Երեկ Կարեն Դեմիրճյանի անվան մարզահամերգային համալիրում սկսվեցին վճռորոշ մենամարտերը եզրափակիչի ուղեգրերի համար: Հիշեցնենք, որ հայ բռնցքամարտիկներից 7-ը մտել էին կիսաեզրափակիչ ու նվազագույնն իրենց համար ապահովել էին բրոնզե մեդալներ:
Կիսաեզրափակիչում հայ բռնցքամարտիկներից առաջինը ռինգ դուրս եկավ Կորյուն Սողոմոնյանը: Դա նրա 4-րդ մենամարտն էր: Կորյունն այս անգամ էլ վստահ անցկացրեց մենամարտ ու 10-4 հաշվով առավելության հասավ ռուսաստանցի Մագոմեդ Ջաբրաիլովի նկատմամբ: Այսօր եզրափակիչ մենամարտում Կորյունն աշխարհի չեմպիոնի տիտղոսը կվիճարկի հնդիկ բռնցքամարտիկ Սանդեպի հետ: Վերջինս 8-4 հաշվով հաղթել էր ուզբեկ Ջավլոնբեկ Էշմատովին:
Հայաստանի բռնցքամարտիկների համար հաջող էր նաեւ 2-րդ մենամարտը: Մինչեւ 54 կգ քաշային կարգում Ջոնիկ Տոնոյանը 15-7 հաշվով վստահ հաղթանակ տոնեց լիտվացի Տաուտվիդաս Ստատկեւիչյուսի նկատմամբ: Աշխարհի չեմպիոնի տիտղոսի համար Ջոնիկն ուժերը կչափի կուբացի Էռնեստո Վալդեսի հետ: Վերջինս կիսաեզրափակիչում առավելության էր հասել հնդիկ բռնցքամարտիկ Վիկաս Խատրիի նկատմամբ:
Չափազանց համառ ու անզիջում պայքար էր ծավալվել 60 կգ քաշայիններ Արթուր Քաջոյանի եւ ուկրաինացի Օլեգ Նեկլյուդովի մենամարտում: Երկրորդ ռաունդի սկզբում հաշիվը հավասար էր (2-2), սակայն վերջին վայրկյաններին ուկրաինացին 2 միավոր վաստակեց: Բայց 3-րդ ռաունդում Արթուրին հաջողվեց տիրել նախաձեռնությանը եւ մենամարտն ավարտել 5-5 հաշվով: Մրցավարները նախապատվությունը տվեցին ուկրաինացունՙ հաղթանակը շնորհելով վերջինիս: Այսպիսով, Արթուր Քաջոյանը դարձավ բրոնզե մրցանակակիր: Եզրափակիչում ուկրաինացու մրցակիցը կլինի լիտվացի Ռիկարդաս Կունգայտիսը, որը 4-0 հաշվով հաղթեց Ուզբեկստանի ներկայացուցիչ Բարհայոջոն Օբիդովին:
Եզրափակիչի ուղեգիր նվաճել չհաջողվեց նաեւ գերծանր քաշային Գոռ Մարգարյանին: Նա համառ մենամարտում 0-2 հաշվով զիջեց ռուսաստանցի Հասան Գիմբատովին ու բավարարվեց բրոնզե մեդալով: Գիմբատովն աշխարհի չեմպիոնի տիտղոսը կվիճարկի մոլդովացի Վիկտոր Իալիմովի հետ: Վերջինս առաջին ռաունդում նոկաուտի էր ենթարկել լիտվացի Թոմաս Բասինսկասին:
ԱՇՈՏ ՀԱՅՐԱՊԵՏՅԱՆ