«ԱԶԳ» ՕՐԱԹԵՐԹ

ՊԵԿԻՆՅԱՆ ՕԼԻՄՊԻԱԴԱՆ ՊԱՏՄՈՒԹՅԱՆ ԳԻՐԿՆ ԱՆՑԱՎ

Հայաստանը մեդալների հաշվարկով 79-րդ տեղում է

Օգոստոսի 24-ին Պեկինում վերջնագիծը հատեց 29-րդ ամառային օլիմպիադան: Երկու շաբաթ շարունակ 205 երկրների ավելի քան 10 հազար մարզիկներ համառ պայքար էին ծավալել մեդալների 302 հավաքածուի համար: Այդ մեդալները բաժին հասան 87 երկրների ներկայացուցիչներին: Ուրախությամբ պետք է նշել, որ մեդալներից անմասն չմնացին նաեւ հայ օլիմպիականները` նվաճելով 6 բրոնզե պարգեւ: Մեդալների հաշվարկով (այն կատարվում է ելնելով ոսկե մեդալների քանակից) Հայաստանը 79-րդ տեղում է: Իսկ եթե հաշվարկը կատարենք ելնելով մեդալների ընդհանուր թվից, ապա Հայաստանը 87 երկրների մեջ բաժանում է 30-37-րդ տեղը: Մեդալների քանակով Հայաստանն ու Վրաստանը հավասար են (3-ական ոսկե եւ բրոնզե մեդալ), իսկ Հայաստանը Ադրբեջանին զիջում է մեկ մեդալով (1 ոսկե, 2 արծաթե, 4 բրոնզե):

Պեկինյան օլիմպիադան ավարտվեց տանտերերի` չին մարզիկների հաղթարշավով: Չինաստանի մարզիկները նվաճեցին բոլորից շատ ոսկե մեդալ (51) եւ մեդալների հաշվարկով գրավեցին առաջին տեղը: Ընդհանուր առմամբ չին մարզիկներն արժանացան 100 մեդալի: Պարգեւների ընդհանուր քանակով լավագույնն ԱՄՆ-ի հավաքականի ցուցանիշն է (110): Ամերիկացիները 36 ոսկե մեդալով զբաղեցրին 2-րդ հորիզոնականը: 3-րդ տեղում ռուսներն են, թեեւ հաշվի առնելով նաեւ նախկին ԽՍՀՄ-ի մարզիկների արդյունքները, պեկինյան օլիմպիադան ՌԴ հավաքականի համար ամենաանհաջողն էր:

Օլիմպիադայի ավարտական երկու օրերին մեդալները վիճարկեցին խաղային մարզաձեւերի ներկայացուցիչները: Առավել հաջող հանդես եկան ամերիկացիները` նվաճելով 6 մեդալ (երեքական ոսկե եւ արծաթե մեդալ): Ռուսներն ու բրազիլացիները մեդալների իրենց հավաքածուն հարստացրին 3 պարգեւով, իսկ ահա չին մարզիկները միայն մեկ մեդալ նվաճեցին:

Ինչպես միշտ, օլիմպիական խաղերում մեծ հետաքրքրություն են ներկայացնում բասկետբոլի մրցումները: Կանանց եւ տղամարդկանց մրցաշարերում ուժեղագույն ճանաչվեցին ԱՄՆ-ի հավաքականները: Տղամարդկանց մրցաշարում ԱՄՆ-ի հավաքականի գլխավոր մարզիչ Մայք Կրժիժեւսկուն վերջապես հաջողվել էր ուժեղ կազմ հավաքել եւ հավաքականում ընդգրկել այնպիսի «աստղերի», ինչպիսիք են Կոբի Բրայանտը, Լեբրոն Ջեյմսը, Դուայտ Հոուարդը, Դուեյն Ուեյդը: Եվ դա տվեց իր արդյունքը: Ամերիկացիները վստահ անցկացրին ողջ մրցաշարը եւ եզրափակիչում 118-107 հաշվով հաղթելով իսպանացիներին, 2002-ից հետո հասան ամենամեծ հաջողությանը` նվաճելով օլիմպիադայի չեմպիոնի տիտղոսը:

Տղամարդկանցից հետ չմնացին նաեւ կանայք: ԱՄՆ-ի կանանց հավաքականը վճռորոշ խաղում պարտության մատնեց ավստրալուհիներին (92-65): Երրորդ տեղի համար պայքարում ռուսները 94-81 հաշվով առավելության հասան Չինաստանի հավաքականի նկատմամբ: Տղամարդկանց մրցաշարում բրոնզե մեդալները նվաճեցին արգենտինացիները` 87-75 հաշվով հաղթելով լիտվացիներին:

Վոլեյբոլի մրցաշարը վերածվել էր ԱՄՆ-ի եւ Բրազիլիայի հավաքականների մրցավեճի: Տղամարդկանց մրցաշարում հաջողությունն ուղեկցեց ամերիկացիներին, որոնք հաղթեցին 3-1 հաշվով (20-25, 25-22, 25-21, 25-23): Նշենք, որ վերջին անգամ ԱՄՆ-ի հավաքականը չեմպիոն էր հռչակվել 1988-ին, Սեուլում: Բրոնզե մեդալները, ինչպես եւ չորս տարի առաջ Աթենքում, բաժին հասան ռուսներին: Նրանք 3-0 (25-22, 25-19, 25-23) հաշվով պարտության մատնեցին իտալացիներին:

Իսկ ահա կանանց մրցաշարում Բրազիլիայի հավաքականը յուրօրինակ ռեւանշի հասավ` հաղթելով 3-1 հաշվով (25-15, 18-25, 25-13, 25-21): Մինչեւ եզրափակիչ մրցախաղը, բրազիլուհիները ոչ մի խաղափուլում չէին պարտվել եւ մոտ էին 1976-ի ճապոնուհիների արդյունքը կրկնելուն: Սակայն եզրափակիչում ԱՄՆ-ի հավաքականին հաջողվեց մեկ խաղափուլ շահել: Իսկ ահա Աթենքի օլիմպիադայի չեմպիոն Չինաստանի հավաքականը բավարարվեց բրոնզե մեդալով` 3-1 (25-16, 21-25, 25-13, 25-20) հաշվով պարտության մատնելով կուբացիներին:

Ֆուտբոլի մրցաշարի հաղթող ճանաչվեց Արգենտինայի հավաքականը, որը եզրափակիչում 1-0 հաշվով հաղթեց նիգերիացիներին: Միակ գոլը 58-րդ րոպեին խփեց Դի Մարիան: Արգենտինացիների կազմում ոսկե մեդալի արժանացած ֆուտբոլիստների թվում է նաեւ Լիոնել Մեսին: Բրոնզե մեդալակիրը Բրազիլիայի հավաքականն է, որը 3-0 հաշվով առավելության հասավ բելգիացիների նկատմամբ: Երկու գոլ խփեց Ժոն, մեկ գնդակ էլ իր օգտին գրանցեց Դիեգոն:

Հունգարիայի ջրագնդակի տղամարդկանց հավաքականը 3-րդ անգամ անընդմեջ նվաճեց օլիմպիական չեմպիոնի տիտղոսը: Եզրափակիչում հունգարացիները 14-10 հաշվով պարտության մատնեցին ամերիկացիներին: Բրոնզե մեդալակիր դարձավ Սերբիայի ընտրանին: Կանանց մրցաշարում հաջողությունն ուղեկցեց Հոլանդիայի հավաքականին, որը 9-8 հաշվով պարտության մատնեց ԱՄՆ-ի ջրագնդորդուհիներին: Համառ բնույթ կրեց նաեւ 3-րդ տեղի համար կայացած Հունգարիա-Ավստրալիա մրցախաղը, որի ելքը վճռվեց 11 մ հարվածներով:

Ձեռքի գնդակի մրցաշարում Ֆրանսիայի տղամարդկանց հավաքականին առաջին անգամ հաջողվեց օլիմպիական ոսկե մեդալ նվաճել: Ֆրանսիացիները 28-23 հաշվով հաղթեցին Իսլանդիայի հավաքականին: Բրոնզը բաժին հասավ իսպանացիներին, որոնք հաղթեցին խորվաթներին (35-29): Կանանց մրցաշարում չեմպիոն հռչակվեց Նորվեգիայի ընտրանին` 34-27 հաշվով հաղթելով ռուսներին: 3-րդ տեղը գրավեց Կորեայի հավաքականը` հաղթելով հունգարուհիներին (33-28):

Վերջում ներկայացնենք մեդալների հաշվարկով 20 լավագույն հավաքականների ցուցանիշները:

ԱՇՈՏ ՀԱՅՐԱՊԵՏՅԱՆ