Սեպտեմբերի 7-ին Գարեգին Բ ամենայն հայոց կաթողիկոսը շքախմբի ուղեկցությամբ մեկնեց Նոր Նախիջեւանի եւ Ռուսաստանի թեմ, ուր Ռոստովի մարզում հանդիսապետեց Մյասնիկյանի շրջանի Մեծ Սալա գյուղի Ս. Աստվածածին եւ Դոնի Ռոստով քաղաքի Ս. Խաչ հայկական եկեղեցիների օծման արարողությունները: Հայոց հայրապետը բարերար հայորդիներ Ալբերտ Սամուրգաշեւին, Անդրեյ Նոր-Արեւյանին եւ Վլադիմիր Պոպովյանին` ի գնահատություն եկեղեցու վերանորոգմանը բերած իրենց օժանդակության, Հայրապետական սրբատառ կոնդակով շնորհեց Հայ եկեղեցու` Սուրբ Ներսես Շնորհալի պատվո բարձր շքանշան:
Այնուհետեւ Վեհափառ հայրապետն ուղեւորվեց Դոնի Ռոստով, ուր օծեց Ս. Խաչ եկեղեցին: Նորին սրբությունը նաեւ հայրապետական իր օրհնությունը բերեց արարողությանը ներկա ՌԴ Ռոստովի մարզի նահանգապետ Վլադիմիր Չուբին: Ի նշան գնահատանքի Հայ եկեղեցուն, մեր երկրին ու ժողովրդին մատուցած օգտաշատ ծառայությունների եւ հայ հոգեւոր ու մշակութային ժառանգության հանդեպ հոգածու վերաբերմունքի, Վեհափառը նրան շնորհեց «Ս. Սահակ-Ս. Մեսրոպ» պատվո բարձր շքանշան:
Ս. Մ.