Դեկտեմբերի 17-18-ը Երեւանի Կենտրոն համայնքի 26 դպրոցի 104 աշակերտ շախմատի տանը մրցել են Հայաստանի դպրոցականների շախմատի 3-րդ օլիմպիադայի հաղթողի տիտղոսի համար: Երկօրյա մրցաշարը Կենտրոն համայնքի դպրոցների միջեւ օլիմպիադայի երկրորդ փուլն է: Հաղթող է ճանաչվել Չեխովի անվան թիվ 55 դպրոցի թիմը, որն էլ պայքարը կշարունակի 3-րդ փուլում եւ կներկայացնի Երեւանի Կենտրոն համայնքը:
Հայաստանի դպրոցականների շախմատի 3-րդ օլիմպիադայի կազմակերպմանն ու անցկացմանը աջակցել է Հայկական բարեգործական ընդհանուր միությունը: Առաջին փուլում ՀԲԸՄ-ն 2000 շախմատի տախտակ ու դրանց համապատասխան քարեր է նվիրել Հայաստանի բոլոր մարզերի ու ԼՂՀ-ի շուրջ 800 դպրոցներին: Եզրափակիչ փուլի հաղթողներին ՀԲԸՄ-ն կպարգեւատրի համակարգիչներով:
Արդեն երկրորդ տարին է Հայկական բարեգործական ընդհանուր միությունը հովանավորում է Հայաստանի դպրոցականների շախմատի օլիմպիադան: Այս տարի եւս ՀԲԸՄ-ն պայմանագիր է կնքել ՀՀ գիտության եւ կրթության նախարարության ու շախմատի ֆեդերացիայի հետ 2008-2009 ուսումնական տարում նվիրաբերության վերաբերյալ:
Ա. Բ.