Երեկ ՀՀ պաշտպանության նախարար Սեյրան Օհանյանը հանդիպել է ԶՈւ ԳՇ անձնակազմի հետ տարվող աշխատանքների, ՊՆ ռազմարդյունաբերության, կադրերի եւ ռազմական կրթության եւ ՊՆ տեղեկատվության վարչությունների, ինչպես նաեւ ՊՆ մամլո ծառայության եւ «Հայ զինվոր» թերթի խմբագրության անձնակազմերի հետ:
Ս. Օհանյանը անձնակազմերին ներկայացրել է պաշտպանության նախարարության համակարգում ընթացող բարեփոխումների շրջանակներում կատարված նոր նշանակումները: ՀՀ ՊՆ տեղեկատվության եւ հասարակայնության հետ կապերի վարչության պետ է նշանակվել գեներալ-մայոր Վ. Ավետիսյանը, ՀՀ ՊՆ կադրերի եւ ռազմական կրթության վարչության պետ է նշանակվել գնդապետ Մ. Կարապետյանը, ՀՀ ՊՆ ռազմարդյունաբերության վարչության պետ է նշանակվել գնդապետ Մ. Իսախանյանը, իսկ ՀՀ ԶՈՒ ԳՇ անձնակազմի հետ տարվող աշխատանքների վարչության պետ է նշանակվել գնդապետ Ա. Ալեքսանյանը:
Ս. Օհանյանը շնորհակալություն է հայտնել ՊՆ տեղեկատվության վարչության նախկին պետ, գնդապետ Վ. Իսրայելյանին այդ պաշտոնում կատարած աշխատանքների համար` ընդգծելով բանակաշինության գործում նրա ունեցած ավանդը:
Այնուհետեւ նախարարն անդրադարձել է վերոնշյալ ստորաբաժանումների հետագա գործունեությանը` կարեւորելով կադրային լուրջ քաղաքականության իրականացումը զինված ուժերում, ինչպես նաեւ համակարգի` հասարակայնության հետ կապերի ապահովումը եւ վերջինիս իրազեկումը պաշտպանության բնագավառում իրականացվող գործընթացների վերաբերյալ:
Ն. Մ.