Ֆուտբոլի Հայաստանի բարձրագույն խմբի թիմերն աստիճանաբար վերադառնում են արձակուրդից եւ սկսում նոր մրցաշրջանի նախապատրաստությունը: Մարզումներն է սկսել նաեւ 2009-ի առաջնության արծաթե մրցանակակիր «Միկան»: Ինչպես արդեն տեղեկացրել ենք, «Միկայի» ղեկը կրկին ստանձնել է Արմեն Ադամյանը, որի գլխավորությամբ թիմը 2 տարի անընդմեջ նվաճել է հանրապետության գավաթն ու դարձել է մրցանակակիր:
Ինչպես տեղեկացանք «Միկայի» գործադիր տնօրեն Արմեն Պետիկյանից, թիմի ֆուտբոլիստները բուժզննում անցնելուց հետո դեկտեմբերի 14-ից սկսել են մարզումները: Արմեն Ադամյանին օգնում են նրա եղբայրըՙ Արտաշես Ադամյանն ու Սամվել Սարգսյանը, իսկ դարպասապահների մարզիչը Տիգրան Ասլանյանն է: Օգտվելով բարենպաստ եղանակից, «Միկայի» ֆուտբոլիստները բացօթյա մարզումներ են անցկացնում, նաեւ մասնակցել են երկկողմանի խաղի:
«Միկան» մինչեւ տարեվերջ մարզումները կանցկացնի Երեւանում, սեփական մարզաբազայում, իսկ հունվարի 7-ից ուսումնամարզական առաջին հավաքը կկազմակերպի Ծաղկաձորում: Հավաքի ընթացքում հիմնական ուշադրությունը կդարձվի ֆուտբոլիստների ֆիզիկական պատրաստությանը: Թիմը Ծաղկաձորից կվերադառնա հունվարի 17-ին, իսկ 3 օր անց կուղեւորվի Անթալիա: Այստեղ մինչեւ փետրվարի 3-ը «Միկան» ուսումնամարզական 2-րդ հավաքը կանցկացնի: Այդ ընթացքում թիմը նաեւ ստուգողական հանդիպումներ կանցկացնի, ինչը հնարավորություն կտա ստուգելու ֆուտբոլիստների խաղային ունակությունները, փորձարկելու նորեկներին:
Փետրվարի 10-22-ը «Միկան» մարզումները կշարունակի Կիպրոսում: Իսկ վերջին հավաքը կանցկացվի մարտի 1-15-ը Իսպանիայում:
Նախորդ մրցաշրջանի համեմատ թիմում որոշ փոփոխություններ են արդեն կատարվել: «Միկայի» հետ չեն արդեն Նիկիտա Ֆուրսինը, Յուրի Մորոզովը, Տիագոն եւ Արա Հակոբյանը, որոնց պայմանագրերի ժամկետը լրացել է: Արա Հակոբյանը ցանկություն է հայտնել հանդես գալու արտերկրում: Ինչ վերաբերում է համալրումներին, ապա առայժմ միայն Հրայր Մկոյանն է 2 տարվա պայմանագիր կնքել «Միկայի» հետ: Թիմում փորձարկվում են 3 նոր ֆուտբոլիստներ: Նրանցից մեկը Լիտվայի «Սուդավա» թիմի դարպասապահ Սաուլիուս Կլյավինակասն է: «Միկայում» փորձարկվում է նաեւ բրազիլացի կիսապաշտպան Ջունիոր Էդմիլսոնը եւ Տաշքենդի «Պախտակորի» երիտասարդական կազմում հանդես եկող Ավանես Հարությունյանը:
ԱՇՈՏ ՀԱՅՐԱՊԵՏՅԱՆ