Բռնցքամարտի աշխարհի պատանեկան առաջնությունում սկսվել են քառորդ եզրափակիչ հանդիպումները, որոնցում հաղթած բռնցքամարտիկները նվազագույնն իրենց համար ապահովում են բրոնզե մեդալները: Հայաստանի համար առաջին մեդալը նվաճեց թեթեւագույն քաշային կարգում հանդես եկող Կորյուն Սողոմոնյանը: Մինչեւ 46 կգ քաշային բռնցքամարտիկը մրցաշարում իր 3-րդ մենամարտն էլ վստահ անցկացրեց եւ կրկին մեծ առավելության հասավ մրցակցի նկատմամբ (13-1): Նրա մրցակիցը կուբացի Ջիանի Գարսիան էր: Մայիսի 29-ին կայանալիք կիսաեզրափակիչ մրցախաղում Սողոմոնյանն ուժերը կչափի ռուսաստանցի Մագոմեդ Ջաբրահիլովի հետ, որը պայքարից դուրս էր մղել ուկրաինացի Իվան Շտրաչնիին (10-2):
Քառորդ եզրափակիչ մենամարտ անցկացրեց նաեւ 75 կգ քաշային Սամվել Ոսկանյանը: Սակայն նրան չհաջողվեց հաջորդ փուլ մտնել: Սամվելը համառ պայքարում 3-6 հաշվով զիջեց ռուսաստանցի Իդրիս Չակմանովին: Մեծ հետաքրքրությամբ էր սպասվում գերծանրքաշային Գոռ Մարգարյանի եւ ղազախստանցի Արտյոմ Վասիլյոնոկի մենամարտը: Գոռն իրեն հիանալի դրսեւորեց: Նրա առավելությունը մենամարտի ընթացքում ակնհայտ էր, ինչն էլ արտահայտվեց վերջնական հաշվում (15-2): Այսպիսով, Գոռ Մարգարյանը եւս իր համար նվազագույնը բրոնզե մեդալ ապահովեց: Եզրափակիչի ուղեգրի համար պայքարում նա մայիսի 29-ին կմենամարտի ռուսաստանցի Հասան Գիմբատովի հետ, որը քառորդ եզրափակիչում 9-1 հաշվով պարտության էր մատնել հունգարացի Ջենո Վոլգիին:
Հայաստանի 5 բռնցքամարտիկներ եւս մտել էին քառորդ եզրափակիչ եւ երեկ երեկոյան անցկացրին իրենց հանդիպումները, որոնց կանդրադառնանք հաջորդ համարում: 54 կգ քաշային կարգում Ջոնիկ Տոնոյանը նոկաուտով էր ավարտել 1/8 եզրափակիչի հանդիպումը թաիլանդցի Տանավաթ Պինկանի հետ: 60 կգ քաշային կարգում Արթուր Քաջոյանը հաղթել էր լեհ բռնցքամարտիկ Մաթեուս Բացին (5-1): Վոլոդյա Հայրապետյանն էլ մեծ առավելության էր հասել բելառուսցի Մաքսիմ Սիրոտայի նկատմամբ (16-1): 70 կգ քաշային կարգում պայքարը շարունակող Հայկ Խաչատրյանը հաղթել է Ղրղզստանի ներկայացուցիչ Նուրժան Աբդուլաեւին (8-4): Ալեքսան Նազանյանն էլ (80 կգ) համառ պայքարում 4-3 հաշվով պարտության է մատնել իսրայելցի Սաբիհ Զայադին: Անհաջողության մատնվեց Գորիկ Թովմասյանըՙ 1/8 եզրափակիչում զիջելով ուկրաինացի Իգոր Ռոմաշչենկոյին:
ԱՇՈՏ ՀԱՅՐԱՊԵՏՅԱՆ