Ֆուտբոլի պատմության եւ վիճակագրության միջազգային ֆեդերացիան հրապարակել է աշխարհի ուժեղագույն 350 ակումբների ցանկը: Այն հաշվի է առնում թիմերի ցուցանիշները 2008-ի մայիսի 1-ից 2009-ի ապրիլի 30-ն ընկած ժամանակահատվածում ինչպես ազգային առաջնություններում, այնպես էլ միջազգային մրցասպարեզներում:
2008-ի դեկտեմբերից, արդեն 5-րդ ամիսն է, ինչ ուժեղագույն ակումբների ցանկը գլխավորում է չեմպիոնների ներկայիս գավաթակիր «Մանչեսթր Յունայթեդը»: Դասակարգման ցուցակը հրապարակվում է 1991-ից: Ընդհանուր հաշվարկով «Մանչեսթր Յունայթեդն» արդեն 26 անգամ գլխավորել է լավագույնների ցանկը: Այս ցուցանիշով նա 2-րդ տեղում է եւ զիջում է միայն «Միլանին», որը 37 անգամ է ստանձնել առաջատարի դերը: Ընդհանուր առմամբ, 23 թիմերի է հաջողվել գլխավորել 350 ուժեղագույն ակումբների ցանկը: 19-ական անգամ լավագույնն են ճանաչվել «Լիվերպուլը» եւ «Բարսելոնը»: Լավագույն հնգյակը եզրափակում է իսպանական «Սեւիլիան», որին 17 ամիս հաջողվել է գլխավորել ցանկը:
Դասակարգման հերթական ցուցակում Հայաստանը ներկայացնում է միայն երկրի չեմպիոն «Փյունիկը», որը գերազանց է մեկնարկել առաջնությունում` 6 հանդիպումներն էլ ավարտելով հաղթանակով: Հենց դրա շնորհիվ էլ «Փյունիկին» հաջողվել է ընդգրկվել 350 ուժեղագույն ակումբների շարքում: Նախորդ ամսում «Փյունիկը» 356-րդ տեղում էր, իսկ այժմ զբաղեցնում է 295-րդ հորիզոնականը:
Լավագույն տասնյակում որոշակի փոփոխություններ են կատարվել: Նախորդ ամսվա համեմատ տասնյակում տեղ են զբաղեցրել «Համբուրգը» եւ Դոնեցկի «Շախտյորը»: «Չելսին» 5-րդ տեղից տեղափոխվել է 3-րդ հորիզոնական, իսկ նախկինում այդ տեղում ընթացող «Լիվերպուլը» նահանջել է 6-րդ հորիզոնական: Կիեւի «Դինամոն» 10-րդ տեղից բարձրացել է 7-րդ հորիզոնական: «Արսենալը» 8-րդ տեղից երեք հորիզոնականով առաջընթաց է ապրել: Իսկ բրազիլական «Սան Պաուլոն» 7-րդ տեղից նահանջել է 9-րդ հորիզոնական:
Ահա լավագույն տասնյակի ցուցանիշները:
| 1. «Մանչեսթր Յունայթեդ» | 302 |
| 2. «Բարսելոն» | 282 |
| 3. «Չելսի» | 254 |
| 4. «Բոկա Խունիորս» | 253 |
| 5. «Արսենալ» | 245 |
| 6. «Լիվերպուլ» | 240 |
| 7. «Դինամո» Կիեւ | 227 |
| 8. «Համբուրգ» | 226 |
| 9. «Սան Պաուլո» | 223 |
| 10. «Շախտյոր» | 218,5 |
ԱՇՈՏ ՀԱՅՐԱՊԵՏՅԱՆ