Դոնի Ռոստովում` Սարգսյան-Մեդվեդեւ հանդիպում
Ըստ Հայաստանի նախագահի մամլո գրասենյակի` երեկ Դոնի Ռոստովում տեղի է ունեցել Հայաստանի եւ Ռուսաստանի նախագահներ Սերժ Սարգսյանի եւ Դմիտրի Մեդվեդեւի հանդիպումը: Քննարկումները վերաբերել են հայ-ռուսական ռազմավարական գործընկերությանը, տնտեսական համագործակցությանը, հումանիտար ոլորտում շփումների ակտիվացմանը, միջազգային եւ տարածաշրջանային խնդիրներին. «Մենք որպես գործընկերներ, ռազմավարական դաշնակիցներ պետք է հաճախ հանդիպենք, ըստ էության այդպես էլ վարվում ենք», ասել է Դ. Մեդվեդեւը ` որպես օրինակ նշելով նախագահ Սարգսյանի այցը Մոսկվա, Հայրենական պատերազմի 65-ամյակին: Նա նաեւ տեղեկացրել է եվրոպական գործընկերների հետ իր մի քանի հանդիպումների արդյունքների մասին` հայ-թուրքական հարաբերությունների կարգավորման գործընթացի համատեքստում: Հայաստանի նախագահը աշխատանքային հանդիպումների ձեւաչափը լավ է համարել` Դոնի Ռոստով այցելության հրավերի համար շնորհակալություն հայտնելով եւ նշելով այստեղ առկա հայկական մեծ սփյուռքի մասին, որի ներկայացուցիչների հետ նա երեկ հանդիպել է, իսկ Մեծ հաղթանակի միջոցառումներ փայլուն կազմակերպման եւ ջերմ ընդունելության համար էլ ասել է. «Ես հպարտ էի` հզոր շքերթը մեր ընդհանուր պատմության եւ մարտական եղբայրության հրաշալի հիշեցում էր»:
Հանդիպման ընթացքում կողմերը պայմանավորվել են օգոստոսին Ռուսաստանի նախագահ Դմտրի Մեդվեդեւի Հայաստան կատարելիք այցի վերաբերյալ:
Մ. Խ.