Հուլիսի 26-ին Շվեդիայի Լանցքրոնա քաղաքում կմեկնարկի ծանրամարտի Եվրոպայի երիտասարդական առաջնությունը, որին կմասնակցեն նաեւ Հայաստանի պատվիրակները: Տղամարդկանց մրցումներում հանդես կգան Սմբատ Մարգարյանը (56 կգ), Ռուբեն Մամոյանը (62 կգ), գերծանրքաշայիններ Ռուբեն Ալեքսանյանն ու Հայկ Հակոբյանը: Նշենք, որ նախորդ տարվա Եվրոպայի երիտասարդական առաջնությունում 69 կգ քաշային կարգում Առաքել Միրզոյանը նվաճել էր չեմպիոնի տիտղոսը, իսկ Ռուբեն Ալեքսանյանը դարձել էր Եվրոպայի փոխչեմպիոն:
Կանանց մրցապայքարում Հայաստանը կներկայացնեն Ալլա Սամվելյանը (58 կգ) եւ Աստղիկ Գալստյանը (63 կգ): Հավաքականի գլխավոր մարզիչ Արտաշես Ներսիսյանը մարզուհիներից մեդալների ակնկալիքներ ունի: Նրանց համար Եվրոպայի երիտասարդական առաջնությունն ուժերի լավ ստուգատես կլինի նոյեմբերին Կորեայում կայանալիք աշխարհի մեծահասակների առաջնությունից առաջ: Հիշեցնենք, որ անցյալ տարի Ալբանիայում կայացած Եվրոպայի երիտասարդական առաջնությունում Լիանա Մանուկյանն ու Հեղինե Եփրեմյանը 2-րդ եւ 3-րդ մրցանակակիր էին դարձել:
ԱՇՈՏ ՀԱՅՐԱՊԵՏՅԱՆ