Համաշխարհային բանկի կողմից Հայաստանում իրականացված երկու ծրագրեր երեկ հաղթող են դարձել Համաշխարհային բանկի «Եվրոպայում եւ Կենտրոնական Ասիայում մարդկանց կյանքի բարելավման» առաջին տարեկան մրցանակաբաշխությունում: Դրանք են Հայաստանի պատվարների անվտանգության ծրագիրը եւ աղքատության ծրագրային մոնիթորինգը: Այս մասին տեղեկացանք Համաշխարհային բանկի երեւանյան գրասենյակից:
Ինչպես նշել է ՀԲ Հարավային Կովկասի տարածաշրջանային տնօրեն Դոննա Դոուսենթ-Քոյրոլոն, Համաշխարհային բանկի ներգրավումն այս ոլորտում անմիջական արձագանք էր կառավարության այն մտահոգությանը, որ երկրի պատվարների համակարգը գտնվում էր ֆիզիկապես բարձիթողի վիճակում եւ դիմակայում էր փլուզման վտանգին: «Տեխնիկական զննությունները բացահայտեցին, որ միջազգային չափանիշերով Հայաստանի պատվարների մեծ մասը չի բավարարում անվտանգության ընդունելի նորմերը: Հետեւաբար, այս ծրագրի ամենակարեւոր խնդիրն այն է, որ ծրագիրն ապահովեց պատվարների ջրահոսքի ստորին հատվածներում բնակվող Հայաստանի գրեթե կես միլիոն ազգաբնակչության անվտանգությունը», ասել է նա:
Ըստ ՀԲ երեւանյան գրասենյակի, վերոնշյալ ծրագրով վերականգնվեց փլուզման առավել բարձր ռիսկայնություն ունեցող 26 պատվար: Այժմ այդ պատվարների ջրահոսքի ստորին հատվածում բնակվող 375 հազար մարդ պաշտպանված է: Մարմարիկի պատվարի ընթացող վերականգնումը կապահովի ջրահոսքի ստորին հատվածում բնակվող եւս 162 հազար մարդու անվտանգությունը: Բոլոր տեղանքների համար մշակվել են արտակարգ իրավիճակների պատրաստվածության ծրագրեր, իսկ 156 գյուղում տեղադրվել են վթարների նախազգուշացման համակարգեր: Ջրահոսքի ստորին հատվածում գտնվող համայնքներում արտակարգ իրավիճակների վարչությունը շարունակում է իրականացնել իրազեկման քարոզարշավները:
Ինչ վերաբերում է հաղթած մյուս ծրագրինՙ աղքատության ծրագրային մոնիթորինգին, ապա Դոննա Դոուսենթ-Քոյրոլոն այն կարծիքն է հայտնել, որ օբյեկտիվ, փաստացի տվյալներն անչափ կարեւոր են կենսամակարդակի մոնիթորինգի ու քաղաքականության գիտելիքահենք մշակման համար, հատկապես` առողջապահության, կրթության եւ սոցիալական պաշտպանության ոլորտներում: Վիճակագրական ծառայության տրամադրած տվյալներն ազդում են կառավարության քաղաքականության եւ մարդկանց կյանքի վրա: Որպես սոցիալական քաղաքականության գծով որոշումների կայացման ներդրում` Ազգային վիճակագրական ծառայությունն իրականացնում է տնային տնտեսությունների համապարփակ ամենամյա ուսումնասիրություններ: Օրինակ, ուսումնասիրությունների տվյալներն առանցքային են եղել հասցեական սոցիալական օժանդակության եւ անվճար բուժօգնության մշակման ու բյուջետավորման հարցում: Կենսամակարդակի ցուցանիշները եւ «ՀՀ սոցիալական պատկերը եւ աղքատությունը» զեկույցն ամեն տարի հրապարակվում են հայերեն եւ անգլերեն լեզուներով:
Տեղեկացվում է նաեւ, որ Համաշխարհային բանկի մրցավարների խումբն ընտրել էր Եվրոպայի եւ Կենտրոնական Ասիայի (ԵԿԱ) տարածաշրջանի 22 ծրագիր:
ԱՐԱ ՄԱՐՏԻՐՈՍՅԱՆ