Առնվազն 100 միլիոն դոլար է անհրաժեշտ գիտության համակարգի արդիականացման համար
Մի խումբ գիտնականներ վերջերս հանդիպեցին ՀՀ նախագահ Սերժ Սարգսյանի հետ: Հանդիպման ժամանակ նրանք քննարկել են գիտության արդիական խնդիրները:
«Նախագահին մենք ներկայացրինք գիտության այսօրվա խնդիրները, որոնցից է, օրինակ` գիտության, կրթության ու տնտեսության միջեւ միասնական կապի բացակայությունը: Մենք ունենք երկու խիստ հրատապ հարց. առաջինը` մեր հետազոտական ինֆրակառուցվածքի մաշվածությունն է, սարքավորումները, որոնց օգնությամբ կատարում են հետազոտական աշխատանքներ, արդեն չեն համապատասխանում ժամանակակից գիտության մակարդակին, եւ երկրորդը` մեր բնագավառի սոցիալական խնդիրներն են, որոնք նախ եւ առաջ վերաբերում են մեր աշխատանքի պայմաններին եւ այն միջոցներին, որոնք տրամադրվում են գիտությանը` աշխատավարձին, գործուղումներին եւ այլն», երեկ «Տեսակետ» ակումբում` ասուլիսի ժամանակ տեղեկացրեց Գիտությունների ազգային ակադեմիայի (ԳԱԱ) նախագահ Ռադիկ Մարտիրոսյանը :
Նորություն չէ, որ Հայաստանում գիտությունն ունի սերնդափոխության լուրջ խնդիր, մեր գիտությունը բավականին ծերացել է: Չնայած վերջին տարիներին սերնդափոխության ուղղությամբ որոշակի աշխատանքներ են տարվում, սակայն դա դեռ բավարար չէ:
Բանախոսը նշեց. «Միայն անցյալ տարի մեր համակարգի տարբեր ինստիտուտներում աշխատանքի են ընդունվել տարբեր բուհերի 162 շրջանավարտ: Սերնդափոխության խնդրի լուծման ուղղությամբ հանրապետության նախագահը խոստացավ մեր համակարգի 200 երիտասարդ գիտնականների ապահովել բնակարաններով` հիպոթեկային ծրագրի ձեւով եւ 25 տարի տեւողությամբ»:
Ռադիկ Մարտիրոսյանը կարծում է, որ այն աշխատանքը, որին նվիրվում է երիտասարդ գիտնականը, պետք է լինի գրավիչ, ինչը կօգնի, որ երիտասարդությունը գա դեպի գիտությունը:
«Պետք է բարձրացնենք գիտական աշխատանքի եւ գիտաշխատողի վարկը: Նախկինում ընտանիքի անդամները պարծենում էին, որ իրենց ընտանիքում կա գիտությունների թեկնածու, սակայն այսօր գիտաշխատողը չունի հեղինակություն», ասում է Ռ. Մարտիրոսյանը եւ հավելում, որ մեր իրականությունում գիտական աշխատանքի արժեզրկման պատճառը քաղաքական ու տնտեսական փոփոխություններն էին, որոնք չնպաստեցին գիտության զարգացմանը, փոխարենը` գիտության մարդիկ ստիպված եղան թողնել գիտությունը:
Ըստ բանախոսի, նվազագույն հաշվարկներով, համակարգի բոլոր կառույցների արդիականացման համար կպահանջվի շուրջ 100 միլիոն դոլար:
ԻՆԳԱ ՊԵՏՐՈՍՅԱՆ