Հայաստանի Հանրապետության կենտրոնական բանկը շրջանառության մեջ է մտցրել 1000 դրամ անվանական արժեքով արծաթե հուշադրամ: «Գալանտուս Արտյուշենկոյի» (Ձնծաղիկ) հուշադրամը թողարկվել է «Ծաղիկների գեղեցկությունը» միջազգային դրամագիտական ծրագրի շրջանակում:
Հուշադրամի դիմերեսի դաշտի ձախում պատկերված է «Գալանտուս Արտյուշենկոյի» ծաղիկը, իսկ աջում` տերեւը, որի պատկերն անցնում է եւ շարունակվում դարձերեսին: Ծաղկի եւ տերեւի միջեւ դաշտում ոճավորված պատկերներ են: Տերեւի պատկերից աջ եզրաշուրթի մոտ մանր տառատեսակով նշված է թողարկման տարեթիվը` «2010»: Դաշտի ներքեւում երկու տողով նշված է հուշադրամի անվանական արժեքը համապատասխանաբար` «1000» եւ «ԴՐԱՄ»: Եզրաշուրթի շրջագծով վերեւում հայերեն, իսկ ներքեւում անգլերեն մակագրված են համապատասխանաբար` «ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ» եւ «REPUBLIC OF ARMENIA»:
Հուշադրամի դարձերեսի դաշտում պատկերված են «Գալանտուս Արտյուշենկոյի» ցողունները եւ ծաղիկները: Պատկերներից աջ ներքեւում մանր տառատեսակով նշված է հուշադրամի մետաղի եւ հարգի պայմանական գրառումը` «Ag 925»: Եզրաշուրթի շրջագծով վերեւում հայերեն, իսկ ներքեւի ձախում լատիներեն մակագրված է ծաղկի անվանումը համապատասխանաբար` «ԳԱԼԱՆՏՈՒՍ ԱՐՏՅՈՒՇԵՆԿՈՅԻ» եւ «Galanthus artjuschenkoae»:
Հուշադրամը շրջանագծով երկու կողմից ունի ուռուցիկ եզրաշուրթ:
Հուշադրամի պատրաստման ժամանակ օգտագործվել են գունավոր ներկեր:
Ուրվագծերի հեղինակն է Էդուարդ Կուրղինյանը: Հուշադրամը հատվել է «Մայեր» դրամահատարանում (Գերմանիա):
Հուշադրամի բնութագիրը.
| Անվանական արժեքը | 1000 դրամ |
| Մետաղը եւ հարգը | արծաթ, 9250 |
| Զանգվածը | 28,28 գ |
| Տրամագիծը | 38,61 մմ |
| Որակը | պրուֆ |
| Դրամաշուրթը | ատամնավոր |
| Տպաքանակը | մինչեւ 10000 հատ |
Հաղորդագրությունից օգտվելու դեպքում հղումը սկզբնաղբյուրին պարտադիր է:
ԿԲ հասարակայնության հետ կապերի ծառայություն