ՀՀ հավաքականը թիմային հաշվարկով 2-րդն է
Կարեն Դեմիրճյանի անվան մարզահամերգային համալիրում վերջնագիծը հատեց բռնցքամարտի աշխարհի պատանեկան առաջնությունը: Հայաստանի պատանեկան հավաքականը բավական հաջող ելույթներ ունեցավ: Ռինգ դուրս եկած 13 բռնցքամարտիկներից 7-ն արժանացան մեդալների (1 ոսկե, 2 արծաթե, 4 բրոնզե): Թիմային հաշվարկով Հայաստանի հավաքականը զբաղեցրեց 2-րդ տեղըՙ զիջելով միայն Ռուսաստանի ընտրանուն: Վերջինս նվաճեց 5 ոսկե եւ 4 բրոնզե մեդալ:
Մրցումների վերջին օրը կայացած եզրափակիչ մենամարտերում 3 հայ բռնցքամարտիկներից միայն Կորյուն Սողոմոնյանին ուղեկցեց հաջողությունը: Մինչեւ 46 կգ քաշային կարգում Կորյունն իր 5-րդ մենամարտն էլ վստահ անցկացրեց եւ 10-4 հաշվով հաղթելով հնդիկ բռնցքամարտիկ Սանդիպին, արժանիորեն նվաճեց աշխարհի չեմպիոնի տիտղոսը: Հատկանշական է, որ քաշային այս կարգի բռնցքամարտիկներին պարգեւատրեց ՀՀ նախագահ Սերժ Սարգսյանը: Կորյուն Սողոմոնյանը ճանաչվել էր նաեւ առաջնության լավագույն բռնցքամարտիկ: Մրցանակը նրան հանձնեց ԱԻԲԱ-ի նախագահ Վուն:
Ցավոք, մեր մյուս երկու բռնցքամարտիկներին չհաջողվեց շարունակել Կորյունի սկսած հաղթարշավը: Մինչեւ 54 կգ քաշային Ջոնիկ Տոնոյանը 3-5 հաշվով զիջեց Էռնեստո Վալդեսին: Իռլանդացի Յոզեֆ Վարդի հետ մենամարտում Հայկ Խաչատրյանին չհաջողվեց լուրջ դիմադրություն ցույց տալ: Մրցակցի առավելությունն ակնհայտ էր, իսկ երբ հայ բռնցքամարտիկը 2 անգամ նոկդաունում հայտնվեց, 3-րդ ռաունդում մրցաշարը դադարեցվեց ու հաղթանակը շնորհվեց իռլանդացուն:
Մեծ հաջողության հասան ռուսաստանցի բռնցքամարտիկները: Եզրափակիչում հանդես եկած 5 բռնցքամարտիկներն էլ հաղթեցին ու նվաճեցին աշխարհի չեմպիոնի տիտղոսը: Ոսկե մեդալների արժանացան Սերգեյ Սոբլինսկին (50 կգ), Մագոմեդ Աբդուլամագոմեդովը (63 կգ), Անդրեյ Եգորովը (66 կգ), Իդրիս Շախմանովը (75 կգ) եւ գերծանրքաշային Հասան Գիմբատովը: Քաշային մյուս կարգերում ուժեղագույններ ճանաչվեցին գերմանացի Թեո Կրեչլոկը (48 կգ), բելառուսցի Իվան Բարանչուկը (52 կգ), կուբացի Առլեն Լոպեսը (57 կգ), ուկրաինացի Օլեգ Նեկլյուդովը (60 կգ) եւ ուզբեկ Միրզոբեկ Հասանովը (80 կգ):
ԱՇՈՏ ՀԱՅՐԱՊԵՏՅԱՆ