Ֆուտբոլի Հայաստանի բարձրագույն խմբի առաջնության 11-րդ տուրում կենտրոնականը «Փյունիկի» եւ «Միկայի» մրցավեճն էր, որն անցավ աշխույժ մրցապայքարում եւ հարուստ էր գոլային պահերով: Արդեն 8-րդ րոպեին «Միկայի» հարձակվող Նարեկ Բեգլարյանը խորքից փոխանցում ստանալով, մոտ տարածությունից բացեց հաշիվը: 10 րոպե անց նա կարող էր երկրորդ գոլը խփել, սակայն ձախ թեւով սրընթաց անցումից հետո կատարած հարվածը դիպավ դարպասաձողին: Ֆուտբոլում չգրված օրենքի համաձայն, մեկ րոպե անց գնդակը հայտնվեց «Միկայի» դարպասում: Փյունիկցիներն արագ հակագրոհ ձեռնարկեցին եւ դարպասապահի դիմաց մեն մենակ հայտնված Հենրիկ Մխիթարյանը հավասարեցրեց հաշիվը:
Մնացած ժամանակահատվածում թեեւ եղան գոլային պահեր, սակայն այդպես էլ դարպասի նոր գրավում չգրանցվեց: Կարող էին աչքի ընկնել Մխիթարյանը, Հովսեփյանը, Ստեփան Հակոբյանը, Գեւորգ Ղազարյանն ու «Միկայի» լեգեոնական Զազա Սախոկիան: Այս խաղում գրանցված ոչ-ոքի արդյունքը հնարավորություն տվեց արարատցիներին մեծացնելու միավորների տարբերությունն իր գլխավոր հակառակորդներից:
«Արարատը» հյուրընկալել էր «Շիրակին»: Խաղասկիզբն անհաջող դասավորվեց արարատցիների համար, որոնք արդեն 10-րդ րոպեին Երվանդ Հակոբյանի խփած գոլից հետո հայտնվել էին հետապնդողի դերում: Ի պատիվ արարատցիների, երկրորդ խաղակեսին նրանք կարողացան շտկել իրավիճակը եւ կամային հաղթանակ տարան: Նախ 63-րդ րոպեին աչքի ընկավ թիմի բրազիլացի պաշտպան Էմիլիոն, ապա խաղավարտից 3 րոպե առաջ Գեւորգ Նռանյանը խփեց հաղթական գնդակը:
Կապանում «Գանձասարը» 3-1 հաշվով առավելության հասավ առաջնության հետնապահ «Կիլիկիայի» նկատմամբ: Դաշտի տերերից գոլերը խփեցին Ալեքսանդր Պետրոսյանը, Վիրգին Մարշավելան (11 մ հարվածով) եւ Բենիամին Մանուչարյանը: Հյուրերից միակ գոլն իր օգտին գրանցեց Կարեն Խաչատրյանը: «Բանանցն» էլ հյուրընկալվելիս բավական դժվարին պայքարում հաղթեց «Ուլիսին», շնորհիվ 9-րդ րոպեին Արսեն Բալաբեկյանի խփած միակ գոլի:
Հունիսի 21-ին կկայանան առաջնությունում հետաձգված երկու հանդիպումները: Հատկապես մեծ հետաքրքրությամբ է սպասվում «Արարատ»-«Փյունիկ» մրցախաղը: Մյուս խաղում «Շիրակը» կհյուրընկալի «Բանանցին»:
Մրցաշարային աղյուսակ
| Խ | Հ | Ո | Պ | Գ | Մ | |
| 1. Արարատ | 9 | 8 | 0 | 1 | 20-8 | 24 |
| 2. Միկա | 9 | 6 | 2 | 1 | 15-6 | 20 |
| 3. Փյունիկ | 8 | 5 | 2 | 1 | 10-4 | 17 |
| 4. Բանանց | 8 | 4 | 1 | 3 | 9-6 | 13 |
| 5. Գանձասար | 10 | 3 | 2 | 5 | 13-14 | 11 |
| 6. Շիրակ | 10 | 3 | 1 | 6 | 7-13 | 10 |
| 7. Ուլիս | 10 | 3 | 0 | 7 | 8-10 | 9 |
| 8. Կիլիկիա | 10 | 1 | 0 | 9 | 6-27 | 3 |
Ռմբարկուները
| Մարկոս Պիզելի | «Արարատ» | 8 |
| Նարեկ Բեգլարյան | «Միկա» | 6 |
| Գեւորգ Ղազարյան | «Փյունիկ» | 4 |
| Արսեն Բալաբեկյան | «Բանանց» | 4 |
ԱՇՈՏ ՀԱՅՐԱՊԵՏՅԱՆ