«ԱԶԳ» ՕՐԱԹԵՐԹ

ԹԵՀՐԱՆ-ԵՐԵՎԱՆ ԻՆՔՆԱԹԻՌԻ ՎԹԱՐԻՑ ԶՈՀՎԱԾՆԵՐԻՑ 40-Ը ՀԱՅ Է ԵՂԵԼ

ՄԱՐԻԵՏԱ ԽԱՉԱՏՐՅԱՆ

Երեկ Caspian Airlnes ընկերությանը պատկանող Թեհրան-Երեւան ավիաչվերթն իրականացնող «Տու-154» ինքնաթիռը վթարի է ենթարկվել, որի հետեւանքով զոհվել են ինքնաթիռի 153 ուղեւորներն ու 15 հոգուց կազմված անձնակազմը: Վթարը տեղի է ունեցել, տարբեր տեղեկություններով, թռիչքից 16-20 րոպե հետո, 11:30-ին մերձ ժամանակահատվածում ինքնաթիռն ընկել է Թեհրանից 180 կմ հեռավորության վրա գտնվող Ղազվին նահանգի Ջենեթաբադ քաղաքին մերձակա բնակավայրերից մեկի մոտ: 40 ուղեւոր հայ է եղել, նրանցից 5-ը, ըստ քաղավիացիայի վարչության պետի տեղակալ Արսեն Պողոսյանի` ՀՀ քաղաքացի. Աշոտ Ներսիսյան, Արթուր Գրիգորյան, Կարինե Մարգարյան, անձնակազմի անդամներ Գրիգոր Բարսեղյան, Սուրեն Սողոմոնյան: 35 հայազգի այլ երկրների քաղաքացիներ են եղել: Ի դեպ, ինքնաթիռում է եղել նաեւ Թեհրանի հայկական համայնքների ընկերակցության ղեկավար Լեւոն Դավթյանը, որն ավելի վաղ Իրանի խորհրդարանի պատգամավոր էր: Այս ինքնաթիռով Հայաստան էին ժամանում Իրանի ձյուդոյի պատանեկան հավաքականի անդամները, որոնք նույնպես զոհվել են: Ինքնաթիռում եղել է նաեւ երկու երեխա: Վրաստանի երկու զոհված քաղաքացիները եղել են Հայաստանում Վրաստանի դեսպանատան աշխատակից Գիվի Չկադուան եւ Թեհրանում Վրաստանի դեսպանատան ղեկավարի կինը` Նաթելա Նիկոլավան:

Վթարի հնարավոր պատճառների մասին դեռեւս ոչինչ չի հաղորդվում: Caspian Airlnes ավիաընկերության երեւանյան գրասենյակի ներկայացուցիչները հղում են անում սեւ արկղերում եղող տեղեկատվությանը` երբ այն վերծանվի, այդ մասին գուցեեւ ինչ-որ բան իմանանք: Թեեւ տարբեր լրատվամիջոցներում չճշտված տեղեկություններ էին հայտնվել, թե ինքնաթիռի շարժիչներից մեկում հրդեհ է բռնկված եղել:

Փաստորեն` «Տու-154»-ը իր նախատեսված ժամից մեկ ժամ ուշ է թռիչքն իրականացրել, սակայն պաշտոնապես որեւէ իրավասու ատյան դեռ չի հայտնում դրա պատճառը: Հայաստանի քաղավիացիայի վարչությունում վթարի մասին հայտնի է դարձել հայ դիսպետչերներից, որոնք իրանցի գործընկերներից տեղեկացել են, որ իրենց տեսադաշտում ինքնաթիռը չի երեւում: Ինքնաթիռը Հայաստանում պետք է վայրէջք կատարեր ժամը 13-ից 8 րոպե պակաս:

Ինքնաթիռի տեխնիկական տվյալներին հայկական կողմը չի տիրապետում` իրանական կողմն է դրա պատասխանատուն: Պատճառների հետաքննությանը հայկական կողմը հազիվ թե մասնակցի, քանի որ միջազգային պայմանագրերով դրա իրավունքը չունի:

Ինքնաթիռն ապահովագրված է եղել

Իրանի նախագահը, որ ցավակցություն է հայտնել զոհվածների հարազատներին եւ Իրանի ժողովրդին, կոչ է արել արագ հետաքննություն իրականացնել, պարզել վթարի պատճառները: Ղազվինի փոխնահանգապետ Սիրուս Սաբերին երեկ հայտարարել է, որ Իրանի համապատասխան կառույցները որոնում են վթարված ինքնաթիռի սեւ արկղերը:

Հայաստանի նախագահ Սերժ Սարգսյանը երեկ դադարեցրեց իր աշխատանքային այցելությունը Սպիտակ` քաղաքի օրվա առթիվ, եւ շտապ վերադարձավ Երեւան:

Ավիավթարի առիթով երեկ նախագահ Սարգսյանը հրավիրեց արտակարգ խորհրդակցություն, որը նախ տեղեկատվական էր` ոլորտի մասնագետները ներկայացրել են իրենց հայտնի տեղեկատվությունը վթարի վերաբերյալ: Ստեղծվել է կառավարական հանձնաժողով` տարածքային կառավարման նախարար, փոխվարչապետ Արմեն Գեւորգյանի գլխավորությամբ, որը եւ երեկ հրավիրեց իր առաջին նիստը: Հանձնաժողովը երեկ հանձնարարեց քաղավիացիայի վարչությանը` զոհվածների հարազատների հետ քննարկել հուլիսի 17-ին Իրան մեկնելու եւ դեպքի վայր այցելելու հնարավորությունը: Հանձնարարվել է շահագրգիռ բոլոր մարմիններին` զոհվածների հարազատներին կազմակերպական, առողջապահական եւ հոգեբանական աջակցության խնդրի առումով անհրաժեշտ պատրաստվածության մակարդակ ապահովել: Աշխատանքի եւ սոցիալական հարցերի նախարարին էլ հանձնարարվել է առաջարկություն պատրաստել` զոհվածների ընտանիքներին ֆինանսական աջակցություն ցույց տալու համար:

Երեկ օրվա վերջում հայտնի դարձավ, որ Թեհրան-Երեւան չվերթի ինքնաթիռի վթարի հետեւանքով մարդկային բազմաթիվ զոհերի, այդ թվում` ՀՀ քաղաքացիների եւ հայազգի անձանց զոհվելու առթիվ նախագահ Սարգսյանը հրամանագիր է ստորագրել այսօր սգո օր հայտարարելու մասին: Նախագահ Սարգսյանի ուղերձում ասված է. «Մենք չենք կարող հետ բերել կորուստները եւ մեր զորակցությունն ենք հայտնում զոհվածների հարազատներին եւ մերձավորներին: Հայաստանի իշխանությունն այսօր անում է հնարավորը` օգնելու նրանց այս ծանր պահին: Դժվար է սփոփանքի ու մխիթարանքի խոսքեր գտնել մարդկանց համար, ովքեր հարազատ են կորցրել: Այս մեծ ողբերգությունը հաղթահարելու համար մաղթում եմ ոգու կորով եւ արիություն»:

ՀՀ ԱԳՆ-ում բացվել է թեժ գիծ, տեղեկատվություն կարելի է ստանալ 562543 , 37410566811 եւ +37410544041 (ներքին 202 կամ 217 ) հեռախոսահամարներով: «Caspian airlines» ինքնաթիռի ավիավթարի զոհերի ցուցակը տեսնել մեր կայքէջում:

1. Աբդոլլահզադե Համիդռեզա