Երեւանի Ավան համայնքի թիվ 170 դպրոցի բակը բազմամարդ էր. Վարազդատ Համբարձումյանի ձեռքով կերտված հերթական խաչքարն էր տեղադրվում դպրոցի բակում: Խաչքարի բացումն ուղեկցվեց ռազմագիտության դասարանի անվանակոչությամբ` ազատամարտիկ Մարատ Մխիթարյանի անվամբ:
«Ազատամարտիկ» ռազմահայրենասիրական բարեգործական կազմակերպության նախաձեռնությամբ եւ «Վիվասել» ընկերության գլխավոր տնօրեն Ռալֆ Յիրիկյանի հովանավորությամբ արցախյան հերոսամարտի մասնակիցների հիշատակի ու այդ անօրինակ հերոսական պայքարի հավերժացման մի նոր ներդրում էլ խաչքար-հուշակոթողն էր, որ բացվեց թիվ 170 դպրոցի բակում` հոգեւոր օրհնությամբ, բազմաթիվ հյուրերի, նաեւ Ավանի թաղապետի մասնակցությամբ:
2003 թվականին հիմնված «Ազատամարտիկ» կազմակերպության վարչության նախագահ Հայկ Հարությունյանի խոսքերով, կազմակերպությունը նախաձեռնել է խաչքարերի տեղադրումը` դպրոցներում ռազմահայրենասիրական ոգին բարձրացնելու նպատակով: Ավելի քան 70 խաչքար կտեղադրվի տարբեր դպրոցների բակերում:
Ա. Հ.