Շախմատի Կալկաթայի մրցաշարը մոտենում է ավարտին: Նախավերջին` 9-րդ տուրում Սմբատ Լպուտյանը սպիտակներով ոչ-ոքի խաղաց ֆիլիպինցի Օլիվեր Բարբոսայի հետ եւ վաստակեց 5,5 միավոր: Ավարտական տուրում հայ գրոսմայստերը կմրցի հնդիկ շախմատիստ Պրակաշի հետ:
9-րդ տուրում չորս առաջատարները մրցում էին միմյանց հետ: Կրիշնան Սասիկիրանը սեւերով հաղթեց իր հայրենակից Սանդիպան Չանդային, իսկ չեխ Վիկտոր Լազնիչկան պարտության մատնեց հնդիկ շախմատիստուհի Համպի Կոներուին: Այդ հաջողության շնորհիվ Լազնիչկան ու Սասիկիրանը 7,5 միավորով գլխավորեցին մրցաշարային աղյուսակը: Վերջին տուրում Սասիկիրանը սպիտակներով մրցելու է Պրասադ Արունի հետ, որն ունի 7 միավոր: Լազնիչկայի մրցակիցը կլինի 6,5 միավոր ունեցող եգիպտացի Ահմեդ Ադլին:
Բացի այդ պարտիաներից, չեմպիոնի կոչման համար կարեւոր նշանակություն կունենան նաեւ Կոներու-Ռահման, Նոլթե-Չանդա, Սաֆին-Բաքրե մրցախաղերը:
ԱՇՈՏ ՀԱՅՐԱՊԵՏՅԱՆ