WBA-ի եւ WIBF-ի վարկածներով թեթեւագույն քաշային կարգի աշխարհի չեմպիոնուհի Սյուզի Քենթիկյանը հուլիսի 4-ին Համբուրգում իր տիտղոսների պաշտպանության համար ռինգ դուրս կգա արգենտինացի Կարոլինա Գեյտի հետ մենամարտելու:
«Այդ մենամարտը հնարավոր է բարդ ստացվի: Մրցակիցը բավական ուժեղ է եւ կրում է քաշային հաջորդ կարգի WBA-ի վարկածով աշխարհի չեմպիոնուհու ժամանակավոր տիտղոսը: Սակայն մենք շատ լավ ենք նախապատրաստվել առաջիկա մենամարտին եւ կարծում եմ Սյուզիի արագաշարժությունը նրա հաջողության գրավականը կլինի», նշել է Սյուզիի մարզիչ Մագոմեդ Շաբուրովը:
Հիշեցնենք, որ 21-ամյա Քենթիկյանը պրոֆեսիոնալ ռինգում առայժմ անպարտելի է: Նա շահել է բոլոր 24 մենամարտերը, որոնցից 16-ըՙ տեխնիկական նոկաուտով: Նրա մրցակցուհին 16 մենամարտերից միայն մեկում է պարտվել: Սյուզին ընդամենը 21 տարեկան է, մինչդեռ արգենտինացին նրանից 11 տարով մեծ է:
ԱՇՈՏ ՀԱՅՐԱՊԵՏՅԱՆ