«Առկա» լրատվական գործակալությունը երեկ գործարկեց նոր նախագիծՙ www.telecom.arka.am-ը: Այն հավակնում է դառնալ Հայաստանի ինտերնետ պարբերականը, որը կլուսաբանի հեռահաղորդակցության եւ տեղեկատվական տեխնոլոգիաների ոլորտի իրադարձությունները, կհրապարակի ոլորտին առնչվող վերլուծական նյութեր, հարցազրույցներ, կներկայացնի մասնագիտական տեսակետներ:
«Մենք շատ կցանկանայինք, որ նոր արտադրանքը պահանջված լինի մեր տեղեկատվական տարածքում եւ նպաստի Հայաստանի տեղեկատվական հասարակության զարգացմանը», «Նովոստի» մամուլի կենտրոնում տեղի ունեցած նախագծի շնորհանդեսի ժամանակ ասաց «Առկա» լրատվական գործակալության տնօրեն Կոնստանտին Պետրոսովը :
Նոր կայքիՙ www.telecom.arka.am-ի բացման կապակցությամբ շնորհավորական խոսք ասացին ոլորտը ներկայացնող կառույցների ղեկավարներըՙ Ինֆորմացիոն տեխնոլոգիաների ձեռնարկությունների միության նախագահ Կարեն Վարդանյանը , «Մայքրոսոֆտ Ար Էյ» ընկերության տնօրեն Գրիգոր Բարսեղյանը եւ Ձեռնարկությունների ինկուբատոր հիմնադրամի տնօրեն Բագրատ Ենգիբարյանը :
Ա. Մ.