Վստահեցրեց առողջապահության փոխնախարարը
ՀՀ առողջապահության փոխնախարար Թաթուլ Հակոբյանը հերքեց ֆինանսատնտեսական ճգնաժամի պատճառով պետպատվերի շրջանակներում բուժօգնության 20 տոկոսի կրճատման մասին շրջանառվող լուրերը: Թաթուլ Հակոբյանի խոսքերովՙ ճգնաժամը հնարավորություն է ընձեռել առողջապահական համակարգի բացերն ավելի ակնառու տեսնելու: Նախարարությունում որոշել են պահպանել պետպատվերի ծավալները: Փոխարենը կկրճատեն «վարչական ավելորդ ծախսերը»: «Օրինակՙ դեղերի վրա արվող ծախսերը: Չենք միջամտելու շուկայական հարաբերություններին, բայց միջամտելու ենք դեղերի կարգավորմանը, որպեսզի բժշկական հաստատություններն օգտագործեն ամենամատչելի դեղերը», հավելեց Հակոբյանը: Նա նաեւ նշեց, որ առաջիկա օրերին առողջապահության նախարարությունը բոլոր բուժհաստատություններին մատչելի եւ ճիշտ նշանակված դեղեր օգտագործելու խիստ հանձնարարություն է տալու:
ՀԱՍՄԻԿ ՀԱՐՈՒԹՅՈՒՆՅԱՆ