«ԱԶԳ» ՕՐԱԹԵՐԹ

https://www.azg.am | WAP | WAP-CULTURE

#29, 2010-02-19 | #30, 2010-02-20 | #31, 2010-02-23


ԱԴՐԲԵՋԱՆՈՒՄ «ԽՈՐՀՈՒՐԴ» ԵՆ ՏԱԼԻՍ ԻՐԱՆԻՆՙ «ՉԸՆԿԵՐԱՆԱԼ» ՀԱՅԱՍՏԱՆԻ ՀԵՏ

Իրան-Ադրբեջան հարաբերությունները, հատկապես ակտիվացած Իսրայել-Ադրբեջան հարաբերությունների ֆոնին, բավական լուրջ տեսք են ստանում: «Ազգ» -ը նախորդ համարներում անդրադարձել էր, որ Բաքուն «կարողանում» է միաժամանակ բարեկամություն անել Իսրայելի եւ Իրանի հետ, իսկ այս երկու երկրների հարաբերությունները, մեղմ ասած, լավ չեն: Թեհրանը, բնականաբար, չի կարող հանգիստ ընդունել Բաքվի «իսրայելական նկրտումները», ուստի պատակահան չէ, որ Ադրբեջանի Միլի մեջլիսի խոսնակ Օկտայ Ասադովի` փետրվարի 18-19-ի այցելությունը Իրան զուգակցվել է հսկայական բողոքի ակցիաներով: Իրանում Ադրբեջանի դեսպանատան դիմաց իրանցի բողոքարարները ոտնահարել են Ադրբեջանի պետական խորհրդանշանները` այրել են այդ երկրի դրոշը, ձվերով հարվածել են դեսպանատան շենքին:

Ադրբեջանցիները «հետ չեն մնացել» Թեհրանից: Աշխարհի ադրբեջանցիների կոնգրեսը փետրվարի 22-ին Բաքվում Իրանի դեսպանատան առաջ բողոքի սեփական ակցիան է անցկացրել, որին մասնակցել են շուրջ 50 ծայրահեղական ազգայնականներ: Վերջիններս իրենց բողոքն են հայտնել Իրանին, որ նա «ընկերություն» է անում Հայաստանի հետ, ինչպես նաեւ պահանջել են բարելավել Իրանում ապրող ադրբեջանցիների կենսամակարդակը: «Ամոթ է ձեր երկրին, որը բացում է իր դռները մարդասպանների առջեւ», «Ահաբեկիչ Հայաստանի հետ եղբայրությունը հակասում է իսկական մուսուլմանական սկզբունքներին», «Ցուցադրեք ձեր իրական մուսուլմանական դեմքը» կոչերով ադրբեջանցիներն Իրանի դեսպանատան առջեւ մնացել են մոտ 20 րոպե, որից հետո ցույցը ցրվել է ոստիկանության միջնորդությամբ:

Կարելի է փաստել, որ տարածաշրջանում այս «խանդի տեսարանները» դեռ շարունակական կլինեն, մինչեւ այն օրը, երբ այստեղ ապրող յուրաքանչյուր ժողովուրդ «ընկեր ընտրելու» կարիք չի ունենա, այլ կապրի «ընկերների շրջապատում»` անկախ կրոնական ու ազգային առանձնահատկություններից:

Հ. ԱՖՅԱՆ


© AZG Daily & MV, 2009, 2011, 2012, 2013 ver. 1.4