Ըստ Շիրակի մարզպետարանի տվյալների` 2009 թվականի մինչեւ դեկտեմբերի 25-ը «Գյումրու ծննդատուն» ՓԲԸ-ում գրանցվել է 1534 ծնունդ` նախորդ տավա ցուցանիշից 254-ով ավելի: Ճիշտ է` սրանք դեռ այն թվերը չեն, որոնցով կարելի կլիներ ուրախանալ, այնուամենայնիվ լավ է, որ կա աճ: Ինչպես անցյալ, այնպես էլ այս տարի ծնված երեխաների մեջ տղաների թիվը նկատելիորեն ավելի է աղջիկներից:
Գյումրու ծննդատանը ինչպես այս, այնպես էլ նախորդ տարի չի գրանցվել նորածնի կամ մայրական մահացության որեւէ դեպք: Այստեղ պարբերաբար նորացվում են բուժսարքավորումները, աշխատանք է կատարվում կանանց վերարտադրողական առողջության պահպանման, կազմակերպվող «Բաց դռների օրերի» միջոցով` նաեւ մարզի մի շարք հեռավոր գյուղերում կանխարգելիչ ստուգումների ակտիվացման ուղղությամբ: Ծննդատանը տարեսկզբին բացված «Մայրության դպրոցում» ապագա մայրերի հետ պարապմունքներ են անցկացվում փոքրիկի նախածննդյան - հետծննդյան օրերի, նրա խնամքի հետ կապված հարցերի վերաբերյալ:
Գ. Մ.