Ֆուտբոլի Հայաստանի բարձրագույն խմբի առաջնության 14-րդ տուրում ուշադրության կենտրոնում «Փյունիկ»-«Միկա» հանդիպումն էր: Ցավոք, սպասված լարված մրցակցությունը չստացվեց եւ դրանում մեղավոր էին «Միկայի» ֆուտբոլիստները: Նրանք բավական դանդաղ էին գործում, չէին հասցնում ժամանակին վնասազերծել արագաշարժ փյունիկցիներին: Ճիշտ է, առաջին խաղակեսում գոլային պահերով «Միկան» գերազանցեց «Փյունիկին», սակայն Ուլիսես Մոնտենեգրոն եւ Բոտի Դեմելը չօգտագործեցին նպաստավոր պահերը: Իսկ ահա փյունիկցիները կարողացան օգտագործել մրցակցի դարպասապահի կոպիտ սխալը եւ Գեւորգ Ղազարյանը 32-րդ րոպեին բացեց հաշիվը:
Ընդմիջումից հետո փյունիկցիների առավելությունն ավելի շոշափելի դարձավ, երբ նրանք արագություն հաղորդեցին հարձակողական գործողություններին: 67-րդ րոպեին Կառլեն Մկրտչյանը ճշգրիտ փոխանցումով հարվածային դիրք դուրս բերեց Գեւորգ Ղազարյանին եւ վերջինս կրկնապատկեց հաշիվը: Իսկ խաղավերջում անկյունայինի խաղարկումից հետո գլխի հարվածով 3-րդ գնդակը խփեց Կառլեն Մկրտչյանը:
Հաղթելով 3-0 հաշվով, «Փյունիկը» շրջանցեց «Միկային» ու կրկին գլխավորեց աղյուսակը: Փյունիկցիները դեռ մեկ խաղ էլ պետք է անցկացնեն հուլիսի 7-ինՙ հյուրընկալելով «Արարատին»: Անկախ այդ հանդիպման արդյունքից, «Փյունիկը» դարձավ առաջնության առաջին կեսի հաղթող:
Սամվել Դարբինյան («Միկա») - Ճիշտն ասած, չէի սպասում, որ մեզ համար կարեւոր այս հանդիպումն այսպես անհաջող կդասավորվեր: Առաջին խաղակեսը դեռ ոչինչ, հավասար խաղ էր ընթանում, իսկ երկրորդում մեր ֆուտբոլիստները խաղադաշտում կանգնած էին, կարծես թիմ չկար: Երեւի տղաների վրա ծանրաբեռնվածությունը մեծ էր, չկարողացան հավաքվել ու փրկել խաղը: Իսկ ահա փյունիկցիներն ավելի ոգեւորված խաղացին ընդմիջումից հետո, արագություն հաղորդեցին գրոհներին եւ արժանի հաղթանակ տարան: Գտնում եմ, որ 3-0-ն օբյեկտիվ հաշիվ է: Իհարկե, հոգեբանական առումով այս պարտությունը շատ ծանր էր եվրոգավաթների խաղարկության շեմին: «Փյունիկը» մեզ դաս տվեց ու պատժեց:
Վարդան Մինասյան («Փյունիկ») - Ֆուտբոլիստները գրեթե 100 տոկոսով կատարեցին իրենց տրված առաջադրանքը: Լավ էի ուսումնասիրել «Միկայի» խաղը եւ այսօր ավելի հետ քաշված էինք խաղում, որ օգտագործենք ազատ տարածությունները: Կարծես թե դա ստացվեց: Առաջին խաղակեսում մի փոքր կաշկանդված էին, ավելորդ շտապողականություն կար ֆուտբոլիստների գործողություններում, իսկ ահա ընդմիջումից հետո ավելի վստահ էին գործում: Մտահոգում է միայն Վահագն Մինասյանի վնասվածքը:
Գիտեք, որ Մարկոսը մեզ հետ է մարզվում: Նա բարձրակարգ ֆուտբոլիստ է, լավ մարզավիճակում է եւ վստահ եմ, որ կփոխարինի Հենրիխ Մխիթարյանին: Եթե հասցնենք նրան հայտավորել, ապա հուլիսի 7-ին կխաղացնենք «Արարատի» դեմ: Գոնե մեկ խաղ նա պետք է անցկացնի փյունիկցիների հետ, որ համագործակցության եզրեր գտնի: Զագրեբի «Դինամոն» ուժեղ մրցակից է, այսօր չորս տեսաերիզ փոխանակեցինք, ինչը հնարավորություն կտա ուսումնասիրելու մրցակցի խաղը:
Նշենք, որ «Փյունիկի» եւ «Միկայի» հանդիպմանը ներկա էին Զագրեբի «Դինամոյի» եւ շվեդական «Հելսինգբորգի» ներկայացուցիչները:
Իր երկրպագուներին շարունակում է հիասթափեցնել «Արարատը»: «Ուլիսի» հետ խաղում թիմը տխուր տպավորություն թողեց եւ 13-րդ անընդմեջ պարտությունը կրեց խոշոր հաշվով: Ուլիսցիներից երկու գոլ խփեց Արտյոմ Ադամյանը, մեկ անգամ էլ աչքի ընկավ Արթուր Քոչարյանը: Իսկ «Արարատը» կրկին չգտավ մրցակցի դարպասի բանալին, թեեւ 11 մ հարվածի իրավունք էր ստացել: Սակայն Գալուստ Պետրոսյանի հարվածը հետ մղեց դարպասապահ Մանվել Աֆրիկյանը:
«Գանձասարը» Կապանում 2-1 հաշվով կամային հաղթանակ տոնեց «Շիրակի» նկատմամբ: Արդեն 2-րդ րոպեին շիրակցի Անդրանիկ Բարիկյանը բացեց հաշիվը: Հետագայում Արսեն Ավետիսյանը 2 գոլ խփեց ու «Գանձասարին» հաղթանակ պարգեւեց: «Բանանցն» էլ խաղավերջում կարողացավ կոտրել «Կիլիկիայի» դիմադրությունը եւ Նորայր Գյոզալյանի ու Սամվել Մելքոնյանի խփած 2 գոլերի շնորհիվ հաղթել:
Մրցաշարային աղյուսակ
| Խ | Հ | Ո | Պ | Գ | Մ | |
| 1. Փյունիկ | 13 | 10 | 3 | 0 | 30-6 | 33 |
| 2. Միկա | 14 | 10 | 2 | 2 | 26-14 | 32 |
| 3. Բանանց | 14 | 9 | 0 | 5 | 25-16 | 27 |
| 4. Ուլիս | 14 | 8 | 2 | 4 | 22-11 | 26 |
| 5. Գանձասար | 14 | 5 | 2 | 7 | 10-20 | 17 |
| 6. Շիրակ | 14 | 3 | 4 | 7 | 13-26 | 13 |
| 7. Կիլիկիա | 14 | 3 | 1 | 10 | 12-23 | 10 |
| 8. Արարատ | 13 | 0 | 0 | 13 | 3-25 | 0 |
Ռմբարկուները
| Հենրիխ Մխիթարյան | «Փյունիկ» | 11 |
| Բոտի Դեմել | «Միկա» | 9 |
| Արամ Ոսկանյան | «Միկա» | 7 |
| Անդրանիկ Բարիկյան | «Շիրակ» | 7 |
| Արթուր Քոչարյան | «Ուլիս» | 7 |
ԱՇՈՏ ՀԱՅՐԱՊԵՏՅԱՆ