Երեք հանդիպումներով մեկնարկեց ֆուտբոլի Հայաստանի բարձրագույն խմբի առաջնության 3-րդ շրջանը: 15-րդ տուրի «Փյունիկ»-«Բանանց» մրցախաղը հետաձգվել է եւ կկայանա օգոստոսի 19-ին:
Առավել մեծ հետաքրքրություն էր ներկայացնում Գյումրիում կայանալիք «Շիրակ»-«Արարատ» հանդիպումը: Ինչպես տեղեկացրել ենք, առաջնությունում հայտարարված ընդմիջման ժամանակ «Արարատի» կազմը զգալի փոփոխության է ենթարկվել եւ կարելի է փաստել, որ նոր թիմ է ձեւավորվում: Համենայն դեպս, «Շիրակի» հետ «Արարատի» մեկնարկային կազմում խաղադաշտ էին դուրս եկել միանգամից 6 նորեկներ, որոնցից 4-ը լեգեոնականներ էին: Թիմի նախկին ֆուտբոլիստներից խաղում էին դարպասապահ Գեւորգ Պրազյանը, Գեորգի Կրասովսկին, Արտակ Գրիգորյանը, Արթուր Մինասյանն ու Արթուր Պետրոսյանը:
Արարատցիները հաջող սկսեցին հանդիպումը եւ արդեն 21-րդ րոպեին Արտակ Գրիգորյանի հարվածից հետո բացեցին հաշիվը: Բավական ժամանակ գյումրեցիներին չէր հաջողվում վերականգնել հավասարակշռությունը: Միայն 71-րդ րոպեին Տիգրան Դավթյանին վերջապես հաջողվեց գրավել «Արարատի» դարպասը: Մեկ րոպե անց դաշտից հեռացվեց արարատցի Կարեն Ավոյանը: Սակայն մնալով 10 հոգով, «Արարատը» քիչ անց կրկին հաշվի մեջ առաջ անցավ: Աչքի ընկավ թիմի նորեկ Վալերի Ցիգանենկոն:
Խաղավարտից չորս րոպե առաջ 2-րդ դեղին քարտը ցույց տալով Արտակ Գրիգորյանին, մրցավար Վահան Մինասյանը դաշտից հեռացրեց եւս մեկ արարատցու: Շիրակցիներին հաջողվեց իրացնել 2 ֆուտբոլիստների առավելությունը: Ավելացված ժամանակում իր թիմին պարտությունից փրկեց Կարեն Խաչատրյանը: Այսպիսով, «Արարատը» ձեռքից բաց թողեց անդրանիկ հաղթանակը տոնելու հիանալի հնարավորությունը:
Արդյունավետ խաղով աչքի է ընկնում «Ուլիսը», որը 2-րդ անընդմեջ հանդիպումն է շահում խոշոր հաշվով: Նախորդ տուրում ուլիսցիները 3-0 հաշվով հաղթել էին «Արարատին», այս անգամ նույնպիսի արդյունք գրանցվեց «Կիլիկիայի» հետ մրցավեճում: Կրկին աչքի ընկան թիմի գլխավոր ռմբարկուներ Արթուր Քոչարյանն ու Արտյոմ Ադամյանը: Քոչարյանը բացեց հաշիվը, իսկ հետո 2 անգամ մրցակցի դարպասը գրավեց Արտյոմ Ադամյանը (վերջինըՙ 11 մ հարվածով): Նրա առաջին գոլը շատ տպավորիչ էր: Արտյոմը գնդակն ընդունելով մրցակցի տուգանային հրապարակում, շրջադարձ գեղեցիկ հարվածով դարձավ գոլի հեղինակ:
«Գանձասարը» Կապանում հյուրընկալել էր «Միկային»: Եվրոգավաթի խաղարկությունում «Բրեդայից» կրած խայտառակ պարտությունից հետո կապանցիներն այս խաղում պետք է փորձեին վերականգնել իրենց սասանված հեղինակությունը:
«Գանձասարին» դա հաջողվեց: Դաշտի տերերը հաղթեցին 3-1 հաշվով: Հաշիվը բացեց «Միկայի» պաշտպան Գեւորգ Պողոսյանը` գնդակն ուղարկելով սեփական դարպասը: Կապանցիներից մյուս գոլերը խփեցին Վիրգին Մարշավելան ու Միխեիլ Սիմոնյանը: «Միկայից» միակ գոլը գրանցվեց Արա Հակոբյանի օգտին: Նշենք, որ 40-րդ րոպեին դաշտից հեռացվել էր Աղվան Մկրտչյանը եւ «Միկան» խաղում էր 10 հոգով: 3-0 հաշվի ժամանակ «Միկայի» հարձակվող Արամ Ոսկանյանը չիրացրեց 11մ հարվածը:
Մրցաշարային աղյուսակ
| Խ | Հ | Ո | Պ | Գ | Մ | |
| 1. Փյունիկ | 14 | 10 | 4 | 0 | 30-6 | 34 |
| 2. Միկա | 15 | 10 | 2 | 3 | 27-17 | 32 |
| 3. Ուլիս | 15 | 9 | 2 | 4 | 25-11 | 29 |
| 4. Բանանց | 14 | 9 | 0 | 5 | 25-16 | 27 |
| 5. Գանձասար | 15 | 6 | 2 | 7 | 13-21 | 20 |
| 6. Շիրակ | 15 | 3 | 5 | 7 | 15-28 | 14 |
| 7. Կիլիկիա | 15 | 3 | 1 | 11 | 12-26 | 10 |
| 8. Արարատ | 15 | 0 | 2 | 13 | 5-27 | 2 |
Ռմբարկուները
| Հենրիխ Մխիթարյան | «Փյունիկ» | 11 |
| Բոտի Դեմել | «Միկա» | 9 |
| Արթուր Քոչարյան | «Ուլիս» | 8 |
| Արամ Ոսկանյան | «Միկա» | 7 |
| Անդրանիկ Բարիկյան | «Շիրակ» | 7 |
| Արտյոմ Ադամյան | «Ուլիս» | 6 |
ԱՇՈՏ ՀԱՅՐԱՊԵՏՅԱՆ