«ԱԶԳ» ՕՐԱԹԵՐԹ

ԼԵՎՈՆ ԱՐՈՆՅԱՆԻ ՎԱՐԿԱՆԻՇԸ ՌԵԿՈՐԴԱՅԻՆ ՑՈՒՑԱՆԻՇԻ ՀԱՍԱՎ

Ընթացիկ մրցաշրջանում Լեւոն Արոնյանի վստահ ելույթներն իրենց արտացոլումն են գտել ՖԻԴԵ-ի վարկանիշային ցուցակում հայ գրոսմայստերի ցուցանիշներում: «Ազգը» չէր բացառել, որ Լեւոն Արոնյանի վարկանիշը հնարավոր է գերազանցի նրա ռեկորդային ցուցանիշը: Եվ ահա, ՖԻԴԵ-ի դասակարգման նոր ցուցակում Լեւոն Արոնյանը հասել է իր համար ռեկորդային վարկանիշի (2763)ՙ զբաղեցնելով 6-րդ հորիզոնականը: Շախմատասերներին հիշեցնենք, որ մարզական իր կարիերայի ընթացքում ամենաբարձր վարկանիշը (2761) Լեւոնն ունեցել է 2006-ի հուլիսի 1-ին:

Դասակարգման նախորդ ցուցակի (հունվարի 1-ի դրությամբ) համեմատ Արոնյանը վարկանիշը բարձրացրել է 24-ով եւ չորս հորիզոնականով առաջադիմել է: Եթե Արոնյանը շարունակի իր վստահ ելույթները նաեւ առաջիկա մրցաշարերում, ապա ընդհուպ կմոտենա 2800-ի սահմանագծին, որն առայժմ հաջողվել է հատել միայն աշխարհի չեմպիոն Վիշվանաթան Անանդին (2803): Իսկ ահա մյուս երկու շախմատիստները զգալի հետընթաց են ունեցել: Վլադիմիր Հակոբյանը 27-ով նվազեցրել է վարկանիշը (2673) ու 23-րդ տեղից նահանջել է 49-րդ հորիզոնական: Գաբրիել Սարգսյանն էլ 33-ով իջեցրել է վարկանիշը (2643) ու 43-րդ տեղից նահանջել է 77-րդ հորիզոնական: Իսկ ահա Կարեն Ասրյանը կրկին տեղ է զբաղեցրել 100 լավագույնների շարքում: Նա 2630 վարկանիշով 92-րդ տեղում է: Հակոբյանն ու Սարգսյանն ամենազգալի հետընթացն ունեցած շախմատիստներն են:

Նախորդ ցուցակի համեմատ ամենամեծ առաջընթացն ունեցել է նորվեգացի Մագնուս Կառլսենը: Նա իր վարկանիշն ավելացրել է 32-ով (2765) եւ 13-րդ տեղից տեղափոխվել է 5-րդ հորիզոնական: Լավագույն հնգյակում տեղ զբաղեցրած շախմատիստներից Կրամնիկը (-11) եւ Թոփալովը (-13) նվազեցրել են վարկանիշները, իսկ Անանդը (+4) եւ Մորոզեւիչը (+9)ՙ ավելացրել:

Կանանց դասակարգման ցուցակում 50 լավագույնների ցանկում Էլինա Դանիելյանը 2479 վարկանիշով 17-րդ տեղում է, իսկ Լիլիթ Մկրտչյանը 2413 վարկանիշով բաժանում է 50-53-րդ տեղերը: Ցուցակը նախկինի պես գլխավորում է հունգարուհի Հուդիթ Պոլգարը: Մինչեւ 20 տարեկան երիտասարդների ու աղջիկների 20 լավագույնների թվում Հայաստանը կրկին ներկայացուցիչ չունի: Երիտասարդների ցուցակը 2765 վարկանիշով գլխավորում է Մագնուս Կառլսենը, աղջիկներինըՙ Հոու Յիֆանը (2549):

Երկրների մեջ Հայաստանը 2625 վարկանիշով 6-րդ տեղում է: Ցուցակը նախկինի պես գլխավորում է Ռուսաստանը (2719), որին հաջորդում են Ուկրաինան (2684), Իսրայելը (2635), Չինաստանը (2635) եւ ԱՄՆ-ն (2634):

Ներկայացնում ենք տղամարդկանց եւ կանանց դասակարգման ցուցակների լավագույն տասնյակները:

Տղամարդիկ

Կանայք

ԱՇՈՏ ՀԱՅՐԱՊԵՏՅԱՆ