Անհատական տների գների նվազման միտումը հունիսին դեռ պահպանվել է
ԱՐԱ ՄԱՐՏԻՐՈՍՅԱՆ
2009-ի հունիսին, անշարժ գույքի կադաստրի պետական կոմիտեիՙ շուկայի վերլուծության տվյալների համաձայն, Հայաստանի անշարժ գույքի շուկայում իրականացվել է 14320 գործարք, ինչը 25,3 տոկոսով ավելի է 2009-ի մայիսին կատարված գործարքների եւ ընդամենը 0,8 տոկոսով պակաս` 2008-ի հունիսի գործարքների համեմատ: Փաստորեն, հունիսին իրականացված գործարքները հասել են անցյալ տարվա գործարքների քանակին, դրանով իսկ փաստելով աշխուժության վերականգնման միտումն անշարժ գույքի շուկայում:
Օտարման գործարքները նույնպես զգալիորեն ավելացել ենՙ մայիսի 2894-ի փոխարեն հունիսին կազմելով 4028, աճելով 39,2 տոկոսով: Անցյալ տարվա հունիսի համեմատ այս ցուցանիշը նվազել է 17,9 տոկոսով: Օտարման գործարքներից առուվաճառքներինը կազմել է 78,1 տոկոս: Մնացածը նվիրատվություններ ու փոխանակություններ են:
Մայրաքաղաքում առուվաճառքի գործարքների 66,8 տոկոսն արձանագրվել է բազմաբնակարան շենքերի բնակարանների նկատմամբ: 2009-ի մայիսի համեմատ, բնակարանների առուվաճառքի գործարքների քանակը Երեւանում հունիսին աճել է 36,1 տոկոսով, իսկ նախորդ տարվա հունիսի համեմատՙ նվազել 17,9 տոկոսով:
Բնակարանների շուկայական միջին գները Երեւանում հունիսին մայիսի համեմատ նվազել են աննշանՙ 0,2 տոկոսով: Ըստ վարչական շրջանների, Երեւանում բնակարանների 1 քմ մակերեսի միջին շուկայական գները հունիսին այսպիսին են եղել.
| Վարչական շրջաններ | Միջին գները (դրամ) հունիս 2008 թ. | Միջին գները (դրամ) հունիս 2009 թ. | Միջին գները (դրամ) մայիս 2009 թ. |
| Կենտրոն | 487000 | 462800 | 461300 |
| Արաբկիր | 418500 | 350400 | 354400 |
| Քանաքեռ-Զեյթուն | 309600 | 271700 | 274900 |
| Նոր Նորք | 281700 | 222600 | 225600 |
| Ավան | 274000 | 225700 | 221500 |
| Էրեբունի | 279500 | 243300 | 238900 |
| Շենգավիթ | 285000 | 235500 | 239000 |
| Դավիթաշեն | 295000 | 250900 | 252600 |
| Աջափնյակ | 280800 | 235600 | 234900 |
| Մալաթիա-Սեբաստիա | 269700 | 218600 | 218700 |
| Նուբարաշեն | 155300 | 134700 | 134700 |
| Միջինը Երեւանում (բացի Նորք-Մարաշից) | 303300 | 259300 | 259700 |
Աղյուսակից երեւում է, որ որոշ վարչական շրջաններումՙ Կենտրոնում եւ Աջափնյակում, գներն անգամ աճել են:
Մարզերում, բացառությամբ Երեւանի, վաճառվել են 326 բնակարաններ, որոնց քանակը մայիսի համեմատ աճել է 45,5 տոկոսով, իսկ 2008-ի հունիսի համեմատ նվազելՙ 22,9 տոկոսով: Միաժամանակ արձանագրվել է նաեւ միջին գների աննշան աճ մայիսի համեմատՙ 0,4 տոկոսով: Երեւանից հետո, ամենաթանկ բնակարանները հունիսին եղել են Ծաղկաձորում, որտեղ 1 քմ մակերեսի շուկայական գինը կազմել է ավելի քան 182 հազար դրամ: Վաղարշապատում (Էջմիածնում) 1 քմ գինը կազմել է 166 հազար դրամ: Ապա գալիս են Աբովյանըՙ 143 հազար դրամ, Նոր Հաճընըՙ 138 հազար դրամ, Իջեւանըՙ 130 հազար դրամ ցուցանիշով, Աշտարակըՙ 127 հազար դրամ, Գորիսը 124 հազար դրամ, Մասիսըՙ 120 հազար դրամ 1 քմ դիմաց ցուցանիշներով:
Հունիսին Հայաստանում գրանցվել է անհատական տների առուվաճառքի 422 գործարք, որից 115-ըՙ Երեւանում: Մայրաքաղաքում անհատական տների առուվաճառքի գործարքների քանակը մայիսի համեմատ աճել է 2,7 անգամ, իսկ մարզերումՙ 44,1 տոկոսով: 2008-ի հունիսի համեմատ անհատական բնակելի տների առուվաճառքի գործարքների քանակը Երեւանում աճել է 12,7 տոկոսով, իսկ մարզերում միասին վերցրած նվազել 30,2 տոկոսով: Միջինացվածՙ 250 քմ շինության մակերես եւ 400 քմ տնամերձ ունեցող անհատական տների միջին 1 քմ-ի միջին գները 2009-ի հունիսին մայիսի համեմատ նվազել են 3,4 տոկոսով: Ըստ վարչական շրջաններիՙ գներն այսպիսին են եղել.
| Վարչական շրջաններ | Միջին գները (դրամ) հունիս 2008 թ. | Միջին գները (դրամ) հունիս 2009 թ. | Միջին գները (դրամ) մայիս 2009 թ. |
| Կենտրոն | 494400 | 493000 | 501200 |
| Արաբկիր | 426900 | 382000 | 396400 |
| Քանաքեռ Զեյթուն | 316800 | 298000 | 308700 |
| Նորք-Մարաշ | 288900 | 299500 | 307700 |
| Ավան | 276100 | 251300 | 272100 |
| Էրեբունի | 281600 | 273000 | 281500 |
| Շենգավիթ | 287200 | 261300 | 271000 |
| Դավիթաշեն | 301200 | 281000 | 297900 |
| Աջափնյակ | 289000 | 269500 | 274300 |
| Մալաթիա-Սեբաստիա | 275900 | 252000 | 260300 |
| Նուբարաշեն | 159900 | 152300 | 155300 |
| Միջինը Երեւանում (բացի Նոր Նորքից) | 308900 | 292100 | 302400 |
Մարզերում միջինացված են 200 քմ շինության եւ 1000 քմ տնամերձ մակերեսով անհատական տների գները: Այստեղ միջին գները հունիսին մայիսի համեմատ նվազել են 1,7 տոկոսով: Ամենաթանկ անհատական տները Երեւանից հետո դարձյալ Ծաղկաձորում են, 1 քմ-նՙ 288 հազար դրամ: Երկրորդը Վաղարշապատն է, 1 քմ-նՙ 178 հազար դրամ, երրորդըՙ Աբովյանը, որտեղ 1 քմ-ն կազմել է 153 հազար դրամ: Ապա գալիս են Նոր Հաճընըՙ 143 հազար դրամ, Իջեւանըՙ 136 հազար դրամ, Աշտարակը 135 հազար դրամ, Մասիսըՙ 130 հազար դրամ, Գորիսը 128 հազար դրամ 1 քմ դիմաց:
Հողի շուկայում հետեւյալ պատկերն էՙ 2009-ի հունիսին 2008-ի հունիսի համեմատ, հողերի առուվաճառքի գործարքների քանակը նվազել է 32,5 տոկոսով, աճուրդով վաճառքներինըՙ 44,8 տոկոսով:
Անշարժ գույքի վարձակալության գործարքների քանակը 2009-ի հունիսին մայիսի համեմատ աճել է 13,3 տոկոսով, իսկ 2008-ի հունիսի համեմատՙ 32,3 տոկոսով:
2009-ի հունիսին անշարժ գույքի 1285 գրավադրման գործարքներից 68-ն են եղել հիպոթեկային գրավադրման գործարքները: Մայիսի համեմատ, հիպոթեկային գրավադրման գործարքների քանակը հունիսին աճել է 19,3 տոկոսով, ընդ որում Երեւանումՙ 47,1 տոկոսով, մարզերում նվազել է 21,7 տոկոսով: 2008-ի հունիսի համեմատ հիպոթեկային գործարքները նվազել են 80,2 տոկոսով, ընդ որում Երեւանում` 77,9 տոկոսով, մարզերում` 84,6 տոկոսով:
Այսպիսով, հունիսին անշարժ գույքի շուկայում գների նվազումը գոնե բնակարանների մասով, կարելի է ասել, կանգ է առել: Անհատական տների մասով մայրաքաղաքում գների նվազման միտումը պահպանվել է, իսկ մարզերումՙ դանդաղել: Փաստորեն, ամռանը անշարժ գույքի շուկայում գների կայունացման մասին նախորդ ամիսների ցուցանիշները ներկայացնելիս բազմիցս արված մեր կանխատեսումները իրականանում են: Եթե հունիսին բնակարանների գներով է դա երեւում, ապա հուլիս-օգոստոսին այս միտումը ամենայն հավանականությամբ կտարածվի նաեւ անհատական տների վրա: Ամռան մյուս ամիսներին հավանական է, որ գներն անշարժ գույքի շուկայում չնչին փոփոխություններ արձանագրեն եւ հիմնականում կայուն կմնան: