Ուիլմինգտոնում (Դելավեր նահանգ, ԱՄՆ) տեղակայված Հումանիտար գիտությունների ամերիկյան համալսարանի տնօրենների վարչությունը վերջերս հայտարարել է, որ համալսարանի պրեզիդենտ է նշանակել ճանաչված հայազգի մտավորական, համալսարանական կառավարման երկարամյա փորձ ունեցող գործիչ Կարպիս Տեր-Եղիայանին, որը ցարդ վարում էր նույն համալսարանի գլոբալ ցանցին մաս կազմող «Մաշտոց քոլեջի» պրեզիդենտի պաշտոնը:
Այս մասին տեղեկացնելով` «Արմինյն միրոր սփեքթեյթր» շաբաթաթերթը հավելում է, որ Տեր-Եղիայանը ավելի քան 30 տարվա կառավարման փորձ ունի Մ. Նահանգների բարձրագույն կրթության բնագավառում, պաշտպանել է դոկտորական թեզ կրթական ոլորտում սոցիալական քաղաքականության եւ հետեւողական զարգացման թեմայի շուրջ: Աշխատել է Հարավային Կալիֆոռնիայի մի շարք ոչ շահութաբեր կազմակերպություններում, ինչպիսիք են հատկապես «Ռոտարի ինտերնեշնըլը», որտեղից արժանացել է բարձրագույն պատվավոր մրցանակին: Հեղինակ է կրթության, պատմության առօրյա իրադարձությունների մասին գրված 14 գրքերի:
Հ. Ծ.