Ֆուտբոլի Հայաստանի բարձրագույն խմբի առաջնության 12-րդ տուրում կենտրոնականն «Ուլիսի» եւ «Միկայի» մրցավեճն էր: Երկու թիմերն էլ հաղթելու վճռականությամբ էին խաղադաշտ դուրս եկել: Առաջինը հաջողության հասավ «Միկան»: Արդեն 5-րդ րոպեին բրազիլացի Ալեքսի տուգանային հարվածից հետո Արամ Ոսկանյանը գլխի հարվածով բացեց հաշիվը: Գոլը չընկճեց ուլիսցիներին, որոնք մեծ ուժերով գրոհում էին: Եվ ընդամենը 6 րոպե անց հաշիվը հավասարեցվեց: Կարեն Մուրադյանի ճշգրիտ փոխանցումից հետո Գագա Թբիլաշվիլին գրավեց «Միկայի» դարպասը:
Առաջին խաղակեսում եւս երկու վտանգավոր պահ գրանցվեց: Նախ քիչ էր մնում սխալվեր «Միկայի» դարպասապահ Սոսո Գրիշիկաշվիլին ու Արտյոմ Ադամյանը պատժեր նրան: Հետո գոլ խփելու լավ առիթ ներկայացավ «Միկայի» հարձակվող Արա Հակոբյանին, սակայն հյուրերի դարպասապահ Մանվել Աֆրիկյանը հետ մղեց գնդակը:
Ընդմիջումից հետո եւս դաշտում հավասար պայքար էր ընթանում: 60-րդ րոպեին 2-րդ դեղին քարտը ստանալով, դաշտից հեռացվեց ուլիսցի Կարեն Ալեքսանյանը: «Միկային» հաջողվեց իրացնել թվային առավելությունը: Կրկին վարպետ խաղով աչքի ընկավ միկացիների ավագ Արամ Ոսկանյանը, որը դժվարին դրությունից, պառկած վիճակում գլխի հարվածով խփեց հաղթական գոլը: «Ուլիսը» կարող էր փրկել խաղը, սակայն Արմեն Տիգրանյանի հարվածը դիպավ դարպասի հորիզոնական ձողին:
Խաղից հետո կայացած մամուլի ասուլիսում թիմերի մարզիչները հետեւյալ կարծիքն արտահայտեցին:
Սամվել Դարբինյան («Միկա») - Հաճելի է, երբ հանդիպումն անցնում է նման լարված պայքարում: Դա նպաստում է թիմերի խաղամակարդակների աճին, առաջնության նկատմամբ հետաքրքրասիրությանը: Արդեն 2-րդ խաղում ենք արագ գոլ խփում, ինչը հոգեբանորեն որոշ չափով կաշկանդում է մեր ֆուտբոլիստներին, որոնք շատ շուտ են հավատում վերջնական հաղթանակին: Թիմի առջեւ լուրջ խնդիրներ են դրված, ինչը որոշակի լարվածություն է ստեղծում: Մեզ համար այժմ շատ կարեւոր է հաղթել ու «Փյունիկից» հետ չմնալ: Կան վնասվածք ունեցող ֆուտբոլիստներ: Այդ պատճառով այսօրվա խաղում բացակայում էր Բոտի Դեմելը: Վիրահատությունից եւ բուժզննումից հետո թիմին են միացել Ալեքսանդր Թադեւոսյանն ու Նիկիտա Ֆուրսինը: «Ուլիսը» լավ կազմակերպված թիմ է, որին հաջողություն եմ մաղթում:
Սեւադա Արզումանյան («Ուլիս») - Այսօրվա խաղում «Ուլիսի» համար ճակատագրական 3 պահ տեղի ունեցավ: Առաջինն արագ բաց թողած գոլն էր, երկրորդը` Կարեն Ալեքսանյանի հեռացումը, երրորդը` մեր պաշտպանների կոպիտ սխալը, որի հետեւանքով 2-րդ գոլը բաց թողեցինք ու պարտվեցինք: Իհարկե, ցավալի է նման լավ խաղով պարտվելը: Հարկավոր է շուտ մոռանալ այս պարտությունը եւ նախապատրաստվել հաջորդ հանդիպումներին` լավ խաղն ամրապնդելով արդյունքով: Երեւի շուտով մեզ միանա դարպասապահ Գեւորգ Կասպարովը, որը խաղում է Իրանում:
Այս հաղթանակի շնորհիվ «Միկան» կրճատեց միավորների տարբերությունը «Փյունիկից», որը սեփական հարկի տակ չկարողացավ հաղթել «Գանձասարին»: Այդ խաղում դարպասները մնացին անառիկ: Ոչ մի կերպ չի հաջողվում միավոր վաստակել «Արարատին»: «Բանանցի» հետ խաղում արդեն 3-րդ րոպեին Հրանտ Գեւորգյանը գրավեց «Արարատի» դարպասը, իսկ խաղավերջում Սամվել Մելքոնյանը 2-րդ գոլը խփեց: «Կիլիկիայի» եւ «Շիրակի» մրցավեճում գրանցվեց ոչ-ոքի` 1-1: Առաջինը հաջողության հասան շիրակցիները, որոնցից աչքի ընկավ Արա Մկրտչյանը: «Կիլիկիային» պարտությունից փրկեց Ռաֆայել Մկրտչյանը:
Մրցաշարային աղյուսակ
| Խ | Հ | Ո | Պ | Գ | Մ | |
| 1. Փյունիկ | 11 | 9 | 2 | 0 | 27-6 | 29 |
| 2. Միկա | 11 | 8 | 2 | 1 | 22-9 | 26 |
| 3. Բանանց | 11 | 8 | 0 | 3 | 20-11 | 24 |
| 4. Ուլիս | 12 | 6 | 2 | 4 | 16-10 | 20 |
| 5. Շիրակ | 12 | 3 | 3 | 6 | 12-24 | 12 |
| 6. Գանձասար | 12 | 3 | 2 | 7 | 7-19 | 11 |
| 7. Կիլիկիա | 12 | 3 | 1 | 8 | 11-19 | 10 |
| 8. Արարատ | 11 | 0 | 0 | 11 | 3-20 | 0 |
Ռմբարկուները
| Հենրիխ Մխիթարյան | «Փյունիկ» | 11 |
| Բոտի Դեմել | «Միկա» | 8 |
| Արամ Ոսկանյան | «Միկա» | 7 |
| Անդրանիկ Բարիկյան | «Շիրակ» | 6 |
ԱՇՈՏ ՀԱՅՐԱՊԵՏՅԱՆ