2009 թ. հոկտեմբերի 22-ին, 29-ին եւ նոյեմբերի 12-ին Երեւանում անցկացված «Ընդդեմ հայ-թուրքական արձանագրությունների, մադրիդյան սկզբունքների եւ ՀՀ-ում տիրող բռնապետական ռեժիմի» բողոքի խաղաղ ցույցի ընթացքին խոչընդոտել են ոստիկաններն ու ակցիայի մասնակիցների հանդեպ ոտնձգություն իրականացրել:
Ակցիային մասնակցող, Աժ «ժառանգություն» կուսակցության պատգամավոր Զարուհի Փոստանջյանը «Ազգի» զրույցում պատմեց, որ ոստիկանները պատռել են պաստառներն ու հրել ակցիայի մասնակիցներին, ինչը քրեական օրենսգրքով համարվում է հանցագործություն: Ոստիկանների կատարածի կապակցությամբ Փոստանջյանը ոստիկանական բաժանմունքում հաղորդումներ է տվել, սակայն դրանք պատշաճ ընթացք չեն ստացել, եւ օրինազանց ոստիկանների գործողությունների վերաբերյալ քրեական գործեր չեն հարուցվել:
Այդ կապակցությամբ Փոստանջյանը դատարան հայց էր ներկայացրել` մեղադրելով Երեւան քաղաքի ոստիկանապետ Ներսես Նազարյանին անգործության մեջ: Դատավարության հերթական նիստը մեկնարկեց երեկ ՀՀ վարչական դատարանում` 20 րոպե ուշացումով: Սակայն նիստը չսկսված ավարտվեց: Պատճառըՙ նախագահող դատավորիՙ Սեւակ Համբարձումյանի` հուղարկավորության արարողությանը ներկա գտնվելու «անհրաժեշտությունն» էր. դատը հետաձգվեց մինչեւ մայիսի 18-ի ժամը 11-ը:
Հ. Հ.