Արա Հակոբյանը «Ուլիսին» փրկեց պարտությունից
Արդյունավետ երկու տուրերից հետո ֆուտբոլի Հայաստանի բարձրագույն խմբի 3-րդ տուրի հանդիպումներում խփվեց ընդամենը 7 գոլ: Ընթացիկ առաջնությունում առաջին անգամ գրանցվեց ոչ-ոքի արդյունք:
Բավական հետաքրքրական պայքարում անցավ տուրի կենտրոնական հանդիպումն «Ուլիսի» եւ «Բանանցի» միջեւ: Երկու թիմերն էլ ակտիվ խաղ ցուցադրեցին: Առաջին լուրջ գոլային պահը ստեղծվեց 33-րդ րոպեին, երբ «Բանանցի» հարձակվող Դենիրան Օրտեգան մենմենակ հայտնվեց «Ուլիսի» դարպասապահ Վլադիմիր Մալկովի դեմ ու փորձեց նրա գլխավերեւով գնդակն ուղարկել անպաշտպան դարպասը: Սակայն հարվածը թույլ էր եւ դարպասապահը հանգիստ որսաց գնդակը: 10 րոպե անց «Բանանցը» հասավ հաջողության: Աջ թեւով Էդուարդո դո Սանթոսը սրընթաց անցում կատարեց, «Ուլիսի» դարպասապահն անհարկի ընդառաջ դուրս եկավ մրցակցի հարձակվողին, որը հեռվից գնդակն ուղարկեց դարպասը:
Ընդմիջումից հետո փոխարինման մտած Ալեքսանդր Պետրոսյանը զգալիորեն ակտիվացրեց «Ուլիսի» հարձակողական գործողությունները եւ իր ներդրումն ունեցավ թիմի հաջողությունում: Շուտով Պետրոսյանը տուգանայինի մատույցներից գրավեց դարպասըՙ վերականգնելով հավասարակշռությունը: 7 րոպե անց Պետրոսյանին վայր գցելու համար մրցավարը 11 մ հարված նշանակեց: «Ուլիսը» կարող էր կրկնապատկել հաշիվը, սակայն Թբիլաշվիլու հարվածը որսաց «Բանանցի» դարպասապահ Ստեփան Ղազարյանը:
79-րդ րոպեին «Ուլիսի» դարպասապահ Մալկովը կրկին անվստահ խաղացՙ Սամվել Մելքոնյանի հարվածը հետ մղելով ուղիղ Էդուարդո դո Սանթոսի մոտ, որն ընթացքից գրավեց դարպասը: «Բանանցը» հաշվի մեջ առաջ անցավ եւ մոտ էր հաղթանակին: Սակայն ավելացված ժամանակում կոպտորեն սխալվեց Էդուարդ Կակոսյանը: Ուլիսցիները խլեցին գնդակը եւ փոխանցեցին տուգանային հրապարակում հսկողությունից դուրս մնացած Արա Հակոբյանին, որն էլ թիմին փրկեց պարտությունից (2-2):
Երկրորդ ոչ-ոքին գրանցվեց Դիլիջանում, որտեղ «Իմպուլսը» հյուրընկալել էր չեմպիոնին: Գավաթային երկու հանդիպումներում էլ «Փյունիկը» հաղթել էր միեւնույն 1-0 հաշվով, իսկ ահա առաջնության խաղում չկարողացավ գրավել մրցակցի դարպասը: Ճիշտ է, 67-րդ րոպեին փյունիկցիները գոլ խփելու հիանալի հնարավորություն ստացան, սակայն Սարգիս Հովսեփյանը չիրացրեց 11 մ հարվածը: Դարպասապահ Մայիս Ազիզյանը հետ մղեց գնդակը: «Փյունիկի» ավագն ընթացիկ առաջնությունում արդեն 2-րդ 11 մ հարվածը չիրացրեց: Նա վրիպել էր նաեւ մեկնարկային խաղումՙ Գյումրիում: Այսպես բարձրագույն խմբի նորեկն առաջին միավորը վաստակեց:
Առաջնությունում հաջող մեկնարկած «Կիլիկիան» անդրանիկ պարտությունը կրեցՙ 0-2 հաշվով զիջելով «Միկային»: Վերջինիս միայն ընդմիջումից հետո հաջողվեց առավելության հասնել մրցակցի նկատմամբ, երբ գոլերի հեղինակներ դարձան Ուլիսես Մոնտենեգրոն եւ Ժունիոր Էդիլսոնը:
Գյումրիում առաջնության երկու անհաջողակների մրցավեճում հաջողությունն ուղեկցեց «Գանձասարին»: Այս խաղում էլ շիրակցի Տիգրան Դավթյանը 20-րդ րոպեին չիրացրեց 11 մ հարվածը: Իսկ ահա ընդմիջումից հետո Արսեն Ավետիսյանը գրավեց դաշտի տերերի դարպասը եւ հաղթանակ պարգեւեց իր թիմին: Դա ՀՀ առաջնություններում Ավետիսյանի 190-րդ գոլն էր: «Գանձասարը» ՀՀ առաջնություններում առաջին հաղթանակը տոնեց Գյումրիում:
Մինչեւ առաջնության 4-րդ տուրը կկայանան ՀՀ գավաթի կիսաեզրափակիչի հանդիպումները: Այսօր «Հրազդանում» «Ուլիսը» կհյուրընկալի «Փյունիկին», իսկ վաղը «Հանրապետականում» կմրցեն «Բանանցն» ու «Միկան»: Հետաքրքրական է, որ անցած տարի էլ կիսաեզրափակիչում մրցել էին նույն զույգերը: Հաջողությունն ուղեկցել էր «Փյունիկին» եւ «Բանանցին»: Ի դեպ, վերջին 3 տարիներին «Բանանցը» գավաթի կիսաեզրափակիչում մշտապես հաղթել է «Միկային»:
Մրցաշարային աղյուսակ
| Խ | Հ | Ո | Պ | Գ | Մ | |
| 1. Փյունիկ | 3 | 2 | 1 | 0 | 7-2 | 7 |
| 2. Ուլիս | 3 | 2 | 1 | 0 | 6-2 | 7 |
| 3. Միկա | 3 | 2 | 0 | 1 | 8-4 | 6 |
| 4. Կիլիկիա | 3 | 2 | 0 | 1 | 6-4 | 6 |
| 5. Բանանց | 3 | 1 | 1 | 1 | 7-8 | 4 |
| 6. Գանձասար | 3 | 1 | 0 | 2 | 2-4 | 3 |
| 7. Իմպուլս | 3 | 0 | 1 | 2 | 2-8 | 1 |
| 8. Շիրակ | 3 | 0 | 0 | 3 | 1-7 | 0 |
Ռմբարկուները
| Սամվել Մելքոնյան | «Բանանց» | 3 |
| Էդուարդո դո Սանթոս | «Բանանց» | 3 |
| Արսեն Ավետիսյան | «Գանձասար» | 2 |
| Մինդաուգաս Գրիգալեւիչուս | «Միկա» | 2 |
| Ուլիսես Մոնտենեգրո | «Միկա» | 2 |
| Ալբերտ Թադեւոսյան | «Փյունիկ» | 2 |
| Գագա Թբիլաշվիլի | «Ուլիս» | 2 |
| Սարգիս Մովսիսյան | «Կիլիկիա» | 2 |
ԱՇՈՏ ՀԱՅՐԱՊԵՏՅԱՆ