Ֆուտբոլի պատմության եւ վիճակագրության միջազգային ֆեդերացիան հրապարակել է աշխարհի ուժեղագույն 350 ակումբների հերթական ցանկը: Արդեն 2-րդ ամիսն է, ինչ ցուցակում բացակայում են Հայաստանի թիմերը: Իսկ ցուցակը հավասար միավորներով գլխավորում են «Մանչեսթր Յունայթեդն» ու «Չելսին»: Չեմպիոնների գավաթակիրն աշխարհի ուժեղագույն ակումբն է ապրիլից սկսած: Ի դեպ, ցուցակի առաջատարի դերում «Մանչեսթր Յունայթեդը» փոխարինել էր «Չելսիին», որը փետրվար-մարտ ամիսներին գլխավորում էր դասակարգման ցուցակը:
Ընդհանուր առմամբ «Մանչեսթր Յունայթեդը» 21 ամիս է գլխավորել ուժեղագույն ակումբների ցուցակը: Սա 2-րդ ցուցանիշն է: Իսկ առավել հաճախ` 37 անգամ լավագույնն է ճանաչվել «Միլանը»: Մինչ օրս 23 թիմերի է հաջողվել գլխավորել ուժեղագույն ակումբների ցանկը:
Լավագույն տասնյակում նախորդ ամսվա համեմատ միայն մեկ փոփոխություն է կատարվել: «Լիոնի» փոխարեն տասնյակում ընդգրկվել է «Ինտերը»: Նախկին ԽՍՀՄ հանրապետությունների թիմերից լավագույն արդյունքն ունի ՌԴ չեմպիոն Սանկտ Պետերբուրգի «Զենիթը», որը նախորդ ամսվա 27-րդ տեղից նահանջել է 39-րդ հորիզոնական: Իսկ ահա Կիեւի «Դինամոն» 10 տեղով բարձրացել է ու զբաղեցնում է 46-րդ տեղը: 100 ուժեղագույն ակումբների ցանկում տեղ են զբաղեցրել նաեւ Դոնեցկի «Շախտյորը» (60-րդ տեղ), Տաշքենդի «Բունեդկորը» (75-րդ տեղ), Մոսկվայի «Սպարտակն» (84-րդ տեղ) ու Բելառուսի չեմպիոն ԲԱՏԷ-ն (87-րդ տեղ): Ներկայացնում ենք լավագույն տասնյակի ցուցանիշները:
| 1. «Մանչեսթր Յունայթեդ» | Անգլիա | 267 |
| 2. «Չելսի» | Անգլիա | 267 |
| 3. «Բարսելոն» | Իսպանիա | 259 |
| 4. «Բոկա Խունիորս» | Արգենտինա | 244 |
| 5. «Լիվերպուլ» | Անգլիա | 241 |
| 6. «Բավարիա» | Գերմանիա | 238 |
| 7. «Ինտեր» | Իտալիա | 234 |
| 8. «Ֆիորենտինա» | Իտալիա | 234 |
| 9. «Ռոմա» | Իտալիա | 228 |
| 10. «Լիոն» | Ֆրանսիա | 225 |
ԱՇՈՏ ՀԱՅՐԱՊԵՏՅԱՆ