Սակայն հունվարի համեմատ գործարքների քանակն ավելացել է
2009-ի փետրվարին, համաձայն անշարժ գույքի կադաստրի պետական կոմիտեիՙ շուկայի այդ ամսվա վերլուծության տվյալների, Հայաստանի անշարժ գույքի շուկայում իրականացվել է 10291 գործարք, ինչը 41,4 տոկոսով ավելի է 2009-ի հունվարին կատարված գործարքներից եւ 19,4 տոկոսով պակաս` 2008-ի փետրվարին կատարվածներից: 2752 օտարման գործարքներից առուվաճառքներինը եղել է 72,1 տոկոսը, իսկ մնացածը նվիրատվություններն ու փոխանակություններն են: 2009-ի հունվարի համեմատ անշարժ գույքի օտարման գործարքների քանակն աճել է 21,4 տոկոսով, իսկ անցյալ տարվա փետրվարի համեմատ նվազել 38,9 տոկոսով:
Մայրաքաղաքում առուվաճառքի գործարքների 65,6 տոկոսն արձանագրվել է բազմաբնակարան շենքերի բնակարանների նկատմամբ: Փետրվարին, 2009-ի հունվարի համեմատ, բնակարանների առուվաճառքի գործարքների քանակը Երեւանում աճել է 48 տոկոսով, իսկ նախորդ տարվա փետրվարի համեմատ` 43,9 տոկոսով:
Բնակարանների շուկայական միջին գները փետրվարին, հունվարի համեմատ նվազել են 4,9 տոկոսով: Ըստ համայնքների, Երեւանում բնակարանների 1 քմ մակերեսի միջին շուկայական գները այսպիսին են եղել.
| Համայնքներ (դրամ) | Միջին գները փետրվար 2008թ. | փետրվար 2009թ. | հունվար 2009թ. |
| Կենտրոն | 476100 | 482300 | 499800 |
| Արաբկիր | 387800 | 344400 | 362100 |
| Քանաքեռ-Զեյթուն | 299200 | 270200 | 282300 |
| Նոր Նորք | 259400 | 241200 | 254300 |
| Ավան | 262100 | 241800 | 259100 |
| Էրեբունի | 261500 | 256600 | 270200 |
| Շենգավիթ | 270700 | 237300 | 260500 |
| Դավիթաշեն | 278300 | 268400 | 288200 |
| Աջափնյակ | 263100 | 238700 | 246200 |
| Մալաթիա-Սեբաստիա | 256000 | 230600 | 238100 |
| Նուբարաշեն | 146700 | 148000 | 152600 |
| Միջինը Երեւանում (բացի Նորք-Մարաշից) | 287400 | 269000 | 283000 |
Աղյուսակից երեւում է, որ առանց բացառության Երեւանի բոլոր համայնքներում գները նվազել են: Երեւանի բնակարանների 1 քմ-ի միջին գինը նվազելով, փետրվարին կազմել է 269 հազար դրամ:
Մարզերում, բացառությամբ Երեւանի, վաճառվել են 257 բնակարաններ, որոնց քանակը հունվարի համեմատ աճել է 30,5 տոկոսով, իսկ 2009-ի փետրվարի համեմատ նվազել 40,1 տոկոսով: Միջին գները փետրվարին 2009-ի հունվարի համեմատ նվազել են 3,7 տոկոսով: Երեւանից հետո ամենաթանկ բնակարանները փետրվարին եղել են Ծաղկաձորում, որտեղ 1 քմ գինը կազմել է 172 հազար դրամ: Այդ գինն անփոփոխ է մնացել սկսած նոյեմբեր ամսից: Վաղարշապատում (Էջմիածնում) 1 քմ մակերեսի շուկայական գինը կազմել է ավելի քան 167 հազար դրամՙ նախորդ ամսվա 163 հազար դրամի փոխարեն: Մասիսը երրորդն է` 1 քմ-ն 151 հազար դրամով: Ապա գալիս են Իջեւանը` 1 քմ-ն 150 հազար դրամ ցուցանիշով, Աշտարակը` 135 հազար դրամ, Աբովյանըՙ 134 հազար հազար դրամ եւ Ջերմուկը` 125 հազար դրամ ցուցանիշով: Վերջին երեք քաղաքներում նախորդ ամսվա համեմատ գների կտրուկ անկում է գրանցվել:
Փետրվարին Հայաստանում գրանցվել է անհատական տների առուվաճառքի 304 գործարք, որից 65-ըՙ Երեւանում: Մայրաքաղաքում անհատական տների առուվաճառքի գործարքների քանակը հունվարի համեմատ աճել է 35,4 տոկոսով, իսկ մարզերումՙ 2,1 տոկոսով: 2008-ի փետրվարի համեմատ, անհատական բնակելի տների առուվաճառքի գործարքների քանակը նվազել է 38 տոկոսով, այդ թվում` Երեւանումՙ 38,7 տոկոսով, իսկ մյուս մարզերում միասին վերցրած` 37,8 տոկոսով:
Միջինացվածՙ 250 քմ շինության մակերես եւ 400 քմ տնամերձ ունեցող անհատական տների միջին 1 քմ-ի միջին գները 2009-ի փետրվարին հունվարի համեմատ նվազել են 4,7 տոկոսով: Ըստ համայնքների գներն այսպիսին են եղել.
| Համայնքներ (դրամ) | Միջին գները փետրվար 2008թ. | փետրվար 2009թ. | հունվար 2009թ. |
| Կենտրոն | 486100 | 492000 | 510000 |
| Արաբկիր | 395300 | 400700 | 426700 |
| Քանաքեռ Զեյթուն | 307700 | 304900 | 322900 |
| Նորք-Մարաշ | 266300 | 299100 | 314100 |
| Ավան | 267000 | 277200 | 286200 |
| Էրեբունի | 266600 | 283500 | 291500 |
| Շենգավիթ | 273700 | 276700 | 291900 |
| Դավիթաշեն | 288200 | 310000 | 324500 |
| Աջափնյակ | 268700 | 275700 | 292400 |
| Մալաթիա-Սեբաստիա | 265900 | 272000 | 287200 |
| Նուբարաշեն | 150300 | 162800 | 172300 |
| Միջինը Երեւանում (բացի Նոր Նորքից) | 294200 | 305000 | 320000 |
Մարզերում միջինացված են 200 քմ շինության եւ 1000 քմ տնամերձ մակերեսով անհատական տների գները: Այստեղ միջին գները փետրվարին նվազել են 1,4 տոկոսով: Ամենաթանկ անհատական տները Ծաղկաձորում են, 1 քմ-ն` 276 հազար դրամ: Երկրորդը Աբովյանն է, որտեղ 1 քմ-ն կազմել է 175 հազար դրամ: Երրորդը Վաղարշապատն է, 1 քմ-ն` 174 հազար դրամ, ապա Իջեւանը, Մասիսըՙ 153 հազար դրամ, Աշտարակը` 143 հազար դրամ, Նոր Հաճընըՙ 142 հազար դրամ:
Ինչ վերաբերում է հողի շուկային, ապա 2009-ի փետրվարին, 2008-ի փետրվարի համեմատ, հողերի առուվաճառքի գործարքների քանակը նվազել է 54,8 տոկոսով, աճուրդով վաճառքներինըՙ 83,2 տոկոսով:
Անշարժ գույքի վարձակալության գործարքների քանակը 2009-ի փետրվարին 2009-ի հունվարի համեմատ աճել է 48,3 տոկոսով, իսկ 2008-ի փետրվարի համեմատ` 20,3 տոկոսով:
2009-ի փետրվարին անշարժ գույքի իրականացված 942 գրավադրման գործարքներից ընդամենը 39-ն են եղել հիպոթեկային գրավադրման գործարքները:
Ի՞նչ կարելի է եզրակացնել անշարժ գույքի շուկայում փետրվարին ստեղծված իրավիճակից: Ինչպես եւ նշել էինք հունվարի ցուցանիշները ներկայացնելիս, գների անկման միտումն այստեղ շարունակվում է: Առաջիկա 1-3 ամիսներին հավանական է, որ այդ միտումը նույնՙ ոչ մեծ տեմպերով կշարունակվի: Միաժամանակ հարկ է արձանագրել, որ հունվարի համեմատ փետրվարին գործարքների քանակն էապես աճել է, ինչը, սակայն, զգալիորեն զիջում է նախորդ տարվա փետրվարի ցուցանիշներին: Հարկ է նաեւ նշել, որ եթե հողերի առուվաճառքի քանակը նվազել է, նույնը չի կարելի ասել հիպոթեկային գրավադրման եւ վարձակալության ցուցանիշների համար: Այստեղ գործարքների քանակի զգալի աճ է արձանագրվել: Մի խոսքով, անշարժ գույքի շուկան փորձում է հարմարվել նորՙ միջազգային ֆինանսական ճգնաժամի ազդեցությամբ ստեղծված իրավիճակին:
ԱՐԱ ՄԱՐՏԻՐՈՍՅԱՆ