալիեւ, Օստոպենկո:
ԱՇՈՏ ՀԱՅՐԱՊԵՏՅԱՆ