Անցած մրցաշրջանում Կապանի «Գանձասարը» հաջող մրցելույթներ ունեցավ: Թիմն իր պատմության մեջ առաջին անգամ դարձավ Հայաստանի առաջնությունների մրցանակակիր` նվաճելով բրոնզե մեդալները: 2009-ը «Գանձասարի» համար պատասխանատու տարի է: Կապանցիներն այս տարի իրենց նորամուտն են նշելու Եվրոպայի լիգայի մրցաշարում եւ նպատակադրվել են նվազագույնը հաղթահարել առաջին փուլի արգելքը: Իսկ Հայաստանի առաջնությունում «Գանձասարը» խնդիր է դրել պահպանել նվաճած դիրքերն ու կրկին տեղ զբաղեցնել մրցանակային եռյակում:
Այս ամենը հաշվի առնելով, «Գանձասարը» գլխավոր մարզիչ Սամվել Պետրոսյանի գլխավորությամբ լրջորեն է նախապատրաստվում նոր մրցաշրջանին` համալրելով թիմի կազմը: Ինչպես եւ նախորդ տարի, այս անգամ էլ «Գանձասարը» տրանսֆերային ակտիվ գործունեություն է ծավալել` թիմ հրավիրելով լեգեոնականների, որոնք կփոխարինեն ակումբին հրաժեշտ տված Գագա Թբիլաշվիլուն, Արտակ Օսեյանին, Մամուկա Մենթեսաշվիլուն, Կոբա Խանիշվիլուն ու Կոնստանտին Բիրսանին: Նոր մրցաշրջանում «Գանձասարի» մարզաշապիկը կկրեն սերբ ֆուտբոլիստներ Վլադ Ռադանովիչը, Վլադիմիր Լուկիչը, Դրագան Գալիչը, Չեռնոգորիայի ներկայացուցիչ Միլան Կրիվոկապիչը, ինչպես նաեւ վրացի ֆուտբոլիստ Միխայիլ Թակաձեն: «Արարատից» «Գանձասար» է տեղափոխվել Արտաշես Անտոնյանը: Չնայած դրան, թիմի համալրման գործընթացը դեռեւս չի ավարտվել: Սպասվում է, որ շուտով թիմին կմիանան նաեւ բրազիլացի երկու ֆուտբոլիստներ:
Նոր մրցաշրջանի նախապատրաստությունը «Գանձասարը» սկսեց դեկտեմբերի վերջին: Այնուհետեւ թիմն ուսումնամարզական հավաք անցկացրեց Ծաղկաձորում, որի նպատակը ֆուտբոլիստների ֆիզիկական որակների բարելավումն էր: Այս օրերին կապանցիները մարզումները շարունակում են Երեւանում` օրական երկու պարապմունք անցկացնելով: Թիմը նախապատրաստվում է շուտով մեկնարկելիք «Թուրքմենբաշիի գավաթի» խաղարկությանը: Ինչ խոսք, այդ մրցաշարը կապանցիների համար ուժերի լավ ստուգատես կլինի, հնարավորություն կընձեռի մարզիչներին ծանոթանալու ֆուտբոլիստների խաղային որակներին: Աշգաբադից «Գանձասարը» մեկնելու է Անթալիա` հերթական ուսումնամարզական հավաքի: Մինչեւ մարտի 14-ը Անթալիայում մարզվելուն զուգահեռ թիմն ուժերը կփորձարկի ստուգողական հանդիպումներում: Իսկ մարտի 17-ից «Գանձասարը» կներգրավվի Հայաստանի գավաթի խաղարկությունում:
ԱՇՈՏ ՀԱՅՐԱՊԵՏՅԱՆ