Կառավարությունը կընդլայնի գյուղերում անտոկոս վարկ վերցրած ձեռնարկությունների եւ անհատ ձեռներեցների շրջանակը: Այդ մասին լրագրողներին հայտնեց ֆինանսների նախարար Տիգրան Դավթյանը : Նա նշեց, որ այս տարվա մարտից այդ փորձնական ծրագրի շրջանակներում ընդգրկված Շիրակի եւ Գեղարքունիքի մարզերի 60 առավել խոցելի համայնքներին տրամադրվել են մի քանի տասնյակ վարկեր, որոնց 10 տոկոս տոկոսադրույքների մարումը պետությունը վերցրել է իր վրա:
Նախարարը տեղեկացրեց, որ ծրագիրը կշարունակվի մինչեւ այս տարեվերջ եւ հետագայում կընդգրկի արդեն նաեւ այլ մարզեր: Առաջին անգամ գյուղատնտեսական վարկ վերցնողներին պետությունը կսուբսիդավորի վարկի ողջ տոկոսադրույքը: Բացի այդ, պետությունը կսուբսիդավորի նաեւ գյուղատնտեսության զարգացման միջազգային հիմնադրամի եւ «Հազարամյակի մարտահրավեր-Հայաստան» հիմնադրամի տրամադրած գյուղատնտեսական վարկերի տոկոսադրույքները:
Տիգրան Դավթյանը հավանական համարեց հաջորդ տարվա բյուջեում այս ծրագրի համար առանձին տողով գումարների տրամադրումը: Նա նաեւ հավաստիացրեց, որ սուբսիդավորման ծրագրում ընդգրկվելու համար սահմանված են բավականին խիստ չափանիշներ, ինչը թույլ կտա զերծ մնալ դրանում խոշոր ձեռնարկություններ ընդգրկելուց:
Անդրադառնալով բանկերի վարկերի տրամադրման խնդիրներին, ֆինանսների նախարարը նշեց, որ կառավարությունը փորձում է վարկերի տրամադրումը խթանել նախ լրացուցիչ ռեսուրսներ ներգրավելով միջազգային կառույցներից եւ ավելացնելով վարկային առաջարկը: Այնուհետեւ, հատուկ ստեղծված օպերատիվ շտաբի միջոցով աջակցում է առավել հեռանկարային ընկերություններին` նրանց վարկեր ստանալու համար տրամադրելով պետական երաշխիքներ կամ մասնակցելով նրանց կապիտալին: Իսկ հիպոթեկային շուկան ակտիվացնելու համար քայլեր են ձեռնարկվում Հայաստանում հիպոթեկային նոր ընկերություն ստեղծելու:
Տիգրան Դավթյանը կարծիք հայտնեց նաեւ, որ համաշխարհային տնտեսության մեջ անկման երեւույթներն աստիճանաբար դադարում են եւ ի հայտ են գալիս կայունացման որոշակի միտումներ: Դրանց արտացոլումն, ըստ նախարարի, առաջիկայում կնկատվի Հայաստանի տնտեսության մեջ, որի արդյունքում վարկերի տրամադրման գործընթացը կվերադառնա իր նախկին հունին: Նա վարկերի կրճատման փաստը համարեց օբյեկտիվ իրողություն, որը բնորոշ չէ միայն Հայաստանի բանկային համակարգին: Բոլոր երկրներում էլ բանկերը դարձել են չափազանց զգուշավոր, քանի որ ռիսկերն ավելանում են, իսկ վարկառուների վճարունակությունը` նվազում:
Ֆինանսների նախարարը անդրադարձավ նաեւ կառավարությունից Զանգեզուրի պղնձամոլիբդենային կոմբինատին պետական երաշխիքներով տրամադրված 10 մլն դոլար վարկին, ասելով, որ օրերս կոմբինատն արդեն ամբողջությամբ մարել է այդ վարկը: Միաժամանակ Տիգրան Դավթյանը նշեց, որ այդ վարկի շնորհիվ կոմբինատը կարողացավ շարունակել իր ներդրումային ծրագրերը եւ պահպանել հազարավոր աշխատատեղեր:
Ա. Մ.