«ԱԶԳ» ՕՐԱԹԵՐԹ

ԱՐՄԱՆ ՓԱՇԻԿՅԱՆԸ 100 ՈՒԺԵՂԱԳՈՒՅՆՆԵՐԻ ՑԱՆԿՈՒՄ Է

ՖԻԴԵ-ն հրապարակել է ուժեղագույն շախմատիստների դասակարգման հերթական ցուցակը ապրիլի 1-ի դրությամբ: Առաջատարի դիրքը պահպանել է բուլղարացի գրոսմայստեր Վեսելին Թոփալովը, որն իր վարկանիշն ավելացրել է 16-ով եւ հատել 2800-ի սահմանագիծը: Հայ շախմատիստների առաջատար Լեւոն Արոնյանը 4-ով ավելացրել է վարկանիշը եւ 5 հորիզոնականով առաջադիմել էՙ զբաղեցնելով 6-րդ տեղը: Սլովակիան ներկայացնող Սերգեյ Մովսիսյանը 4-ով նվազեցրել է վարկանիշը եւ նահանջել մեկ հորիզոնականովՙ զբաղեցնելով 11-րդ տեղը:

100 ուժեղագույն շախմատիստների թվում ընդգրկված են եւս 3 հայ գրոսմայստերներ: Վլադիմիր Հակոբյանը, որ հունվարին 2700 վարկանիշով 3-րդ տեղում էր, 4-ով նվազեցրել է գործակիցը եւ նահանջել 34-րդ հորիզոնական: Զգալի հետընթաց է ունեցել Գաբրիել Սարգսյանըՙ վարկանիշը նվազեցնելով 17-ով: Դրա հետեւանքով Գաբրիելը 47-րդ հորիզոնականից տեղափոխվեց 63-րդ տեղ: Նրա վարկանիշն այժմ 2660 է: Զգալի առաջընթաց է ունեցել Հայաստանի չեմպիոն Արման Փաշիկյանը, որը 2655 վարկանիշով առաջին անգամ ընդգրկվել է 100 ուժեղագույն շախմատիստների ցանկըՙ զբաղեցնելով 71-րդ հորիզոնականը:

Լավագույն տասնյակում տեղ զբաղեցրած շախմատիստներից Թոփալովից հետո ամենամեծ առաջընթացն ունեցել է Լինարեսում գլխավոր մրցանակին արժանացած Ալեքսանդր Գրիշչուկը: Նա 15-ով ավելացրել է վարկանիշը եւ 14-րդ տեղից տեղափոխվել 10-րդ հորիզոնական: Իսկ ահա ռուսաստանցի Ալեքսանդր Մորոզեւիչը 20-ով իջեցրել է վարկանիշը եւ 5-րդ տեղից նահանջել 8-րդ հորիզոնական: Էլ ավելի մեծ հետընթաց է ունեցել ուկրաինացի Վասիլի Իվանչուկը: Հունվարին նա 2779 վարկանիշով եզրափակում էր լավագույն եռյակը: Իսկ այժմ Իվանչուկը 12-րդ տեղում է 2746 վարկանիշով: Ամենազգալի առաջընթացն ունեցել է ԱՄՆ-ում բնակվող Ալեքսանդր Օնիշչուկը, որը վարկանիշն ավելացրել է 25-ով եւ 65-րդ տեղից տեղափոխվել է 45-րդ հորիզոնական:

Կանանց դասակարգման ցուցակը նախկինի պես գլխավորում է հունգարացի շախմատիստուհի Հուդիթ Պոլգարը, որը նախընտրում է հանդես գալ տղամարդկանց մրցաշարերում: Ինչպես եւ նախորդ ցուցակներում, այս անգամ էլ Հայաստանը 100 ուժեղագույնների ցանկում ներկայացնում են Էլինա Դանիելյանն ու Լիլիթ Մկրտչյանը: Երկուսն էլ վերջին շրջանում հաջող մրցելույթներ ունեցան: Էլինան Ստամբուլում կայացած շախմատի կանանց Գրան պրիի մրցաշարում զբաղեցրել էր 2-րդ տեղը, իսկ Լիլիթը Սանկտ Պետերբուրգում դարձել էր Եվրոպայի փոխչեմպիոնուհի: Բնականաբար, այդ հաջողությունները դրականորեն անդրադարձան նրանց վարկանիշների վրա: Դանիելյանն իր վարկանիշն ավելացրել է 7-ով եւ այժմ 2503 գործակցով 16-րդ հորիզոնականից բարձրացել է 13-րդ տեղ: Լիլիթ Մկրտչյանի առաջընթացն ավելի զգալի է: Նա վարկանիշը ավելացրել է 19-ով (2479) եւ 31-րդ տեղից բարձրացել է 22-րդ հորիզոնական:

Մինչեւ 20 տարեկան երիտասարդ շախմատիստների 20 լավագույնների ցանկում տեղ է զբաղեցրել Զավեն Անդրեասյանը: Նա 2593 վարկանիշով 17-րդ տեղում է: Ցուցակը նախկինի պես գլխավորում է 19-ամյա նորվեգացի գրոսմայստեր Մագնուս Կառլսենը, որն իր վարկանիշով (2770) էլիտար շախմատիստների թվին է դասվում: 2700-ից բարձր գործակից ունի նաեւ 2-րդ տեղը զբաղեցնող ուկրաինացի 19-ամյա գրոսմայստեր Սերգեյ Կարյակինը (2721): Մինչեւ 20 տարեկան աղջիկների ցանկը գլխավորում է չին շախմատիստուհի Հոու Յիֆանը (2590), որին հաջորդում է Սլովենիան ներկայացնող Աննա Մուզիչուկը:

ՖԻԴԵ-ն նաեւ դասակարգում է շախմատային երկրներըՙ հաշվի առնելով տվյալ պետության 10 լավագույն շախմատիստների միջին վարկանիշը: Այդ ցուցանիշով Հայաստանը ՖԻԴԵ-ի անդամ 153 երկրների մեջ զբաղեցնում է 7-րդ հորիզոնականը: Հայաստանի վարկանիշը 2631 է: Հայաստանն այդ ցուցանիշով զիջում է Ռուսաստանին (2724), Ուկրաինային (2692), Չինաստանին (2652), Իսրայելին (2640), Ադրբեջանին (2640) եւ ԱՄՆ-ին (2633): Համեմատության համար նշենք, որ Վրաստանը 2606 վարկանիշով 14-րդ տեղում է:

Ներկայացնում ենք դասակարգման ցուցակի լավագույն տասնյակները:

Տղամարդիկ

Կանայք

ԱՇՈՏ ՀԱՅՐԱՊԵՏՅԱՆ