Գալիք տարում «Ազգը» որոշել է իր ինտերնետային ընթերցողներին նոր անակնկալ մատուցել եւ ներկայանալ նոր դեմքով, այսինքնՙ www.archive.azg.am կայքէջով մեր թերթի ամենօրյա ընթերցողները այն կտեսնեն դիզայներական նոր լուծումով եւ ծրագրային նոր հնարավորություններով: Մենք հուսով ենք, որ մեր ամենօրյա ընթերցողներն այն կհավանեն եւ կայքը կօգտագործեն ոչ միայն հոդվածներ, վերլուծություններ եւ լուրեր ընթերցելու համար, այլ նաեւ կօգտվեն նոր ծառայություններից, որոնք կառաջարկի թերթի ինտերնետայաին տարբերակը: Կայքը հնարավորություն կտա տեսնելու եւ վերջապես ծանոթանալու մեր թերթում աշխատող բազմաթիվ լրագրողների հետ, ինչպես նաեւ հնարավորություն կտա ուղիղ կապ հաստատել թե՛ հոդվածագրերի եւ թե՛ խմբագրի հետ: Այսինքնՙ հետադարձ կապը ընթերցողի հետ, ինչը շատ կարեւոր է մեր թերթի համար, կգործի լիարժեք կերպով:
Նախատեսված է, որ հետագայում «Ազգի» մշտական ընթերցողները կարող են գրանցվել մեր կայքում, ինչը նրանց հնարավորություն կտա ավելի լայն կերպով օգտվել կայքի նորամուծություններից: Նշենք, որ թերթի լրագրողները կունենան իրենց կայքերը` բլոգները, որտեղ կհրատարակեն հոդվածները եւ ընթերցողները հնարավորություն կունենան իրենց կարծիքը հայտնել եւ քննարկում կազմակերպել առաջարկված հարցի շուրջ:
«Ազգի» կայքէջը մատչելի կլինի նաեւ բջջային հեռախոսների միջոցով, որեւէ մեկը WAP ռեժիմով կկարողանա ընթերցել թերթի հոդվածները եւ նույնիսկ ծանոթանալ նորությունների ու «Զվարթնոց» օդանավակայանի չվերթերի ժամանակացույցին:
Ինչեւէ, «Ազգը» շարունակում է փոփոխվել եւ հաճելի անակնկալներ մատուցել իր ընթերցողներին, նաեւ իր շնորհակալությունն է հայտնում «Արմինկո» ընկերությանը, որը 8 տարի շարունակ մեր գործընկեր-պրովայդերն է:
ԱՐՄԵՆ ՄԱՆՎԵԼՅԱՆ