Հուլիսի 8-19 Լայպցիգում կայացած Յոհան Սեբաստիան Բախ միջազգային 16-րդ մրցույթում Ռոստոկի երաժշտության եւ թատրոնի բարձրագույն դպրոցի սան 21-ամյա թավջութակահար Դավիթ Մելքոնյանը, ինչպես նաեւ ճապոնացի Թորու Յամամոտոն շահել են երկրորդ մրցանակ: Առաջին մրցանակակիր է դարձել մեծբրիտանացի մի թավջութակահար: Մրցույթին մասնակցել է 95 երաժիշտ (երգեհոն, վոկալ, թավջութակ, բարոկթավջութակ)ՙ 23 երկրից:
Դավիթ Մելքոնյանը 2006-ի ապրիլից է ուսանում Ռոստոկում, պրոֆեսոր Գերտ ֆոն Բյուլովի դասարանում: Դավիթը առանձնահատուկ հետաքրքրություն ունի բարոկի հանդեպ. Ռոստոկի դպրոցի ղեկավարությունն ուրախ է, որ մեկ տարի առաջ ձեռք բերած բարոկթավջութակը նման «ծառայություն» կարողացավ մատուցել:
Լայպցիգի Յոհան Սեբաստիան Բախ միջազգային մրցույթը, որ Գերմանիայի նշանակալի երաժշտական մրցույթներից է, առաջին անգամ անցկացվել է 1950-ին: Մրցութային ծրագրում տեղ են գտնում Բախի եւ նրա ժամանակակիցների, ինչպես նաեւ ավելի ուշ դարերում Բախի երաժշտության ներշնչմամբ գրված ստեղծագործություններ:
ԱՆԱՀԻՏ ՀՈՎՍԵՓՅԱՆ, Գերմանիա