Այս խորագրի ներքո լրագրող Քրիստին Լաուբենշտայնը «Ուոթերթաուն Թեբ» թերթում (Ուոթերթաուն, Մասաչուսեթս) գրում է «Հարվարդ Բիզնես Ռիվյու» ամսագրի եւ նրա նորանշանակ գլխավոր խմբագրի` Էյդի Իգնեյշըսի (Ադի Իգնատիոս) մասին:
Բիզնեսի կառավարման բնագավառում բարձր հեղինակություն վայելող ամսագիրը ունի 54 աշխատակից: Տպագրվում է 246 հազար օրինակ Մ. Նահանգներում (ներքին սպառման համար): Ունի 71 հազար բաժանորդ արտասահմանում: Տարեկան բաժանորդագրության արժեքն է 112 դոլար: Առանձին համարների արժեքն է 16 դոլար: Հրատարակիչն է Հարվարդի համալսարանի հրատարակչության բիզնեսի բաժինը: Ներկա պայմաններում ամսաթերթը օգտակար եւ գործնական խորհուրդներ է տալիս հատկապես մանրածախ առեւտրի ներկայացուցիչներին, որպեսզի նրանք կարողանան հաղթահարել տնտեսական ճգնաժամը: Խորհուրդներ է տալիս նաեւ միջին ձեռնարկատերերին, որպեսզի առանց աշխատուժի կրճատումների կարողանան դուրս գալ ստեղծված իրավիճակից:
Լրագրողը նշում է, որ գլխավոր խմբագիրը ծնվել է Կալիֆոռնիայում եւ մեծացել Վաշինգտոնում: Հոր կողմից հայկական ծագում ունի: 50 տարեկան է, ամուսնացած է, ունի 3 զավակ: Կինը` Դինդա Էլիոթը «Կոնդի նաստի» խմբագրի տեղակալն է: Բիզնես ամսաթերթի գլխավոր խմբագիր նշանակվելուց առաջ Էյդին «Ուոլ սթրիթ ջոռնըլի» տնտեսության գծով թղթակիցն է եղել Մոսկվայում եւ Չինաստանում: Ներկայացրել է միջազգային կարեւոր դեմքերին, որոնց թվում Վլադիմիր Պուտինին: Հոնկոնգում եղել է Time Asia թերթի խմբագիրը:
«Նա շատ պատրաստակամ է, նվիրված գործին եւ ունի ուրիշներին լսելու հատկություն: Նաեւ հումորի սուր զգացողություն: Լրագրության ասպարեզում նրա հարուստ փորձը անկասկած մեծապես նպաստելու է ամսաթերթի վարկի ոչ միայն պահպանմանը, այլեւ բարձրացմանը», նշել է ամսաթերթի կադրերի բաժնից Քրիստին Ջեկը:
Հոդվածագիրն իր կողմից ավելացնում է, որ Էյդին դեռ չի հասցրել ծանոթանալ Ուոթերթաունին, բայց մտադիր է մոտ ապագայում այցելել հայկական ճաշարաններն ու ռեստորանները:
Հ. Ծ.