«ԱԶԳ» ՕՐԱԹԵՐԹ

ՀԱՅ ՇԱԽՄԱՏԻՍՏՆԵՐԸ ՄՈՏ ԵՆ ՀԱՋՈՂՈՒԹՅԱՆԸ

Իսրայելցիները խառնեցին բոլորի խաղաքարտերը

Դրեզդենում ընթացող շախմատի համաշխարհային օլիմպիադայի ավարտից մեկ տուր առաջ բավական հետաքրքրական իրավիճակ է ստեղծվել չեմպիոնի կոչման համար մղվող պայքարում: Տղամարդկանց մրցաշարում Հայաստանի եւ Ուկրաինայի հավաքականները 17-ական միավորով գլխավորում են աղյուսակը եւ այսօր կայանալիք ավարտական տուրում պետք է որոշեն չեմպիոնին: Հայ շախմատիստները մրցելու են Չինաստանի հավաքականի հետ եւ հաղթանակի դեպքում կկրկնեն թուրինյան օլիմպիադայի հաջողությունըՙ անկախ Ուկրաինա-ԱՄՆ մրցախաղի արդյունքից: Հուսանք, որ Հայաստանի հավաքականը հաջողությամբ կեզրափակի մրցաշարը եւ կրկին կնվաճի օլիմպիադայի չեմպիոնի տիտղոսը:

8-րդ տուրում ֆրանսիացիներին հաղթելուց հետո թվում էր, թե մեր շախմատիստների համար այլեւս ոչ մի խոչընդոտ չի լինի ոսկե մեդալների նվաճման հարցում: Սակայն 9-րդ տուրում հայ շախմատիստներն անսպասելիորեն զիջեցին իսրայելցիներին (1,5-2,5): Լեւոն Արոնյանը զիջեց Բորիս Գելֆանդին, Տիգրան Պետրոսյանն էլ պարտվեց Մաքսիմ Ռոդշտեյնին: Մեր հավաքականում լավագույն արդյունքն ունեցող Գաբրիել Սարգսյանը կրկին իրեն գերազանց դրսեւորեցՙ հաղթելով Բորիս Ավրուկին: Ամեն ինչ պետք է որոշեր Վլադիմիր Հակոբյանի եւ Միխայիլ Ռոյզի մրցավեճը, որը բոլորից ուշ ավարտվեց: Հայ գրոսմայստերին չհաջողվեց առավելության հասնել մրցակցի նկատմամբ: Գրանցվեց ոչ-ոքի եւ Հայաստանի հավաքականն առաջին պարտությունը կրելով, առաջատարի դիրքը զիջեց Իսրայելի շախմատիստներին:

Բարեբախտաբար, Իսրայելի հավաքականը 10-րդ տուրում պարտություն կրեց ուկրաինացիներից (1,5-2,5), իսկ հայ շախմատիստները կրկին վստահ հաղթանակ տոնեցինՙ 3-1 հաշվով պարտության մատնելով Սերբիայի ընտրանուն: Այս անգամ հաջող խաղացին թիմի առաջատարներ Լեւոն Արոնյանն ու Վլադիմիր Հակոբյանը, որոնք հաղթեցին համապատասխանաբար Իվան Իվանիշեւիչին ու Դրագան Սոլակին: Իսկ Սարգսյան-Պերունովիչ, Պետրոսյան-Վուչկովիչ պարտիաներն ավարտվեցին ոչ-ոքի:

10-րդ տուրի մյուս կարեւոր հանդիպումներում գրանցվեցին հետեւյալ արդյունքները. Գերմանիա-1-ԱՄՆՙ 1,5-2,5, Անգլիա-Չինաստանՙ 1,5-2,5, Սլովենիա-Ռուսաստանՙ 0,5-3,5, Իսպանիա-Բուլղարիաՙ 3-1, Հոլանդիա-Լեհաստանՙ 2,5-1,5, Սլովակիա-Ֆրանսիաՙ 1-3: Մրցանակային տեղերի համար պայքարում 11-րդ տուրում որոշիչ կլինեն Հայաստան-Չինաստան, ԱՄՆ-Ուկրաինա, Իսրայել-Հոլանդիա, Ռուսաստան-Իսպանիա, Ֆրանսիա-Ադրբեջան, Վիետնամ-Սերբիա, Հունգարիա-Բելառուս, Վրաստան-Ռումինիա, Խորվաթիա-Անգլիա մրցախաղերը:

Ավարտական տուրից առաջ տղամարդկանց մրցաշարի առաջատարների ցուցանիշներն այսպիսին են (փակագծում նշված է ընդհանուր պարտիաներում վաստակած միավորների քանակը):

Կանանց մրցապայքարում եւս բավական հետաքրքրական իրավիճակ է ստեղծվել: Հայաստանի հավաքականը 14 միավորով 8-րդ տեղում է: Մեր շախմատիստուհիները երկու անընդմեջ հաղթանակ էին տոնել Ադրբեջանի (4-0) եւ Արգենտինայի (3,5-0,5) հավաքականների նկատմամբ եւ լավ հնարավորություն էին ստացել պայքարելու մրցանակային տեղերի համար, եթե 10-րդ տուրում առավելության հասնեին նաեւ լեհերի նկատմամբ: Ցավոք, չստացվեց: Մերոնք զիջեցին 1,5-2,5 հաշվով: Միակ հաղթանակը մեր թիմին պարգեւեց Լիլիթ Մկրտչյանըՙ պարտության մատնելով Իվետա Ռայլիխին: Էլինա Դանիելյանը ոչ-ոքի խաղաց Մոնիկա Սոչկոյի հետ, իսկ ահա Նելլի Աղինյանն ու Լիլիթ Գալոյանը պարտվեցին համապատասխանաբար Էոլանտա Զավադսկայային ու Յոհաննա Մայդանին: Վերջին տուրում ՀՀ հավաքականը կմրցի Հնդկաստանի հավաքականի հետ:

Այդ հաղթանակի շնորհիվ լեհերը 17 միավորով միանձնյա գլխավորեցին աղյուսակը: Ավարտական տուրում լեհերը ուժերը կչափեն ուկրաինացիների հետ: Վճռորոշ կլինեն նաեւ Վրաստան-Սերբիա, ԱՄՆ-Ֆրանսիա, Հոլանդիա-Ռուսաստան, Ռումինիա-Չինաստան մրցախաղերը: 10-րդ տուրում մրցանակային տեղերի համար պայքարող հավաքականների մասնակցությամբ հանդիպումներում գրանցվել են հետեւյալ արդյունքները. Սերբիա-Ուկրաինաՙ 2-2, Չինաստան-Վրաստանՙ 1,5-2,5, Ուզբեկստան-ԱՄՆՙ 0,5-3,5, Ռուսաստան-Հունգարիաՙ 3-1, Ֆրանսիա-Ադրբեջանՙ 3-1, Սլովենիա-Հնդկաստանՙ 1-3:

Կանանց մրցապայքարում առաջատարների ցուցանիշներն այսպիսին են:

Եվ այսպես, այսօր Դրեզդենում վերջնագիծը կհատի շախմատի համաշխարհային 38-րդ օլիմպիադանՙ ի հայտ բերելով չեմպիոններին ու մյուս մրցանակակիրներին: Ավարտական տուրի մրցախաղերը կսկսվեն սովորականից 5 ժամ շուտՙ Երեւանի ժամանակով ժամը 13-ին: Ի դեպ, այս օրերին Դրեզդենում է գտնվում նաեւ IBF-ի վարկածով միջին քաշում աշխարհի չեմպիոն Արթուր Աբրահամը (տեսՙ նկարը), որն իր ներկայությամբ փորձում է աջակցել ու ոգեւորել մեր շախմատիստներին:

ԱՇՈՏ ՀԱՅՐԱՊԵՏՅԱՆ