«Սարիբեկ Սուքիասյանի նկատմամբ սկսված հետապնդումների վերջնանպատակը «Բյուրեղ» գործարանը Սուքիասյաններից խլելն է, իսկ այդ նպատակի շրջանակներում ոստիկանության կատարած գործողությունները ծայրից ծայր հակաօրինական են եւ ենթակա չեն որեւէ տրամաբանական բացատրության»: Սա Սուքիասյանների փաստաբաններ Լուսինե Սահակյանի ու Երվանդ Վարոսյանի կարծիքն է: Սահակյանի ներկայացմամբ` «Բջնի» գործարանի հետ կապված զարգացումներից հետո Սուքիասյանները գնել են «Բյուրեղ» ՓԲԸ-ի 80% բաժնետոմսերը: Գործարանը չի գործել, ու ոտքի կանգնեցնելու համար Սուքիասյանները մեծ ներդրում են կատարել` արտադրելով Sil հանքային ջուրը: Որոշ ժամանակ անց գյուղնախարարությունը, որ որոշակի բաժնետոմսեր ուներ, հայցադիմում է ներկայացնում, եւ գործարքն անվավեր է ճանաչվում, իսկ բաժնետոմսերը վերադարձվում են Գոռ Դավթյանին եւ Ռոբերտ Հարությունյանին:
Այդ ընթացքում սկսվում են բանակցություններ, թղթեր են ստորագրվում, կնքում են նաեւ նախնական պայմանագիր, որ Դավթյանն ու Հարությունյանը կամ պետք է բաժնեմասը վաճառեին Սուքիասյանին, կամ էլ նախկին գործարքի ժամանակ վճարված գումարը վերադարձնեին: Ամեն ինչ ընթանում էր իրավական գործընթացի համաձայն, սակայն անակնկալ կերպով չնչին բաժնեմաս ունեցող բաժնետերերից մեկը հայտարարում է, որ կգնի բաժնետոմսերն, ու տարօրինակ կերպով բաժնետոմսերի սեփականատեր է դառնում Ռուբեն Հայրապետյանը: Այստեղ կատարվել է օրենքի առաջին կոպիտ խախտումը: ՓԲԸ-ի առք ու վաճառքի ժամանակ կարելի է երրորդ անձին վաճառել բաժնետոմս, եթե բաժնետերերը տեղյակ են վաճառքին ու չեն ցանկանում բաժնետոմս գնել:
Սահակյանի խոսքերով` փետրվարի 11-ին Գոռ Դավթյանը զանգահարում է փաստաբան Արա Զոհրաբյանին եւ ասում, որ Հայրապետյանն իրեն վախեցրել է: Դավթյանը Զոհրաբյանից խնդրում էր հանդիպում կազմակերպել Սարիբեկ Սուքիասյանի հետ եւ խնդրում աջակցություն իրավական ձեւակերպումների հարցում: Զոհրաբյանը համապատասխան նամակ է կազմում եւ ուղարկում Ռուբեն Հայրապետյանին` տեղեկացնելով, որ նա իրավունք չունի գնելու բաժնետոմսերը:
«Այս ամենից հետո տարօրինակ կերպով հարձակում է տեղի ունենում: Գոռ Դավթյանին գրասենյակում բերման են ենթարկում, ոստիկանությունը նրան տանում է կալանավայր»:
Փաստաբան Լուսինե Սահակյանը նկատում է, որ թեպետ Ներսես Նազարյանն ասաց, որ ոստիկանները գործել են օրենքի համաձայն, սակայն փաստաբանն ներկայացրեց ոստիկանների պաշտոնի չարաշահման ու ապօրինությունների փաստեր: «Կա՛մ Նազարյանը հասարակությանը տրամադրում է կեղծ տեղեկատվություն` տեղյակ լինելով գործի մանրամասներին, կա՛մ էլ նախաքննական մարմինը խաբում է ոստիկանապետին: Երկու դեպքում էլ դա պատիվ չի բերում ոստիկանությանը»:
Փաստաբանը պատմում է, որ Սուքիասյանի գրասենյակը գտնվում է երկրորդ հարկում: Ոստիկանները ոչ թե գլխավոր մուտքից, այլ հետնամասից են ներս մտել: «Հասան Սուքիսյանի գրասենյակի մոտ ու սկսեցին դուռը կոտրել: Երբ նրանց բացատրեցին, որ կոտրելու կարիք չկա, կարող են հանգիստ մտնել, նրանք շարունակեցին կոտրել»:
Ոստիկանությունը եկել է Սուքիասյանների գրասենյակ` ստանալով sms հաղորդագրություն Գոռ Հարությունյանից, որ նա գտնվում է անազատության մեջ: «Ունենք ապացույցեր, որ Գոռը անազատության մեջ չի գտնվել: Ունենք տեսաձայնագրություն, թե այդ օրն ինչ է կատարվել»:
Փաստաբանը տրամադրեց անվտանգության տեսախցիկների նկարահանած լուսանկարները, որտեղ հստակ երեւում է, որ Գոռ Դավթյանն անազատության մեջ չի պահվել ու մենակ, հանգիստ քայլերով դուրս է գալիս սենյակից:
Փաստաբանը վստահ է, որ օպերացիան ծրագրված էր: Սարիբեկ Սուքիասյանը նախատեսված 3 ժամի փոխարեն ոստիկանության բաժանմունքում անցկացրել է 10 ժամ: «Երբ այդ ընթացքում փորձում էինք բարձրաձայնել, որ օրենք են խախտում, ոչ ոք չէր լսում: 4 ժամ փաստաբաններին չէին թողնում մտնել ոստիկանություն»:
Սուքիասյանի աշխատասենյակում կատարված հետախուզությունն էլ է եղել ապօրինի: Փաստաբանի վստահեցմամբՙ դատարանի թույլտվության մեջ նշված էր այլ հասցե: «Երբ այդ մասին բարձրաձայնեցի, քննիչը` Արթուր Պետրոսյանը, տաղանդավոր որոշում իրականացրեց. դատարանի որոշման մեջ ջնջում կատարեց ու այլ հասցե ավելացրեց, դեռ տակն էլ ստորագրեց, որ նախաձեռնությունն իրենն է: Բայց զավեշտն այն էր, որ էլի սխալ հասցե գրանցեց»:
Երվանդ Վարոսյանն էլ պատմում է, որ Գոռ Դավթյանը ոստիկանությունում ընկճված էր: «Գլուխն առել էր ձեռքերի մեջ, նրան անընդհատ տեղափոխում էին»: Փաստաբանները նկատել են, որ ինչ-որ մեկը Դավթյանին ստվերի պես հետեւում էր: «Նա իրավունք չուներ գտնվելու ոստիկանությունում: Գիտենք, թե ով է այդ մարդը, ունենք ապացույցներ, սակայն այժմ չենք հրապարակի, որպեսզի չխանգարենք պաշտպանական մարմնի աշխատանքներին», ասացին փաստաբանները
«Կապ ունե՞ր այդ անձը Ռուբեն Հայրապետյանի հետ» հարցին փաստաբանները հրաժարվեցին պատասխանել:
Փաստաբանները տեղեկություններ չունեն, թե այժմ որտեղ է Դավթյանը, սակայն վստահ են, որ նրան լավ պաշտպանում են:
Թեպետ Լուսինե Սահակյանը վստահ է, որ մեղադրող կողմը կշարունակի դիմել ապօրինությունների, սակայն չեն պատրաստվում ձեռքերը ծալած նստել:
«Հույս չունենալով, որ գոնե այս անգամ օրենքը կգործի, կպայքարենք, կներկայացնենք միջնորդություններ, բողոքներ», ասաց նա:
Ինչ վերաբերում է Ներսես Նազարյանի արտահայտությանը` «Ռուբեն Հայրապետյանն էլ, Սարիբեկ Սուքիասյանն էլ իմ ըկերներն են» Սուքիասյանը խնդրել է փաստաբանի միջոցով փոխանցել հետեւյալը. «Ներսես Նազարյանն իմ ընկերը չէ»:
ՀԱՍՄԻԿ ՀԱՐՈՒԹՅՈՒՆՅԱՆ
Նկար 1. Փաստաբաններ Լուսինե Սահակյան եւ Երվանդ Վարոսյան