Վլադիմիր Սպիվակովն ու «Մոսկվայի վիրտուոզներ» նվագախումբը Հայաստանում են: Երեկ նրանք հանդես են եկել Արամ Խաչատրյանի անվան մեծ համերգասրահում` Հայաստանի մշակույթի վաստակավոր գործիչ, պրոֆեսոր, փայլուն ջութակահար Զարեհ Սահակյանցի 75-ամյակին նվիրված համերգով: Նույն սրահում դեկտեմբերի 6-ին «Մոսկվայի վիրտուոզների» համերգը նվիրված կլինի Սպիտակի երկրաշարժի 20-րդ տարելիցին. կհնչի Մոցարտի «Ռեքվիեմը»: Գյումրիում «Մոսկվայի վիրտուոզները» համերգով հանդես կգան դեկտեմբերի 4-ին:
«Արմենտել» ընկերությունը եւ «ՎՏԲ-Հայաստան Բանկը» նվագախմբի հայաստանյան համերգաշարի գլխավոր հովանավորներն են:
«Մենք հպարտանում ենք, որ մեր աջակցության շնորհիվ հայ հանդիսատեսը կարող է նորից վայելել այդքան սիրված «Մոսկվայի վիրտուոզների» արվեստը: Գյումրիի համերգի կազմակերպմանն օժանդակելը տուրք է աղետի զոհերի հիշատակին, միաժամանակ, մեր երախտագիտության արտահայտումը Վլադիմիր Սպիվակովին` 1988 թվականի երկրաշարժից տուժածներին ուղղված նրա բազմամյա բարեգործական գործունեության համար», ասել է «Արմենտելի» գլխավոր տնօրենՆեյչո Վելիչկովը:
«ՎՏԲ-Հայաստան Բանկի» գլխավոր տնօրեն, տնօրենության ղեկավարՎալերի Օվսյաննիկովնէլ վստահեցրել է. «ՎՏԲ-Հայաստան Բանկը» բազմիցս աջակցել է Հայաստանում ռուսաստանյան մշակույթի գործիչների համերգներին: Սակայն այս դեպքը հատուկ է: Վլադիմիր Սպիվակովն առաջիններից մեկը օգնության ձեռք մեկնեց Հայաստանին, որը Սպիտակի ավերիչ երկրաշարժի հետեւանքով հսկայական կորուստներ էր կրել: Այսօր` 20 տարի անց, այդ մեծ երաժիշտը եւ մարդը կրկին կանգնած է Հայաստանի ժողովրդի կողքին, եւ մենք հիացած նրա տաղանդով, նրան մեր մեծագույն երախտագիտությունն ենք հայտնում անշահախնդիր օգնության եւ մեծահոգության համար»:
Վլադիմիր Սպիվակովի եւ «Մոսկվայի վիրտուոզներ» նվագախմբի համերգները կազմակերպել են Հայաստանի մշակույթի նախարարությունն ու Երեւանի Կոմիտասի անվան կամերային երաժշտության տունը:
Ն. Պ.