Ֆրանսիայի Լիմոժ քաղաքում հունվարի 23-ին մեկնարկել է Հայկական մշակութային միամսյակը: Համաձայն ՀՀ արտգործնախարարության մամուլի վարչության տեղեկությունների, այն սկսվել է Լիմոժի քաղաքային գրադարանի ընդարձակ սրահում բացված «Հայաստան. քրիստոնյա երկիր Կովկասում» ցուցահանդեսով, որին ներկա էին Լիմուզինի շրջանային խորհրդի եւ Լիմոժի քաղաքային խորհրդի ղեկավարներ, պատգամավորներ, քաղաքապետեր, տեղական հասարակության հարյուրավոր ներկայացուցիչներ: Հայկական մշակութային միամսյակի բացման հանդիսավոր արարողությունն սկսվել է Լիմոժի կոնսերվատորիայի պատանի սաների կատարմամբ հնչած Հայաստանի օրհներգով եւ Կոմիտասի ստեղծագործություններով: Ողջույնի ելույթներ են ունեցել Ֆրանսիայի ԱԺ պատգամավոր, Լիմոժի առաջին փոխքաղաքապետ տիկին Մոնիկ Բուլեստենը եւ Հայաստանի դեսպանության ժամանակավոր հավատարմատար Համլետ Գասպարյանը: Ցուցահանդեսը հին ու ժամանակակից քարտեզների, գեղարվեստական ու կիրառական իրերի, արխիվային ու նոր լուսանկարների, հնատիպ հրատարակությունների եւ նոր ժամանակների մասին պատմող նյութերով ներկայացնում է Հայաստանի անցյալն ու ներկան, այնտեղ բնակվող մարդկանց` հայերի ու ազգային փոքրամասնությունների առօրյան: Հայկական մշակութային միամսյակն ընդգրկում է դասական ու ժամանակակից երաժշտության համերգներ, ասմունք, հայկական թեմաներով ֆրանսիական գեղարվեստական ու վավերագրական ֆիլմերի ցուցադրություններ, Հայաստանի, հայ ժողովրդի մասին բանախոսություններ եւ կլոր սեղաններ: Այն տեւելու է մինչեւ փետրվարի 28-ը:
Միամսյակը կազմակերպվել է Լիմոժի քաղաքային իշխանությունների աջակցությամբ եւ «Կովկաս-Հայաստան պլյուս» հասարակական կազմակերպության ջանքերով: Մոտ 140 հազար բնակիչ ունեցող Լիմոժը Լիմուզին շրջանի վարչական կենտրոնն է, որը հայտնի է համաշխարհային հռչակ ունեցող իր հախճապակիով: Լիմոժում թեեւ գրեթե հայեր չկան, սակայն վերջին տարիներին տեղի հասարակությունը, համալսարանական եւ ուսանողական շրջանակները, ինչպես նաեւ ագրարային սեկտորը սկսել են հետաքրքրություն ցուցաբերել Հայաստանի նկատմամբ: Կազմակերպվում են ճանաչողական ուղեւորություններ, իրականացվումՙ հիդրոէներգետիկայի, անասնաբուծության ու ձկնաբուծության բնագավառներում փոքր ծրագրեր:
Ն. Պ.