Իրավամբ հանրահռչակ համարվող ջազմեն, բազմաժանր երաժիշտ Ջորջ Բենսոնի երեւանյան եզակի համերգը տեղի կունենա Կարեն Դեմիրճյանի անվան մարզահամերգային համալիրի համերգային սրահում նոյեմբերի 12-ին:
Համերգը կկայանա «21-ի հեռանկարներ» երաժշտական 10-րդ փառատոնի շրջանակներում, որն արդեն 10-րդ տարին անցկացվում է ՀՀ մշակույթի նախարարության աջակցությամբ եւ ՀՀ նախագահի հովանու ներքո: Փառատոնի մենեջեր Սոնա Հովհաննիսյանն «Ազգ» -ի թղթակցի հետ զրույցում վստահեցրեց. «Դեռ Ալ Ջերոյին «Ջազ 70-ի» շրջանակներում Երեւան բերելիս անցանք այն մութ անտառը, որտեղ մեր իսկ բացած արահետն այս անգամ էլ հնարավոր դարձրեց Ջորջ Բենսոնի, ով մինչ բանակցություններն սկսելը Հայաստանի գոյությանն էլ անտեղյակ էր, երեւանյան համերգը: Բանակցությունների ընթացքում եղած դժվարությունները ֆինանսական չէինՙ հովանավորելու ցանկություն շատերն էին հայտնել»:
Արդեն հաջողություն ապահոված բանակցությունների արդյունք համերգը ֆինանսավորում է «Ամերիաբանկը» ի պատիվ գլխամասային բաժանմունքի բացման:
Համերգի կոմերցիոն արդյունքներին վստահ են «Շարմ» ընկերությունում, որն իրականացնում է կազմակերպչական աշխատանքները Երեւանում եւ որի գրասենյակում միայն վաճառվում են տոմսերըՙ 5-100 հազար դրամով:
Ն. Պ.