«ԱԶԳ» ՕՐԱԹԵՐԹ

ԳԱԼՈՒՍՏ ՍԱՀԱԿՅԱՆԸ` ԿԱՌԱՎԱՐՈՒԹՅԱՆ ՔՆՆԱԴԱՏՈՒԹՅԱՆ, ԱՐՁԱՆԱԳՐՈՒԹՅՈՒՆՆԵՐԻ ԵՎ ԻՐ ՄԱՍԻՆ

ՀՀԿ խմբակցության ղեկավար Գալուստ Սահակյանի հետ զրույցը սկսեցինք երեկ կառավարության առանձին նախարարների ուղղությամբ արված քննադատությունից` Գագիկ Ծառուկյանը էկոնոմիկայի նախարար Ներսես Երիցյանին էր քննադատել, Ներսես Երիցյանը պատասխանեց, թե Ծառուկյանը թող իր նախարարներին գնահատական տա, Նաիրա Զոհրաբյանն էլ երեկ ասաց, թե Ներսես Երիցյանը շատ ճանապարհ ունի անցնելու, որ Գ. Ծառուկյանին խորհուրդներ տա, 14 տոկոս տնտեսական անկման դեպքում լավ կանի հրաժարական տա, ԱԺ նախագահն էր վարչապետի ուղղությամբ ուղերձ հղել. այս բոլորի մեջ ինչ-որ քաղաքական ենթատեքստ տեսնո՞ւմ է Գ. Սահակյանը:

- Մենք շատ հաճախ երկու ծայրահեղությունների մեջ ենք ընկնում. առաջինը, որ օրինագծերի քննարկումներն արագ-արագ անցնում են, այս դեպքում ասում են` քննարկում չի լինում, ո՞նց կլինի: Բայց իսկապես կան նաեւ օրինագծեր, որոնց խոր քննարկման անհրաժեշտությունը հենց խորհրդարանում է, թիմն ընդհանուր եզրակացության դրանց վերաբերյալ եկած չի լինում, վեճ կա, ու վեճը դարձնում ենք հանրային քննարկման առարկա, որ օրինագծերն ավելի կենսունակ լինեն: Այնպես որ քաղաքական ենթատեքստ չկա նրա մեջ, որ խորհրդարանը լրջորեն քննարկումներ անի, իսկ անհատական վեճերը քաղաքական դարձնելու դեպքում անիմաստ է դրանց քաղաքական գնահատական տալ:

- Խմբակցության ղեկավարն ասում է` էկոնոմիկայի նախարարը բան չի հասկանում տնտեսությունից, դա անհատական վե՞ճ եք համարում:

- Բնականաբար յուրաքանչյուրս էլ կարող ենք գնահատել պետական չինովնիկի աշխատանքը: Բայց այդ խնդիրը մենք չունենք, եւ չեմ կարծում, որ դա պիտի հասնի անձնական վիրավորանքների: Էստեղ էլ քաղաքական տրամաբանությունը չի գործում, կարծիք է` հայտնվել է, դա կոալիցիայի տեսակետ չէ, անհատական կարծիք է, համենայն դեպս` կոալիցիան ձեւավորված մարմին ունի, որը կարող է տեսակետ հայտնել: Եվ կողմնորոշումս էլ այդպիսին չէ, որ իմ ու քո նախարարներ կան երկրում: Նախարարների կաբինետը ձեւավորել է կառավարությունը, նա գործում է, քաղաքական տերմինոլոգիան էլ բացառվում է...

- Բայց հենց Ներսես Երիցյանն է քաղաքականացրել ասելովՙ թող գնան-իրենց նախարարներին գնահատական տան...

- Վիրավորվել է երեւի ու հակադարձել, էսպես պիտի նայել, բայց սա չի կարող առիթ լինել, որ լարվածություններ առաջանան կոալիցիայում կամ քաղաքական դաշտում` հետեւանքներ չի կարող ունենալ:

- Ներկայացուցիչների պալատի թիվ 252 բանաձեւին քաղաքական ուժերն ակտիվ արձագանքեցին, բայց իմ տպավորությամբ` ՀՀԿ-ն մի փոքր ուշացավ, պատճառ կա՞ր:

- Մենք արդեն արձագանքել ենք քննարկման ժամանակ, որովհետեւ մեր երկու ներկայացուցիչները ներկա էին քննարկմանը, նույնիսկ մինչեւ քննարկումը ՀՀԿ-ականանները քննարկում եւ գնահատական էին տալիս:

- Խոսակցություններ կան, թե ՀՀԿ-ի ներսում լարվածություններ կան, հաճախ թվում է, թե տեսակետ արտահայտելիս համակարգում չկա, երիտասարդնե՛րն են հայտ ներկայացնում իրենց լսելի դարձնելու..

- Ոչ մի լարվածություն չկա, ՀՀԿ խմբակցության անդամները գործում են խորհրդակցված, այդ աշխատանքները կոորդինացնում եմ ես, միասին որոշում ենք, թե հարցերն ինչպես պետք է ներկայացնել` ո՞վ, ինչպե՞ս, ե՞րբ...

- Հստակեցնեմ հարցս` Ձեր ազդեցությունը խմբակցությունում եւ ընդհանրապես ՀՀԿ-ում նվազելու կամ նվազեցնելու մասին է խոսքը...

- Դրանք բամբասանքներ են, որովհետեւ մոտավորապես 20-22 ձեւավորված քարոզիչներ ունենք, որոնց ուղղված գաղափարական եւ սկզբունքային հենքը գործադիր մարմնում իմ կողմից է իրականացվում եւ ուղղորդվում:

- ՕԵԿ-ի նախարարների հետկանչին ինչպե՞ս եք վերաբերվում, մենք ամեն անգամ տեսնում ենք, որ կուսակցական նպատահարմարությունը գերակա է կառավարության աշխատանքից, եւ մեկ էլ վարչապետն առավոտյան արթնանում է առանց այս կամ այն նախարարների` ով- երբ ուզում, նախարար է հետկանչում:

- Դա կուսակցության գործն է, լավ կլիներ մի քանի թեկնածու առաջադրվեր մի տեղի համար` ընտրություն ունենալու համար, իսկ բուն խնդիրը կոալիցիոն հուշագրինն է, որի շուրջը միավորվել եւ գործում է այսօր կոալիցիան: Բավական լուրջ քննարկման սցենար է նախարար փոխելը եւ մի քիչ փակ, այնպես որ այնպես չէ, որ վարչապետն առավոտյան եկավ աշխատանքի եւ իմացավ նախարարների հետկանչի մասին:

- Հայ-թուրքական արձանագրությունների ճակատագիրն ի՞նչ կլինի:

- Հիշո՞ւմ եք` մեզ մեղադրում էին, որ արձանագրություններն օրակարգից դուրս կմղեն Ցեղասպանության հարցը, այնինչ լրիվ հակառակը տեղի ունեցավ: Ես մի առիթով ասել եմ` ողջամիտ ժամկետները վաղուց անցել են, բայց մենք պիտի նաեւ շատ աչալուրջ լինենք` աշխարհի քաղաքական իրավիճակի հանդեպ եւ ճիշտ ժամանակին մեր հարցադրումները դնենք, առավել եւս` արձանագրությունների ստորագրումից առաջ Հայաստանի նախագահի ուղերձում ասվում էր, որ եթե որեւէ խոչընդոտ լինի, մենք միջազգային նորմերին հատուկ գործելակերպ կորդեգրենք: Ես գտնում եմ, որ ողջամիտ ժամկետը վաղուց է անցել, եւ պարզ, շիտակ պիտի ասել` եթե այդպես շարունակվի, արձանագրությունները ինչ-որ մի պահի չվավերացվեն Թուրքիայի Մեջլիսում, մենք կգնանք մեր ստորագրությունը հետ վերցնելու ճանապարհով, բայց դա կլինի մեր գործելակերպի բաղադրիչների մի փոքր մասը: Այնուհանդերձ` մենք այսօր որոշակի սպասում պետք է ունենանք` արձանագրությունների վավերացման առումով, որովհետեւ Թուրքիան իր ներքաղաքական իրավիճակով եւ վերջին իրադարձություններով ջղաձգված է, ցայտնոտի մեջ է, մեկը մյուսի հետեւից պաշտոնյաները երբեմն անհեթեթության հասնող գործողություններ եւ հայտարարություններ են անում, բայց մի փոքր սպասում կա:

- Նախընտրական որոշակի տրամադրությունների երանգ Հայաստանում նկատվում է, ֆորսմաժորային իրավիճակը հնարավոր համարո՞ւմ եք, ասենք, ԼՂՀ հարցի լուծման արագացման հետ կապված ինչ-որ բան պարտադրվի, որից հետո քաղաքական իրավիճակ սրվի:

- ԼՂՀ կարգավիճակի հետ կապված արագացում նկատելի է: Եթե կարգավիճակը լինի ոչ Ադրբեջանի կազմում` ուրեմն թող արագանա, մնացած բոլոր տարբերակները մեզ համար ընդունելի չեն, ԼՂՀ-ն երբեք չենք տեսնում Ադրբեջանի կազմում կամ այսօրվա կարգավիճակից ցածր: Իսկ մադրիդյան սկզբունքները վավերացված փաստաթուղթ չեն, այլ միայն շրջանակն այն հարցերի, որի շուրջը կողմերը պետք է բանակցեն, առաջարկ ամեն հանդիպման ժամանակ էլ կարող է լինել: Մեր տեսակետով` փաթեթային տարբերակով ընդունելի լուծում պետք է լինի: Իսկ ֆորսմաժորային որեւէ վիճակ չի կարող առաջանալ, քանի որ դրա համար հիմք չի կարող առաջանալ:

- Քոչարյանի վերադարձին` վարչապետական աթոռին, որ այդքան խոսվում է, ինչպե՞ս եք վերաբերվում:

- Դա Քոչարյանի իրավունքն է: Նա ՀՀ քաղաքացի է, երկրի նախագահն է եղել եւ լիարժեք իրավունք ունի քաղաքական կյանքով զբաղվելու: Մինչդեռ փորձում են, մանավանդ ընդդիմադիր կողմը, բոբոյի տեսքով ներկայացնել նրան, մոռանալով, որ Քոչարյանը բավական լուրջ ծառայություն ունի երկրին, վերջին հաշվով տնտեսական զարգացումները եւ Հայաստանի բարենորոգ գործունեությունը կապվում են նրա անվան հետ, էնպես որ` ես շատ դրական կհամարեմ, որ այն քաղաքական գործիչները, որ մեր տեսակետին են Ցեղասպանության, ԼՂՀ խնդրի հետ կապված, դաշտում տեղ ունենան:

- Վարչապետի փոփոխությունը հնարավոր համարո՞ւմ եք:

- Այսօրՙ չէ, բայց պաշտոնները հավերժական չեն լինում` մեկը պաշտոն է ունենում, մեկը կուսակցական գործով է զբաղվում, քաղաքական թիմն այդպես լծակներն օգտագործելով իր սկզբունքներն ու գաղափարները փորձում է ներդնել հասարակության մեջ:

Հարցազրույցը վարեց ՄԱՐԻԵՏԱ ԽԱՉԱՏՐՅԱՆԸ