4-րդ տուրից հետաձգված «Միկա»-«Փյունիկ» հանդիպումով ավարտվեց ֆուտբոլի Հայաստանի բարձրագույն խմբի առաջնության 2-րդ շրջանը: Երկու թիմերն էլ ջանք են գործադրում հասնելու առաջատարի դերը մեկնարկից ստանձնած «Արարատին»: «Միկան» հաջողության դեպքում կշրջանցեր արարատցիներին եւ 2-րդ շրջանը կավարտեր աղյուսակի առաջին հորիզոնականում: Նման հեռանկարը ոգեւորել էր «Միկայի» ֆուտբոլիստներին, որոնք հատկապես առաջին խաղակեսին ակտիվ խաղ ցուցադրեցին եւ ստիպել էին «Փյունիկին» ավելի շատ հոգ տանել սեփական դարպասի պաշտպանության մասին:
Դաշտի տերերը բավական վտանգավոր գրոհներ էին կազմակերպում եւ դրանցից մեկն ավարտվեց «Փյունիկի» դարպասի գրավմամբ: 18-րդ րոպեին Ֆյոդորովը ճշգրիտ փոխանցումով հարվածի դուրս բերեց Ալեքսին եւ վերջինս գրավեց դարպասը: 27-րդ րոպեին «Միկան» հիանալի հնարավորություն ուներ կրկնապատկելու հաշիվը: Զազա Սախոկիան մեն մենակ հայտնվեց դարպասապահի դիմաց, սակայն վերջինս հետ մղեց հարվածը: Փյունիկցիներն էլ իրենց հերթին գոլային երկու լավ պահ չիրացրին: Արթուր Եդիգարյանի հարվածը որսաց Սոսո Գրիշիկաշվիլին, իսկ Վարդան Պետրոսյանը մոտ տարածությունից վրիպեց:
2-րդ խաղակեսում երկու թիմերն էլ շարունակեցին ակտիվ գործողությունները: Փյունիկցիները մեծ ուժերով էին հարձակվում` ձգտելով փրկել խաղը: Եվ դա նրանց հաջողվեց: 77-րդ րոպեին Արթուր Եդիգարյանը հավասարեցրեց հաշիվը: Հետագայում երկու թիմերն էլ կարող էին կորզել հաղթանակը, սակայն այլեւս գոլ չգրանցվեց: Խաղն ավարտվեց մարտական ոչ-ոքի (1-1) արդյունքով: Առաջնության 3-րդ շրջանը կմեկնարկի օգոստոսի 2-ին:
Մրցաշարային աղյուսակ
| Խ | Հ | Ո | Պ | Գ | Մ | |
| 1. Արարատ | 14 | 9 | 2 | 3 | 22-11 | 29 |
| 2. Միկա | 14 | 8 | 4 | 2 | 21-11 | 28 |
| 3. Փյունիկ | 14 | 7 | 4 | 3 | 14-7 | 25 |
| 4. Բանանց | 14 | 7 | 3 | 4 | 18-10 | 24 |
| 5. Գանձասար | 14 | 6 | 3 | 5 | 20-16 | 21 |
| 6. Ուլիս | 14 | 4 | 1 | 9 | 10-16 | 13 |
| 7. Շիրակ | 14 | 3 | 2 | 9 | 8-19 | 11 |
| 8. Կիլիկիա | 14 | 2 | 1 | 11 | 9-32 | 7 |
Ռմբարկուները
| Մարկոս Պիզելի | «Արարատ» | 10 |
| Նարեկ Բեգլարյան | «Միկա» | 6 |
| Գեւորգ Ղազարյան | «Փյունիկ» | 4 |
| Արսեն Բալաբեկյան | «Բանանց» | 4 |
| Նորայր Գյոզալյան | «Բանանց» | 4 |
| Բենիամին Մանուչարյան | «Գանձասար» | 4 |
| Ալեքսանդր Պետրոսյան | «Գանձասար» | 4 |
| Կարեն Խաչատրյան | «Կիլիկիա» | 4 |
ԱՇՈՏ ՀԱՅՐԱՊԵՏՅԱՆ