Այս տարվա հուլիսին Հայաստանի անշարժ գույքի շուկայում իրականացվել է 14914 գործարք, ինչը 3,3 տոկոսով ավելի է հունիսին կատարված գործարքների համեմատ եւ 10,5 տոկոսով ավելիՙ անցած տարվա հուլիսի համեմատ: Այս մասին հայտնի դարձավ անշարժ գույքի կադաստրի պետական կոմիտեիՙ շուկայի վերլուծության տվյալներից:
Հուլիսին կատարվել են 5211 օտարման գործարքներ, որոնց թիվը հունիսին եղել էր 4906-ը: Ինչպես միշտ, գերակշռում են առուվաճառքի գործարքներըՙ 80,9 տոկոս, իսկ մնացածը նվիրատվություններն ու փոխանակություններն են: Օտարման գործարքների քանակը նախորդ ամսվա նկատմամբ աճել է 6,2 տոկոսով, իսկ նախորդ տարվա հուլիսի նկատմամբՙ 0,9 տոկոսով: Օտարման գործարքների 32 տոկոսն արձանագրվել է Երեւանում:
Մայրաքաղաքում առուվաճառքի գործարքների 63,8 տոկոսն արձանագրվել է բազմաբնակարան շենքերի բնակարանների նկատմամբ: Հուլիսին հունիսի համեմատ բնակարանների առուվաճառքի գործարքների քանակը Երեւանում աճել է 5,5 տոկոսով, բայց, այդուհանդերձ, նախորդ տարվա հուլիսի համեմատ նվազել 22,2 տոկոսով:
Բնակարանների շուկայական միջին գները հուլիսին հունիսի համեմատ աճել ենՙ 1 տոկոսով: Ըստ համայնքների, Երեւանում բնակարանների 1 քմ մակերեսի միջին շուկայական գները հուլիսին այսպիսին են եղել.
| Համայնքներ | Միջին գները հուլիս 2007 թ. (դրամ) | Միջին գները հուլիս 2008 թ. (դրամ) | Միջին գները հունիս 2008 թ. (դրամ) |
| Կենտրոն | 454800 | 494800 | 487000 |
| Արաբկիր | 376600 | 422300 | 418500 |
| Քանաքեռ-Զեյթուն | 276100 | 311000 | 309600 |
| Նոր Նորք | 230100 | 284500 | 281700 |
| Ավան | 225500 | 276000 | 274000 |
| Էրեբունի | 228200 | 281000 | 279500 |
| Շենգավիթ | 251100 | 286000 | 285000 |
| Դավթաշեն | 250400 | 300500 | 295000 |
| Աջափնյակ | 242100 | 282500 | 280800 |
| Մալաթիա-Սեբաստիա | 228600 | 271600 | 269700 |
| Նուբարաշեն | 125400 | 158000 | 155300 |
| Միջինը Երեւանում (բացի Նորք-Մարաշից) | 262600 | 306200 | 303300 |
Մարզերում, բացառությամբ Երեւանի, բնակարանների միջին գները հուլիսին աճել են 2,5 տոկոսով: Երեւանից հետո ամենաթանկ բնակարաններն Աբովյանում են, որտեղ 1 քմ մակերեսի շուկայական գինը կազմել է ավելի քան 176 հազար դրամ, Վաղարշապատում (Էջմիածնում)ՙ 171 հազար դրամ, Ծաղկաձորումՙ 157 հազար դրամ: Ապա գալիս են Աշտարակը, 1 քմ-նՙ 139 հազար դրամ, Մասիսը եւ Նոր Հաըճնըՙ 132 հազար դրամ, Ջերմուկըՙ 125 հազար դրամ:
Հայաստանում հուլիսին գրանցվել է անհատական տների առուվաճառքի 520 գործարք, որից 113-ըՙ Երեւանում: Մայրաքաղաքում անհատական տների առուվաճառքի գործարքների քանակը հունիսի համեմատ աճել է 10,8 տոկոսով, իսկ մարզերում նվազել 4,1 տոկոսով: Անհատական տների միջին շուկայական գները Երեւանում, հուլիսին, նախորդ ամսվա համեմատ, աճել են 1,5 տոկոսով: Միջինացվածՙ 250 քմ շինության մակերես եւ 400 քմ տնամերձ ունեցող անհատական տների 1 քմ-ի միջին գներն ըստ համայնքների հուլիսին կազմել են.
| Համայնքներ | Միջին գները հուլիս 2007 թ. (դրամ) | Միջին գները հուլիս 2008 թ. (դրամ) | Միջին գները հունիս 2008 թ. (դրամ) |
| Կենտրոն | 470100 | 501400 | 494400 |
| Արաբկիր | 382800 | 434900 | 426900 |
| Քանաքեռ-Զեյթուն | 279700 | 319100 | 316800 |
| Նորք-Մարաշ | 235200 | 293900 | 288900 |
| Ավան | 227800 | 282600 | 276100 |
| Էրեբունի | 230600 | 285800 | 281600 |
| Շենգավիթ | 253300 | 290000 | 287200 |
| Դավթաշեն | 254100 | 308000 | 301200 |
| Աջափնյակ | 245700 | 291200 | 289000 |
| Մալաթիա-Սեբաստիա | 232500 | 278400 | 275900 |
| Նուբարաշեն | 128400 | 161700 | 159900 |
| Միջինը Երեւանում (բացի Նոր-Նորքից) | 267300 | 313400 | 308900 |
Մարզերում միջինացված են 200 քմ շինության եւ 1000 քմ տնամերձ մակերեսով անհատական տների գները: Այստեղ միջին գներն ավելացել են 2,9 տոկոսով: Ամենաթանկ անհատական տները Ծաղկաձորում ենՙ 1 քմ-ն 245 հազար դրամ, որտեղ պահպանվում է գների արագ աճի տեմպը: Երկրորդը Աբովյանն է, որտեղ 1 քմ-ն կազմել է 189 հազար դրամ: Երրորդը Վաղարշապատն էՙ 1 քմ-ն 176 հազար դրամ, այնուհետեւ Աշտարակըՙ 143 հազար դրամ, Մասիսըՙ 138 հազար դրամ, Նոր Հաճընըՙ 136 հազար դրամ:
Այսպիսով, կարող ենք արձանագրել, որ հուլիսին անշարժ գույքի շուկայում պահպանվում եւ կայունանում է գործարքների քանակի ավելացման վերջին երկու ամիսներին վերականգնված միտումը:
ԱՐԱ ՄԱՐՏԻՐՈՍՅԱՆ