Անշարժ գույքի շուկայում կայունացումը շարունակվում է
2010-ի հունվարին, անշարժ գույքի կադաստրի պետական կոմիտեիՙ շուկայի վերլուծության տվյալների համաձայն, Հայաստանի անշարժ գույքի շուկայում իրականացվել է 8131 գործարք, ինչը 11,7 տոկոսով բարձր է 2009-ի հունվարի գործարքների եւ 52,9 տոկոսով ցածրՙ 2009-ի դեկտեմբերին կատարվածների համեմատ: Միայն օտարման գործարքների քանակը հունվարին 2009-ի դեկտեմբերի համեմատ նվազել է 46,7 տոկոսով, իսկ անցյալ տարվա հունվարի համեմատ աճել 7,5 տոկոսով: 2437 օտարման գործարքներից առուվաճառքներինը կազմել է 81,5 տոկոսը: Մնացածը նվիրատվություններն ու փոխանակություններն են: Անշարժ գույքի օտարման գործարքների քանակի 33,1 տոկոսն արձանագրվել է Երեւան քաղաքում:
Մայրաքաղաքում առուվաճառքի գործարքների 62,2 տոկոսն արձանագրվել է բազմաբնակարան շենքերի բնակարանների նկատմամբ: 2009-ի հունվարի համեմատ, բնակարանների առուվաճառքի գործարքների քանակը Երեւանում աճել է 35,2 տոկոսով, իսկ նախորդ տարվա դեկտեմբերի համեմատ նվազելՙ 54,2 տոկոսով:
Բնակարանների շուկայական միջին գները Երեւանում այս տարվա հունվարին 2009-ի դեկտեմբերի համեմատ աճել ենՙ 0,5 տոկոսով: Ըստ վարչական շրջանների, Երեւանում բնակարանների 1 քմ մակերեսի միջին շուկայական գները այսպիսին են եղել.
| Վարչական շրջաններ | Միջին գները (դրամ) հունվար 2009 թ. | Միջին գները (դրամ) հունվար 2010 թ. | Միջին գները (դրամ) դեկտեմբեր 2009 թ. |
| Կենտրոն | 499800 | 473300 | 472300 |
| Արաբկիր | 362100 | 370800 | 370800 |
| Քանաքեռ-Զեյթուն | 282300 | 283300 | 280900 |
| Նոր Նորք | 254300 | 232400 | 230500 |
| Ավան | 259100 | 232800 | 231800 |
| Էրեբունի | 270200 | 246200 | 245400 |
| Շենգավիթ | 260500 | 247700 | 245600 |
| Դավթաշեն | 288200 | 267800 | 265700 |
| Աջափնյակ | 246200 | 237000 | 234800 |
| Մալաթիա-Սեբաստիա | 238100 | 234700 | 233800 |
| Նուբարաշեն | 152600 | 142200 | 142200 |
| Միջինը Երեւանում (բացի Նորք-Մարաշից) | 283000 | 269800 | 268500 |
Մարզերում, բացառությամբ Երեւանի, հունվարին վաճառվել են 212 բնակարաններ, որոնց քանակը դեկտեմբերի համեմատ նվազել է 50 տոկոսով, իսկ 2009-ի հունվարի համեմատ աճելՙ 7,6 տոկոսով: Միաժամանակ, բնակարանների միջին գները դեկտեմբերի համեմատ աճել են 0,3 տոկոսով:
Երեւանից հետո ամենաթանկ բնակարանները հունվարին եղել են Ծաղկաձորում, որտեղ 1 քմ մակերեսի շուկայական գինը կազմել է ավելի քան 181 հազար դրամ: Աբովյանում 1 քմ գինը 158 հազար հազար դրամ է կազմել, Վաղարշապատում (Էջմիածնում)ՙ 157 հազար դրամ: Ապա գալիս են Աշտարակըՙ 142 հազար դրամ, Գորիսը եւ Իջեւանը ՙ 137 հազար դրամ, Նոր Հաճընըՙ 125 հազար դրամ 1 քմ դիմաց ցուցանիշներով:
2010-ի հունվարին Հայաստանում գրանցվել է անհատական տների առուվաճառքի 299 գործարք, որից 78-ըՙ Երեւանում: Մայրաքաղաքում անհատական տների առուվաճառքի գործարքների քանակը 2009-ի դեկտեմբերի համեմատ նվազել է 42,2 տոկոսով, իսկ մարզերումՙ 34,4 տոկոսով: 2009-ի հունվարի համեմատ անհատական բնակելի տների առուվաճառքի գործարքների քանակը Երեւանում աճել է 62,5 տոկոսով, իսկ մարզերում միասին վերցրած նվազելՙ 5,6 տոկոսով: Միջինացվածՙ 250 քմ շինության մակերես եւ 400 քմ տնամերձ ունեցող անհատական տների 1 քմ-ի միջին գները (ներառյալ տնամերձի միավորի գինը) 2010-ի հունվարին 2009-ի դեկտեմբերի համեմատ աճել են 0,8 տոկոսով: Ըստ Երեւանի վարչական շրջանների, գներն այսպիսին են եղել.
| Վարչական շրջաններ | Միջին գները (դրամ) հունվար 2009 թ. | Միջին գները (դրամ) հունվար 2010 թ. | Միջին գները (դրամ) դեկտեմբեր 2009 թ. |
| Կենտրոն | 510000 | 481100 | 476600 |
| Արաբկիր | 426700 | 376900 | 374500 |
| Քանաքեռ Զեյթուն | 322900 | 286700 | 284500 |
| Նորք-Մարաշ | 314100 | 283200 | 282000 |
| Ավան | 286200 | 236400 | 234800 |
| Էրեբունի | 291500 | 249800 | 247800 |
| Շենգավիթ | 291900 | 249800 | 247800 |
| Դավթաշեն | 324500 | 273900 | 270400 |
| Աջափնյակ | 292400 | 240700 | 237700 |
| Մալաթիա-Սեբաստիա | 287200 | 239500 | 236300 |
| Նուբարաշեն | 172300 | 146400 | 146400 |
| Միջինը Երեւանում (բացի Նոր Նորքից) | 320000 | 278600 | 276300 |
Մարզերում միջինացված են 200 քմ շինության եւ 1000 քմ տնամերձ մակերեսով անհատական տների վերաբերյալ գները: Այստեղ միջին գները հունվարին դեկտեմբերի համեմատ աճել են 0,8 տոկոսով: Ամենաթանկ անհատական տները Երեւանից հետո դարձյալ Ծաղկաձորում են, 1 քմ-նՙ 303 հազար դրամ: Երկրորդը Վաղարշապատն է, 1 քմ-նՙ 165 հազար դրամ, երրորդը Աբովյանը, որտեղ 1 քմ-ն կազմել է 161 հազար դրամ: Ապա գալիս են Աշտարակը 144 հազար դրամ, Գորիսը 143 հազար դրամ, Իջեւանըՙ 139 հազար դրամ, Նոր Հաճընը 134 հազար դրամ, Եղվարդըՙ 128 հազար դրամ 1 քմ դիմաց:
Հողի շուկայում հետեւյալ պատկերն էՙ 2010-ի հունվարին 2009-ի հունվարի համեմատ, հողերի առուվաճառքի գործարքների քանակն աճել է 12,2 տոկոսով, աճուրդով վաճառքներինը նվազելՙ 18,1 տոկոսով: Ընդ որում, Երեւանում հողերի աճուրդ վաճառքի գործարքների քանակը նվազել է 87,5 տոկոսով:
2010-ի հունվարին, 2009-ի դեկտեմբերի համեմատ, անշարժ գույքի վարձակալության գործարքների քանակը նվազել է 58,2 տոկոսով, իսկ 2009-ի հունվարի համեմատ` 22,4 տոկոսով:
Իրականացվել են հիպոթեկային գրավադրման 47 գործարքներ, որից 28-ը` Երեւանում: Հիպոթեկային գրավադրման գործարքներից 72,3 տոկոսն իրականացվել են բազմաբնակարան բնակելի շենքերի բնակարանների, 23,4 տոկոսն` անհատական բնակելի տների, մնացածըՙ հասարակական նշանակության օբյեկտների, այգետնակների եւ հողերի նկատմամբ: 2009-ի դեկտեմբերի համեմատ, հիպոթեկային գրավադրման գործարքների քանակը նվազել է 75,8 տոկոսով, Երեւանում` 80,6 տոկոսով, իսկ մարզերում` 62 տոկոսով: 2009-ի հունվարի համեմատ, հիպոթեկային գրավադրման գործարքների քանակն աճել է 3,6 անգամ, Երեւանում` 2,5 անգամ, մարզերում` 9,5 անգամ:
Այսպիսով, 2010-ի առաջին ամսին պահպանվել է տարվա կեսից սկսված անշարժ գույքի գների կայունացումն ու վերջին 2-3 ամիսներին արձանագրվող ամսական փոքր աճը: Նախորդ տարվա հունվարի համեմատ էապես ավելացել է նաեւ գործարքների քանակը:
ԱՐԱ ՄԱՐՏԻՐՈՍՅԱՆ